kinguârît neriûtât

"akerarîgsíkumârpavsilo ivdlitdlo arnardlo, ivdlit kinguâgssat táussumalo kinguâgssâ; táussuma niarĸut aserortísavâ, ivdlitdle kingmia aserorterumârpat." (1 Môrs. 3, 15) Sãtanimik erĸartũssut Gûtip inuit ordlorêrnerisigut erĸartũssutigissâ sujuligtûtauvortaoĸ kinguârît tamaisa pivdlugit, tássûnalo akiũnigssarssuaĸ kinguârît nunamiut tamarmik ilauvfigissagssât erĸartutsiarneĸarpoĸ.

Gûte oĸarpoĸ: "akerarîgsíkumârpavse." akerarîngneĸ tamána isumaminik pilersugssáungíkaluarpoĸ. inuit Gûtip inatsisâ uniorĸutíkamíko píssusiat ajortúngorpoĸ, Sãtanilo akerarilernago isumaĸatigilerpât. ajortuliortoĸ ajortuliortitsissordlo píssutsimíkut akerarĩngitdlat; ordluníkut tamarmik ajortúngorput. tunússissoĸ erĸigsinaviángilaĸ maligagssiuinermigut inoĸatine tunússilersíngíkunigit. tamána píssutigalugo íngilit ordlusimassut inuitdlo gûtîtsut tamaviârdlutik iligîlersarput. Gûte ingmíkut ítumik akúnermiuliúsimángíkaluarpat Sãtane inuitdlo ĸilangmiunut akerĸatut iligîlersimásagaluarput, taimalo pissoĸarsimagaluarpat inuiait Sãtane akerarinago Gûtimut pikigtitsisimasagaluarput.

ajortup inuit ajortuliornigssamut ússerpai, sôrdlo íngilit pikigtitsinigssamut ússersimagine, taimailiornermigut Gûtimut akiũnermine iligssarsiorumavdlune. Sãtane íngilitdlo ordlusimassut kristumiunik ûmigssuinermingne akerarĩssuteĸángitdlat; avdlatigut tamatigut isumaĸatigĩngíssuteĸaraluardlutik ajugaĸángitsup nâlagáussusianut agssortuinermingne aulajaitdlutik iligîgput. kisiáne Sãtanip tusaramiuk Gûtip arnardlo akerarîgsikumagâtik. kinguâgssanilo táussumalo kinguâgssai akerarîgsíkumagai, tauva pâsivâ inuit aserorsarniardlugit akornutigssarsiumârdlune, pâsivâlo inuit ingminut agssortuisínãngortitaujumârtut.

Sãtanip inuit ûmigai Kristusíkut Gûtimit asaneĸardlutigdlo sáimáuneĸarmata. Gûtip sujunertarissâ akornusersorumavâ inuit utertitaorĸunagit. ĸilangmiut aliasugtikumavai nunamiutdlo nâgdliugtíkumavdlugit aserorterumavdlugitdlo. ajortutdlo tamíko tamaisa tássaunerarpai Gûtip inungnik píngortitsinerata kingunerissai.

inungme Sãtanimut akerarîlersitsissoĸ tássa sáimáuneĸ Kristusip tarníkut íkutâ. píssauneĸ nutãngortitsissoĸ sáimáuneĸarnerdlo tamána sângniarnermik kinguneĸartoĸ piginngo inuit Sãtanimit inugsiautigineĸartuásagaluarput táussumúngalo kivfartũssinigssamut piarêrsimajuásagaluardlutik. tarníkutdle najorĸutagssap tamatuma erĸigsisimavfiugaluartoĸ agssortuivfíngortípâ. píssaunerup Jîsusip túniússâta inuk angutausersumut píssaunermigdlo tigdlingniartumut akiũsínãngortípâ. kialũnît ajortuliornermik nuánarissaĸarnane narrugingnigtup, ilumigut pileritsassutsinut nâlagarissaraluaminut ajugauvfigissaĸartup, táussuma najorĸutagssap ĸutsigsumit pissup kingunere sarĸúmersítarpai.

Kristusip anersâvata Sãtanivdlo anersâvata akerarĩssusiat ersserĸivigsumik takutíneĸarpoĸ Jîsusip silamiunit ilagsineĸarneragut. Jûtit narrugigamiko píssutigissât tássaunerúngilaĸ Jîsusip nunamiutut nâlangnauteĸarnane pigigsârnanilo tákúnera. píssaunermik tamákunanit tamanit pingârnerungârtumik ilumiugissaĸarnera takuvât. kisiáne minguíssusiata iluássusiatalo gûtîtsut Kristusimik ûmigssuilersípai. nangminigssarsiujuíssusia Gûtimutdlo túniutdluínarsimanera inuiangnut tugdlûsimârdlutigdlo pileríssuseĸangârtunut navêrsitsíssutauvoĸ. tamána tássauvoĸ Gûtip erneranut akerartuilersitsissoĸ. Sãtanip íngilipiluitdlo inuit iligssarsiarait. tunússinerssûp píssaunerisa tamarmik peĸatigîgdlutik sagdlusuíssúmik oĸariartortoĸ akerartorpât.

ajoĸersuissup akerartorneĸarneratut taimatútaoĸ kivfai akerartorneĸarput. kinalũnît ajortuliap narrunartumik píssusianik pâsingnigtoĸ ilumut Sãtanip ínugtaisalo kamáukumârpât. sagdlusuíssutip minguitsumik najorĸutagssainut ûmigssuineĸ ilungersûtigingnigtuinigdlo narrugingningneĸ ĸinugingningnerdlo ajorteĸartitdlugo ajortuliortoĸartitdlugulo atajuásáput. Kristusip isumaĸatai Sãtanivdlo kivfai isumaĸatigîgsínáungitdlat. sáningassugdlip mamianautâ sule ĸângiutingilaĸ. "Kristuse Jîsusime Gûte mianeralugo inûjumassut tamarmik ĸinugineĸásáput." (2 Tim. 3, 12).

Diâvulup akiũtugssane tamaisa katerssorpai píssauninilo tamât akiûtdlune. sôĸ sákortunerussumik akiorneĸángila? sôĸ Kristusip sákutûe taima eĸêrsimángrtsigalutigdlo ilatsĩnartigaut? tássa Kristusimut piviussumik atássuteĸángípatdlâĸigamik táussumalo anersâvanik peĸángípatdlâĸigamik. táukua ajortuliorneĸ ajoĸersuissirnigtut narrugitiginagulo maujugitigíngilât. Kristusitut aulajaitsigíngitdlat akiũnermingne. ajortuliornerup ajordluínássusia pâsíngiltât, píssauneritdlo târmiussut píssusê píssauneĸássusiatdlo tagpîtdliorfigait. Sãtane suliailo angnikitsuínarmik akerarineĸarput píssauneĸarnera sujunertarissapiluilo Kristusimutdlo ilagîgsortainutdlo akiũnerata angnertússusia ilisimaneĸángípatdlâĸingmata. inugparujugssuit tássûna támartitaussarput. naluvât akerartik sákutûnut nâlagarssûngmat íngilipiluit nâlagarissât, naluvâtdlo pilerssârutit isumaliutigerĸigsâgkat nâpertordlugit Kristuse sorssugfigingmago tarnigdlit ánáuneĸarnigssât akornusersorniardlugo. kristumiunik taissartune, agdlâtdlo îvangkîliumik oĸalũssissartune Sãtanip erĸartorneĸarnera tusarssáungingajagpoĸ, oĸalugtarfingmit nalautsortumik erĸartorneĸatsiartarnera píngíkáine. suliuarneranik sujumukarneranigdlo ugpernarsautaussut ĸarssupigpait; perĸusersusârnerata mianerssorĸússutigineĸarnera sianigíngilât, agdlâtdlo Diâvuloĸarnera sianigingitsutut ípât.

ajortup Gûtip ĸitornai ajugauvfiginiartuarpai silamiunut avigsârutainik aserorterinikut. Israilikut ússerneĸardlutik ajortuliortitáuput Gûtimik nalussut uniorĸutitsiníkut akuliuvfigigamíkik. taimatútaoĸ nalivtíne Israilíkûssut támartíniagáuput. "táukunane ugpíngitsut isumait silap matuma Gûtiata tagpîtdlisípai, Kristusip tássa Gûtip ássingata nâlangnássusianik îvangkîliup ĸaumangârnera táukunúnga ĸaumarĸunago." (2 Kor. 4, 4).

silamiut ilerĸuinik íssuainíkut ilagît silamiunut sâgtitaussarput, kisiáne silamiut Kristusimut sâgtíngisáinarpait. ajortuliornermut ĸanigdlugo atássuteĸaráine píngitsôrane maujungnángínerussutut issíkoĸalísaoĸ. Sãtanip kivfainut akuliútartut katsorna nâlagât sujôragiungnaerumârpât. suliagssarititaussunik suliniartitdluta angnikitdliortitauguvta, sôrdlo Dâniale kúngip igdlorssuane misiligaussoĸ, tauva Gûtip sernigísagâtigut ĸularísángilarput; kisiáne nangminêrdluta ússernartorsiorniaruvta sujusingnerussúkut kingusingnerussúkutdlũnît ordlujumârpugut.

ússîssoĸ suligajugtarpoĸ kivfamisut pasinángínerussut avĸutigalugit. pigínauneĸardlutigdlo ilisimatûssut atarĸineĸartarput, uvfa píssutsit taimáitut Gûtimik mianeringningnermut taortausínáungíkaluartut inûvdlo tamáko Nâlagkamit iluarineĸautigisínáungíkaluarai. perorsagauvdluarneĸ pigínauneĸarnerdlo Gûtimit tuníssutisiáuput, kisiáne tamáko Gûtimik mianeringningnermut taorsiúneĸarângamik, tarneĸ Gûtimut ĸanigdliartortínago Gûtimit ungasigdliartortitsigângamik, tauva támartitsissúngordlutigdlo perdlorĸússutíngortarput. ĸavsît isumaĸartarput sût perorsagauvdluarnermut inugsiarnernermutdlo atássuteĸartut tamarmik Kristusimut atássuteĸarsoralugit. angnertunerussumik kukussoĸarsimángisáinarpoĸ. tássame kristumiûvdluartup kialũnît tamáko ilisarnaĸutigissariaĸaraluarpai, kristumiûvdluássutsimut iluaĸutaungãsangmata, kisiáne Gûtip atarĸinautigssâtut atortariaĸarput, taimailiúngíkáinime ajortuliortautsip sákugilersínauvai.

Sãtanip kristumiut píssusiviussunut tagpîtdlisiniartuarpai, taimáitumigdlo puigúngisáinartariaĸarpât "auk uvinigdlo" pâniagagssaríngínamíkik, "sujulerssuissutdle nâlagkersuissutdlo târssûvdlo matuma píssauniligssue anersâtdlo ajortut ĸilaup atâne." kajumigsautaussumik mianerssorĸússut ukiut huntritiligpogssuit ingerdlaneráne nalerput tikitdlugo tutsiútarpoĸ: "putumatsailivdlusilo erĸumagitse, akerartorterse Diâvulo lîuvertut uiánissârtutut angalassarmat îssagssarsiordlune." "sákutũssutit tamaisa Gûtip pê atiniarsigik Diâvulup ĸoĸagssiniarângase aulajáisínaorĸuvdluse." (Evf. 6, 12; 1 Pîtr. 5, 8; Evf. 6, 11).

Adamip nalânit mána tikitdlugo akerarssuarput píssaunine taillât atordlugo ĸunutitsiniardlunilo aserorteriniarsimavoĸ. mãna ilagît naggámik sorssugfigerujugssuarumavdlugit piarêrsarpoĸ. Jîsusimik malingnigkumassut tamarmik akerarssuaĸ táuna sorssugfigiumârpât. kristumioĸ píssutsimigut Gûtimut ĸanigdliartortitdlugo Sãtanimit sãssúneĸarnigssâ ĸularissagssaujungnaeriartortugssauvoĸ. kíkut Gûtip suliagssarititainik suleĸataujumavdlutik ajortup sagdloĸítaineranik nalujungnaersitsiumassut Kristusilo inungnut sarĸúmersíkumavdlugo tamarmik Paulusip navsuerutâ isumaĸatigiumásavât, oĸarmat Nâlagaĸ kivfartorfigiumavdlugo nikanartitdlune ĸuvdlilissardlunilo ĸinugineĸartitdlunilo. (ap. sul. 20. 19).

Sãtanip Kristuse tamaviâvigdlune ĸoĸagssiniaraluarpâ, tamatigordluínaĸ saperssisitauvdlune. akiũnerit tamáko uvagut sivnerdluta akiũssutigineĸarput, ajugaussarneritdlo tamáko túngavigalugit ajugausínautitauvugut. píssaunermik ujardlersut tamaisa Kristusip tuniumásavai. kinalũnît nangmineĸ akuerssitínane ajortumit ajugauvfigineĸarsínáungilaĸ. ússîssoĸ píssauneĸartitáungilaĸ piumássuseĸ nâlagkersúsavdlugo tarniligdlũnît ajortuliornigssamut píngitsailísavdlugo. nâgdliugtitsisínauvoĸ, kisiáne narrunarsaisínáungilaĸ, tarníkut aliatsagtitsisínauvoĸ, kisiáne mingugtũngortitsisínáungilaĸ Kristuse ajugausimangmat ajoĸersugai ĸunusuitdlutik ajortuliornermut Diâvulumutdlo sapîtdlutik akiũtariaĸarput.