sujuligtûtit erĸûtíneĸartut

Nâlagkap tikiúnigssâ pivfigssákut ilimagineĸartúkut píngitsôrmat - 1844 upernãkut - tauva ugperdlutik tikiúnigssânik utarĸisimassut ĸulaleratdlardlutigdlo nalornileraluarput. silamiunit pakatsisitaussutut sagdloĸítagaussututdlo issigineĸaraluardlutik Gûtip oĸausia sule tugpatdiersautigât. inugpagssuit agdiagkat iluartut misigssortuarpait, ugperissamingnut ugpernarsautigssat misiligdlugit sujuligtûtitdlo ilisimassagssarsiorfigalugit ĸáumarsagaunerujumavdlutik. bîbilip nalunaerutâ ugperissãnut tapersersûtaussoĸ ersserĸigsutut aulajaitsututdlo ípoĸ. nalunaeĸutit paitsûgagssáungitsut Kristusip tikiúnigssâ piârtumik pissugssatut uparuarpât. Nâlagkap pivdluarĸússutâ, ajortigdlit sângnerisigut kristumiutdlo akornáne anersãkut ítumik eĸêrsailerĸingníkut, nalunaerutip ĸilangmit pisimanera nalunaiautigisimavâ. ugpertutdlo pakatsisimaneĸ nauk navsuiarsínáungíkaluardlugo misiligtagkamíkut Gûtimit tasiorneĸarsimanertik ĸularutigíngilât.

sujuligtûtit Kristusip tikiuterĸingnigssânut túngasorisimassait ajoĸersûtinik. mãnákut nalorninermingnut písanganermingnutdlo nalerĸútunigtaoĸ ilaĸarput, tamákulo tugpatdlersautigalugit ugperdiutik mãnákut nalorninartorsiutigissamik pâsinarsiumârnigssât neriûtigât. sujuligtûtit tamáko liât agdlagsimavoĸ Hab. 2,1-4.

pakatsinerup kingornagut agdlagsimassoĸ mána pingârutiligssuartut sarĸúmerpoĸ: "takordlûgaĸ atortûvoĸ, pivfigssaĸ erĸordlugo erĸûtíneĸásaoĸ, uniúsanane torâgaĸ ornigpâ; mulugpat, tauva utarĸiuk; tikiutísaorme; tikiutíngitsũsángilaĸ. ... iluartoĸ ugpernermigut inũsaoĸ."

utarĸissut nuánârput, autdlarĸáumik naggatigssamigdlo ilisimassup pakatsinigssartik sujumut nalúngerêrdlugo sujôrángínermik tugpatdiersautigssamigdlo tunisimangmatik. agdlagsimassune taimáitunik oĸaorĸigsâruteĸángíkaluarpat Gûtip oĸausianut tatigingningnertik aulajangiutdlugo taimatut misiligauvfingmingne nãmagigtardiutik utarĸineĸ sapersimásagaluarput.

Matîusip agdlagâne kapitalit 25-áne niviarsiat ĸulit pivdlugit ássersûtivtaoĸ adventisiortut misiligtagât ĸáumarsarpâ. ássersũme tássane kangiamiutut katínigssaĸ ássersûtigineĸarpoĸ.

"tauva ĸilangmiup nâlugauvfia imáikumârpoĸ sôrdlo niviarsiat ĸulit, táuko ĸutdlilissardiutik uvigssaĸ pâriartordlugo ánivigât, táukuale ilait tatdlimat sianisũput tatdlimatdlo sianîtsûvdiutik. sianîtsut ĸutdlilissaraluardlutik igínerusissángitdiat. sianisûtdle pûgutaussamingne igínilissarput ĸutdlitigdlo nagsardlugit. uvigssardlo mulungmat tamarmik uernaierput sinilerdlutigdlo. únuardle ĸiterarmat suaorpalulerput: "ata, uvigssaĸ aggerpoĸ, pâriartordlugo ánivigisiuk!"

uvigssap tikiunera Kristusip tikiúnigssâtut pâsineĸarpoĸ, sôrdlo tamána íngilip sujugdliup nalunaerutâne nalunaerutigineĸartoĸ. tikiuterĸajâlernerane angnertûmik eĸêrsaineĸ niviarsiat uvigssamik nâpigiaineránut nalerĸiúneĸarpoĸ.

uvigssap mulunera ássersûtauvoĸ Nâlagkap ilimagineĸarnerminit ĸângiútôrneranut, pakatsinermut kinguartitsinertutdlo ítumut. nalornilerfikut tamatumûna ilungersúngitsut soĸutigingningnerat katsorna aulalerpoĸ, kisiáne ugpernermingne bîbilimik ilisimassaĸarnermik nangminerissamik túngaveĸartut ĸaersoĸ tungmarfigât pakatsinerup malîsa úpitísínáungisât.

"uvigssardle mulungmat tamarmik uernalerput sinilerdiutigdlo. únuardle ĸiterarmat suaorpalulerput: "ata, uvigssaĸ aggerpoĸ, pâriartordlugo ánivigisiuk! tauva niviarsiat táuko tamarmik iterput, ĸutdlisigdlo iluarsarniaierpait." (Mat. 25, 5. 7). aussame 1844-me uvdlut 2300 nâsorineĸalerĸârmata nalunaerut tamána bîbilip oĸauserpiainik nalunaerutigineĸarpoĸ: "ata, uvigssaĸ aggerpoĸ!"

eĸêrsainermut tamatumúnga píssutaussoĸ tássa pâsineĸarmat Artarssartap Jerusalât ĸarmarĸerĸuvdlugo inássutâ uvdlunut 2300-nut autdlarnerfiussoĸ Kristusip inúngornerata sujornagut ukiume 457-ime ukiákut, isumaliutigineĸarĸârneratutdlo ukiup autdlartilerneragut pínane, atulersitaussoĸ. ukioĸ Kr. suj. 457 ukialernera autdlarnerfigalugo ukiut 2300 nâssugssáuput ukiákut 1844-me.

taimatútaoĸ testamentitorĸame agdlagsimassut ugpernarsautáuput "ivdlernartûtip salingneĸarnigssâta" ukiákut pisimanigssânut.

ássersûtigssat Kristusip tikiuterĸingnigssânut túngassut erĸûtíneĸarput pivfigssákut ássersûtigssatut kivfartũssinerme uparuarneĸartúkut. israilíkúne ivdlernartûtip salingneĸarnera imalũnît uvdloĸ sáimáunartitsivigssuaĸ nagdliúpoĸ jûtine ĸáumatit arfineĸ áipâta uvdluisa ĸulingáne (3 Môrs. 16, 29-34). palasiunerup israilikut tamákerdlugit ivdlernartũmit sáimáunarterêrdlugit savssardlune inuiaĸatigît pivdluarĸungmagit. taimatut ilimagineĸarpoĸ Kristuse sarĸúmísassoĸ nunalo mingulásagâ ajortinik ajortilingnigdlo piunêrússiníkut, ínugtanilo utarĸissut toĸujuíssusermik pivdluarĸúsagai. ĸáumatit arfineĸ áipâta uvdluisa ĸulingat, uvdloĸ sáimáunurtitsivigssufiĸ, ivdlernartûtip minguiarneĸorfigssâ, ukiume 1844-me nagdliúpoĸ ortûpairp 22-áne táussutíneĸardlunilo Nâlagkap tikiuvfigssâ. tamána uvdlut 2300 ukiákut nânigssãnik ugpernarsautigssanut sarĸúmiúneĸarêrsunut nalerĸúpoĸ, pâsissardlo agssortugagssáungitsutut ípoĸ.

utarĸivfik sinigfiussoĸ Matîusime kapitalit 25-áne uvigssap aggerneranik kinguleĸarpoĸ. tamána ugpernarsautigssanut sujuligtũmit ássersûtigssanitdlo sarĸúmiúneĸartunut nalerĸúpoĸ. ugpernarsautit aulajaitsumik ugperineĸarput, ugpertutdlo tûsintilíkûtât "únuap ĸiterarnerane" suaortalerput.

eĸêrsainerup tamatuma nuna maligssuartut ingerdlaorfigâ. igdloĸarfingnit igdloĸarfingnut igdloĸarfigssuarnitdlo igdloĸarfigssuarnut kîsalo nunáinarme nunaĸarfêránguanut avíngarusimassunut ingerdlaorpoĸ, kîsalo Gûtip ínugtai eĸêrdluarput. eĸêrsainerme tamatumane ingassáussineĸ kanernertut seĸernup nuilernerane nungútarneratut pêrutivigpoĸ. ugpertut ĸularungnaerdlutigdlo angnikitdliorungnaerput, ũmatimíkutdlo neriugdlutigdlo sujôrajungnaerput. eĸêrsaineĸ tamána ingassáussinermik Gûtip oĸausia anersâvatalo súnînera amigautautitdlugit tákutíngitsũsángitsumik ilaĸangitdluínarpoĸ. píssutsimigut Gûtip kivfaisa israilíkutorĸane oĸaorĸigsârinermíkut manigũtumik Nâlagkamut ilãníkut sâgtitsissarneránut erĸainarpoĸ. ĸanoĸ ilissúkutdlũnît Gûtip sulineranik ilisarnaĸuteĸarpoĸ. nipitûmik nuánârtorssuaĸángilaĸ, kisiáne ũmatimíkut misigssuerĸigsârneĸarpoĸ, ajortinik navsuerneĸarpoĸ, silamiorpalungnermigdlo asigínaineĸardlune. akiûtdlutik ĸinussut nangmagât tássa Nâlagaĸ nâpísavdlugo piarêrsarneĸ. ĸinunermingne aulajaitdlutik Gûtimut túniúsimavdluínarput.

apustilit uvdluinit ugperissagssarsiorníkut angnertûmik eĸêrsainerne tamane ukiákut 1844-me eĸêrsaineĸ inuit nãmángíssusiánik Sãtanivdlo perĸusersiorneranik ilaĸángínerpausimavoĸ.

suaorut tutsiungmat: "uvigssaĸ aggerpoĸ, pâriartorsiuk!" iterdlutik "ĸutdlitik iluarsivait"; Gûtivdlo oĸausia aitsât taima soĸutigivdluartigalugo misigssortigilerpât. íngilit ĸilangmit autdlartitáuput nikalersimassut eĸêrsariartorĸuvdlugit nalunaerutdlo ilagserĸuvdlugo. suliniarneĸ tamána inûp ilisimatússusianut pínane Gûtip píssauneranut túngavoĸ.

taimane ugperneĸarpoĸ ĸinussup akíssutisíssutigissartagânik

ugpernermik kajumigsautisinigssamik isumavdluartumik. sôrdlo sialuit nunamut parĸersimassumut torartartut, taimatut Anersâp iluartup ilumôrdlutik ujardlersut aterfigai. utertitsissimik kînânik katsorna takussaĸásangassut tipaitsungnermik oĸalugtuarissagssáungitsumik misigíput. Anersâp iluartup sáimarsaissumik píssaunerata ũmatit súnerpai pivdluarĸússutine ilumôrtunut ugpertunutdlo pivdluarĸússutigigamiuk.

nalunaerúmik ilagsingnigsimassut pivfigssaĸ Nâlagaĸ nâpísavdlugo neriugfigissartik mianerssordlutik ĸanigdliartorpât. uvdlãkut iterângamik sagdliutitdlugo nalorninaitsumik pâsiniartarpât Gûtip ilagsisimagâtik. ũmatimíkut atausioĸatigîgdluarput, ĸinoĸatigîgtaĸalutigdlo ĸínússeĸatigîngârtarput. nâpeĸatigîgfigssane kiserdliornartune nâpeĸatigîgtarput Gûte oĸaloĸatigiartordlugo, narssautinitdlo orpigpalingnitdlo nipit tusarssaussarput ĸínutinik ĸilangmut pavungnartitsissut. táukúnunga ánáussissup iluaringningnera uvdlormut inũssutigssanit pissariaĸarneruvoĸ, isumamíkutdlo nikatdlorsautigssaĸalerunik pêrneĸartinago erĸigsiumaneĸ ajorput. isumákêrfigineĸarnerup sáimautânik nalunaerut pigigângamíko tarnimíkut asassartik takúsavdlugo erinigissarpât.

kisiáne sule atausiardlutik pakatserĸigtugssausimáput. uvdlut utarĸivfît ingerdláput, ánáussissordlo tikiutíngilaĸ. tikiúnigssâ aulajaitsumik tatigalugo ĸilanârisimavât, mãnalo misigíput sôrdlo Mâria misigissoĸ ánáussissup ilerfa imaĸángitsoĸ tikitdlugo oĸarame: "nâlagara autdlarúsimavât, sumutdlo ilinerât naluvara." (Juán. 20, 13).

silamiut ugpíngitsut sivisujâmik ánilângangârneĸ kigaitdlagsautigisimavât, nalunaerut taimáikaluartoĸ ímaĸa ilumôrsínausorigamíko. píssusiussoĸ tamána pivfigssaĸ ĸângiúkaluarmat ernĩnaĸ atorungnáingilaĸ. pakatsisimassut angneruniarfigísavdlugit sule sapîserneĸ saperatdlarput, kisiáne Gûtip kamangnerata nalunaeĸutânik tákútoĸángeriarmat ánilângasimanertik ajugauvfigalugo mitautigingnigtalerdlutigdlo ilârutigdlîssalerĸigput. inugpagssuit Nâlagkap tikiuterĸingnigssânik ugperissaĸartutut navsuersimassut ugperissaraluartik narrugilerpât. ĸularutigissaĸángínermingne aulajaitdluínarsimassut ilaisa tugdlûsimâraluarnermingne pakatsingârsimagamik silarssuaĸ ĸimagsínaujumavdlugo kigsautigigaluarpât. Jûnarsisut Gûte únerdlûtigât toĸulo inûnigssamit kigsautigineruvdlugo. ugpernermingne inuit avdlat isumáinik túngaveĸarsimassut Gûtivdlo oĸausia túngaviginago, mãnákut isúmatik avdlángorterĸísavdlugit taimatut piarêrsimatigíput. ilârutigdlîssut sángîtsut ánilângatûtdlo isumaĸatigssarsiarait. tamákulo tamarmik isumaĸatigîgdlutik oĸalugput matuma kingorna ánilângassariaĸásananilo isumavdluartariaĸásángitsoĸ. pivfigssaĸ ĸângiúsimavoĸ, Nâlagaĸ tikiúsimángilaĸ, silarssuardlo ímaĸa ukiune tûsintilingne ardlalingne táunaujuásaoĸ.

ilumôrdlutik ugperdluartut Kristuse pivdlugo sût tamaisa isumákêrsimavait najuineralo sujornatigut súkutdlũnît angnerussumik malugisimavdlugo. silamiut naggámêrutaussumik mianerssorĸusimavait, ajoĸersuissertigdlo ĸilangmiussoĸ íngilîlo piârtumik ilagilísasoralugit nalunaerúmik ilagsingnigkumangitsut angnertûmik tunuarfigisimavait. erinisungârdlutik ĸinusimáput: "ĸaigina, Nâlagaĸ Jîsuse-â, piârtumik ĸaigina!" tikiúsimángilardie. kingumutdlo inûnerme isumakulûtit nanertûtait erssugkiuterĸigdlugit mãna silamiut mitautigingningnerat nikagingningneratdlo nãmagigtarnermingnut ugpernermingnutdlo ánilârnartumik misiligutitut atortariaĸarpait.

taimáitordle 1844-me pakatsineĸ ajoĸersugkat Kristusip sujugdlermik tikiúnerane pakatsinerátut artornartigerĸajángilaĸ. Jîsuse ajugauvdiune Jerûsalâmut iseriartormat isumaĸatai isumaĸaraluarput Dâvip igsiavíssârssua ingivfigalugo israilíkut ĸunutitauneránit aniguisinialísagai. isumavdluaĸalutik ĸilanâĸalutigdlo kúngertik atarĸiniarpât. ĸavsît ĸâtigûtik avĸusinermut tungmagagssatut iliorĸarpait, ilaisaio palmit avaleĸutait pilutartût avĸutigssânut iliorarpait, tipaitsungnermingnilo peĸatigîgdlutik tordlulavfigât: "hosanna Dâvip ernera!" farisîaritdlo nuánângârneĸ tamána mamiatsautigalugo Jîsusip ajoĸersugkane inertísagai kigsautigingmássuk Jîsusip akivai: "uko nipangeraluarpata ujarĸat nivdlísáput." (Lúk. 19, 40). sujuligtût erĸûtítariaĸarsimavoĸ. ajoĸersugkat Gûtip sujunertarissâ nãmagsivât; taimáikaluartoĸ uggornartumik pakatsissugssausimáput. uvdiut ardlaĸángitsuínait ĸângiúnerisigut ánáussissup ániardiune toĸunera issigalugo ilivermut ilivât. isumavdlûtigissait ingmíkôrtúkut atautsíkutdlũnît erĸûtíneĸángitdlat, neriûtaisaio Jîsuse toĸoĸatigât. Nâlagartik ajugauvdlune ilivermit makerêrmat sût tamarmik sujuligtûtikut sujuligtûtigineĸarsimanerat aitsât pâsisínãngorpât pâsivdlugulo "Kristuse ániarsimásassoĸ toĸussunitdlo makísavdlune". (ap. sul. 17,3).

ukiut 500 tamatuma sujorna Nâlagaĸ pruvfîtíkut Saggariákut oĸarsimavoĸ: "ĸîmasungârit, Sîunip pania ûmâ, tipaitsungârit, Jerusalâp pania ûmâ; takuvat, kúngivit ornigpâtit iluartup ajugaussup ĸanilârdiunilo; siutitôĸ ĸimugserfigâ, siutitôĸ ĸimugtugssarigsoĸ ĸimugtigingnerup ernera." (Sagg. 9, 9). ajoĸersugkat Kristusip erĸartũneĸarnigssane toĸutaunigssanilo ornigkâ pâsisimagaluaruníko sujuligtût tamána erĸûtíneĸ sapersimásagaluarpât.

taimatútaoĸ Millerip suleĸataisalo sujuligtût erĸûtípât nalunaerutdlo Gûtip anersâvata silamiunut sarĸúmiúneĸartugssatut sujuligtûtigisimassâ nalunaiautigalugo, tamánalo nalunaiautigineĸ sapersimásagaluarpât sujuligtûtit pakatsinigssamingnik uparuartuivdiutigdlo nalunaerúmik avdlamik Nâlagaĸ tikiútínago inuiaĸatigîngnut tamanut nalunaiautigineĸartugssamik sarĸúmiússaĸartut nãmagtumik pâsisimagaluaruníkik. íngilit nalunaerutât sujugdleĸ áipâtdlo pivfigsssĸ erĸordlugo nalunaerutigineĸarput, nalunaerutitdlo táukua Gûtip sujunertarissâ nãmagsivât.

silamiut issigingnârtûsimáput, pivfigssardlo ĸângiugpat Kristusilo tikiutíngigpat, tauva adventisiorneĸ taimaitíneĸavísassoĸ ilimasugsimáput. naugdle ĸavsît ússernartorsiortitaungârdlutik ugperissartik ĸimákaluarât, taimáitordle aulajaitsunik ilaĸarput. adventisiornerup inerititai - manigũtumik ũmatinigdlo misigssuissumik anersâĸarneĸ suliniarnerme ingerdlaĸatausimassoĸ - Gûtimit pisimanera nalunaerutigâ. Anersâp iluartup Kristusip tikiuterĸingnigssânik nalunaiaeĸatausimanera silamiut miserratigineĸ saperpât, pruvfîtitdlo pivfigssanik sujuligtûtáinik nautsorssuisimanerme kúkunermik nanissaĸarneĸ saperput. agssortuissut píkoringnerit pruvfîtisut navsuiaineráne periausiat narrugissagssángortíneĸ sapersimavât. bîbilime najorĸutagssaĸartínatik isúmat ĸinuníkut ilungersordiutigdlo agdlagkanik iluartunik misigssuiníkut tikísimassatik narrugineĸ saperpait - isúmat sákortunerpâmik angutinit silamiorpalugtumik ilisimatûnit ugperissagssamigdlo oĸalũssissartunit agssuarineĸaraluardlutik avdlángortitagssausimángitsut ilisimatûtdlo oĸatdlorigsutdlo peĸatigîgdlutik agssuaringningneráne akimassutdlo nikanartutdlo nikagingningneráne nikisitagssáungitsumik aulajáisimassut.

pisimassugssaĸ ilimagineĸartoĸ pivdlugo paitsôrsimanerat ilumôraluarpoĸ, kisiáne tamatumalũnît Gûtip oĸausianut ugpernerat aulalersísínáungilâ. Jûnarsip Ninivip avĸusernisigut angaiaordlune igdloĸarfigssûp uvdlut 40 ĸângiunerisigut piunêrúneĸarnigssâ nalunaiautigingmago Gûtip Ninivimiut manigũnerat ilagsivâ misiligauvfigssâtdlo sivitsordlugo; kisiáne taimáikaluartoĸ Jûnarsip nalunaerutâ Gûtimit pissûvoĸ, Ninivilo misilingneĸarpoĸ Nâlagkap piumassâ nâpertordlugo. adventisiortut isumaĸarput Gûtip taimatútaoĸ sujulerssorsimagâtik erĸartũssutigssamik mianerssorĸússut nalunaiautigerĸuvdlugo.

Gûtip ínugtane ĸimángilai; anersâvata ĸáumarĸúmik pigssarsiarisimassamingnik mianerssuaitdlutik narrugingníngitsut adventisiornermigdlo agssuaringníngitsut najortuarpai. Eprîarinut agdlagkane ajornartorsiorfingme tamatumane misiligaussunut ĸĩmagsautaussumik mianerssorĸússutaussumigdlo oĸauseĸarpoĸ: "taimáitumik sujôrángíssuserse iperaĸinasiuk, akeĸangârumârmat. ilalârnerme ilivsínut atoriaĸarpoĸ, Gûtip perĸussâ nãmagsisimavdlugo únersûtigissaĸ pigilerĸuvdlusiuk; ĸilánguamingme aggersugssaĸ aggerumârpoĸ mulúsananilo. iluartordle ugperníkut inũsavoĸ; nigorpatdle tarnima nuánarísángilâ. uvagutdle nigortut támarumârtut ilagíngilavut, ugpertutdle tarnimíkut ánagkumârtut ilagâtigut." (Epr. 10, 35-39).

oĸaorĸigsârutip tamatuma uvdlune kingugdlerne ilagîngnut túnganera oĸautsinit Nâlagkap piârtumik tikiúnigssânik uparuartuissunit ersserĸigsumik takugssauvoĸ: "ĸilánguamingme aggersugssaĸ aggerumârpoĸ mulúsananilo." kinguartitsissûssârnerdlo Nâlagkavdlo mulussutut ínigssâ ersserĸigsumik uparuarneĸarpoĸ. ajoĸersuineĸ tamána adventisiortut taimaníkut misiligtagáinut pingârtumik nalerĸútûvoĸ. ínugtaussut ajoĸersûtigissamut atassut ugperníkut ítumik navianartorsiorput. Gûtip piumassânik iliorsimáput, oĸautsip Anersâvdlo ajoĸersuinerátut iliorníkut, kisiáne misiligtagkatik pivdlugit Gûtip sujunertarissâ pâsineĸ sapersimavât, avĸutigssaĸ sujunimingnĩtoĸ takuneĸ sapersimavât, ilumutdlo Gûtimit tasiorneĸarsimanertik ĸularísavdlugo ússernartorsiorput. mãna oĸautsit máko atorfigssaĸalerput: "iluartordle ugperníkut inũsavoĸ." únuap ĸiterarnerane suaorneĸ avĸutigissamingnik ĸáumarsautitdlugulusôĸ sujuligtûtitdlo naĸíssutãnik angmaineĸ issigingnârtitdlugo nalunaeĸutitdlo Kristusip tikiúnigssâta ĸanigdlineranik takutitsissut pilertortumik erĸûtíneĸartitdlugit issigissutut ingerdlasimáput. mãnale neriûtigissaraluamingnik pakatsinermit nikatdlungavdlutik Gûtimut oĸausianutdlo ugpernermingne aulajaigínarsínáuput. silamiut mítatigdlîssut oĸarput: "sagdloĸítagauvuse. ugperissarse tunúsiuk oĸardlusilo adventisiorneĸ Sãtanimit pissûsimassoĸ!" Gûtivdle oĸausia tutsiúpoĸ: "nigorpatdle tarnima nuánarísángilâ." mãnákut ugperissaĸ nigúsavdlugo Anersâvdlo iluartup píssaunera narrugísavdlugo tássáusagaluarpoĸ aserugaunigssamut tunuarneĸ. Paulusip oĸausiata aulajáinigssamut kajumigsârpai: "taimáitumik sujôrángíssuserse iperaĸinasiuk." ilalârneĸ ilivsínut atoriaĸarpoĸ." "ĸilánguamingme aggersugssaĸ aggerumârpoĸ mulúsananilo." isumangnaitsumik iliûsigssât tássa ĸáumarĸutigssaĸ Gûtimit pigssarsiarerîgartik pigĩnásavdlugo, neriorssûtigissai aulajangerfigalugit, agdlagkat iluartut misigssortuásavdlugit, utarĸivdlutigdlo nãmagigtartumik pigãsavdlutik ĸáumarĸutigssamik angnerussumik tunineĸarnigssartik utarĸivdlugo.