akiũnerssuaĸ kapitel 31. Fra side 261tilbage

támartitsináissúaĸ sujugdleĸ

píngortitsinerup kingunínguagut Sãtanip inuit támartínialerêrpai. najugagssaĸ alianaitsoĸ áiparîngnut pissũssuteĸángitsunut iluarsáuneĸarsimassoĸ takuvdlugo Sãtanip síngagilerpai. aulajangerpoĸ ordlutíkumavdlugit, Gûtimit avigsârterêrunigit nangminerdlo nâlagauvfigilerêrunigit nuna pigssarsiariumavdlugo tássanilo ĸutsingneruvsârtup akerâtut nâlagauvfine pilersíkumavdlugo.

Sãtane kináussutse issertornago savssarsimagaluarune itigarsimásagaluarpoĸ; Adamime Evalo akeraĸ sujâranartoĸ pivdlugo mianerssorĸuneĸarêrsimáput; kisiáne târtume sulivoĸ sujunertarissanilo issertorpâ anguniagkane kinguneĸarnerussumik anggsínaujumavdlugo. ikiortigssamisut pulateriârssuk atorpâ, taimanikut ûmassûssoĸ pínerdluínartoĸ, Evalo sâgfigalugo oĸarfigâ:

"ilumut Gûte oĸaraluarnersoĸ: nautsîviup orpê nalingínait nerivfigísángilase?" (1 Môrs. 3, 1). Evap ússîssoĸ oĸaloĸatigilersimángíkaluaruniuk navianartorsiortitausimásángíkaluarpoĸ; kisiáne sapîserdlune oĸalugfigâ perĸusersusârneragutdlo ordlutitauvdlune. taimailiorníkut ajugauvfigineĸartut sule amerdlassaĸaut. ĸularneĸ túniuvfigalugo Gûtip perĸussai oĸaloĸatigĩssutigilersarpait, Gûtivdlo inássutai nâlásagaluardlugit inuit isumaliûtait tássaugínartut akerĸap ússîniutai ilagsissarpait.

"arnap tauva pulateriârssuk oĸarfigâ: nautsîviup orpîsa paormainik nerissarpugut, kisiáne orpiup nautsîviup ĸerĸanĩtup paormai pivdlugit Gûte oĸarpoĸ: nerivfigísángilarse, agtornagulũnît agdlât toĸoĸinavuse. tauva pulateriârssuk arnamut oĸarpoĸ: nâme toĸúsángilase; kisiáne Gûte nalúngilaĸ nerivfigigaluaruvsiuk issise uisitaujumârtut, Gûtisutdlo ilerumârtuse, ajúngitsordlo ajortordlo sianigalugo." (1 Môrs. 3, 2-5). oĸarpoĸ Gûte ássigilerumârât, ilisimatunerulerumârtut akimanerussumigdlo inûseĸalerumârdlutik. Eva ússerneĸarame ordluvoĸ, táussumalo súnîneragut Adame ajortuliortitauvoĸ. pulateriârssûp oĸausia ugperât oĸarmat Gûtip oĸauserissane ilumôrutíngfkâ. píngortitsissoĸ tatigalugo kivfáungíssutsimingnik kigdlilînasugât, isumaliorputdlo inássutâ uniorĸutíkuniko ilisimanerulersínáusavdlutigdlo akimanerulersínáusavdlutik.

Adamivdle ordlorêrame oĸautsit uko ĸanoĸ isumaĸartínerpai: nerivfigigaluarugko toĸumik toĸúsautit”? pâsinerpâ Sãtanip oĸarneratut akimanerussumik inûseĸalersimavdlune? taimáisimagaluarpat uniorĸutitsinermigut ilumut iluanârsimásagaluaĸaoĸ, Sãtanilo inungnut iluaĸusersuissutut takutísimásagaluarpoĸ. Adamivdle Gûtir erĸartũssutâta kingunera taimatut misígingilâ. Gûte oĸarpoĸ inuk ajortuliorsimanerminut pitdlautigssatut kingumut ivssúngúsassoĸ: "mássa ivssûvutit, ivssúngúsavdlutitdlo kingumut." (1 Môrs. 3, 19). Sãtanip oĸausia: issise uisitáusáput, uvgûnáinaĸ erĸûtíneĸarput: Adame Evalo nâlángerêramik issait uisitáuput, taimalo sianîtdliorsimanertik takusinãngorpât. mãna ajortoĸ ilumut ilisarât, uniorĸutitsineruvdlo paormâ sungarnitsoĸ tamússerfigât.

Gûtip nautsîviata ĸerĸanĩpoĸ orpik inûnartumik paormalik. Adame nâlagtuarsimagaluarune orpik táuna piumassaminik ornigtarsínausimásagaluarpâ nâgssáungitsumigdlo inûsínausimásagaluardlune. kisiáne ajortuliarêrame orpingmit inûnartumit nererĸussaujungnaerpoĸ toĸussugssángortitauvdlunilo. oĸautsip "ivssûvutit, ivssúngúsavdlutitdlo kingumut" inũssutip ĸamititauvdluínarnigssâpivâ.

toĸujuíssusigssaĸ inungnut neriorssûtigineĸarpoĸ nâlagkumagpata, kisiáne uniorĸutitsiníkut ánaivât. Adamip kinguâne nangmineĸ pigíngisaminik pigssaĸartíneĸ saperpai, inuitdlo neriûtigssaĸarsimásángíkaluarput Gûtip ernine túniutdlugo toĸusuíssusermik pigssarsinigssât ajornarungnaersísimángíkaluarpago. "sôrdlo inúkut atausiussúkut ajorte silarssuarmut tikiútoĸ ajortíkutdlo toĸo tikiutdlune, tamarmik ajortuliormata," taimatut Kristusip "inũssut aserujuissutdlo îvangkîliúkut ĸaumassumut pisípai." toĸujuíssuserdlo Kristusikuínaĸ anguneĸarsínauvoĸ. Jîsuse oĸarpoĸ: "ernermut ugpertoĸ nâgssáungitsumik inãssuteĸarpoĸ; ernermutdle nâlagserîtsup inũssut takúsángilâ." kialũnît pivdluarĸussut nãligssaĸangítsoĸ tamána pigssarsiarisínauvâ, piumassarineĸartut nãmagsiumagunigítaoĸ. imáitut "ajúngitsuliornermíkut nikatdlujuitdlutik nâlangnáumik atarĸináumigdlo aserujuíssúmigdlo piniartut" táukua "inûneĸ nâgssáungitsoĸ piumârpât". (Rûm. 5, 12; 2 Tim. 1, 10; Juán. 3, 36; Rûm. 2, 7).

Adamip nâlángitsumik inûnigssamik isumavdlûtigssatuâ tássa ússîssorssuaĸ; pulateriârssûvdlo Gûtip nautsîviane Evamut oĸausia: "nâme toĸúsángilase," tássauvoĸ tarnip toĸusuíssusianik oĸalũssíssutit sujugdlersât. kisiáne neriorssût Sãtanip aulajangîsínaunerínavianik túngaveĸartoĸ tamána kristumiut oĸalugtarfînit akisuavoĸ, sôrdlulo autdlarĸautâne Adamip Evavdlo ilagsivdluarât, taimatútaoĸ inuit amerdlanerssaisa ilagsivdluartarpât. Gûtip aulajangigkamisut oĸautigissâ: "tarnilik nalingínaĸ ajortuliartoĸ toĸúsavoĸ" (Hisk. 18, 20). ima navsuiarneĸartarpoĸ: "tarnilik ajortuliortoĸ toĸúsángilaĸ, nâgssáungitsumigdle inũsavoĸ. serraneĸ tupingnartoĸ inungnik Sãtanip oĸausianut ugpiassúngortitsissoĸ Gûtivdlo oĸausianut ugpíngitsúngortitsissoĸ tupigusûtigíngitsôrsínáungilarput.

inuit ordlorêrsimavdlutik inûnartup orpianut akornutigssaĸaratik ornigútuarsínaujuarsimagaluarunik nâgssáungitsumik inûsimásagaluarput, taimatutdlo ajorte toĸusuitsúngorsimásagaluarpoĸ. kisiáne "orpingmut inûnartumut avĸut" (1 Môrs. 3, 24). kêrupinit panalingnit pârititauvoĸ, Adamivdlo kinguâvinit atauserdlũnît akuerineĸarsimángilaĸ kigdligerĸussaĸ tamána ĸângerdlugo inûnartumik paormartorĸussaunigssamut. taimáitumik toĸusuitsumik atautsimigdlũnît ajortuliortoĸángilaĸ.

ordlorêrsimaneruvdle kingornagut Sãtanip íngiline perĸuvai inuit toĸusuíssúmik inúngûserissaĸarneránik ugperissaĸ ajoĸersûtigerĸuvdlugo, inuitdlo támarnartoĸ tamána ilagserêrpássuk isumaĸalersíniásavait ajortuliortoĸ nâgdliugtitaujuardlune nâgssaungitsumik inũsasoralugo. mãna ajortoĸ ikiortine avĸutigalugit sulivoĸ Gûte Nâlagkatut kisermáussiniartutut akiniaiumatûtutdlo takutíniartardlugo, Sãtane ajoĸersuigame Gûtip piumassânik iliorumangitsut tamarmik Nâlagkamit ániartitsivingmut igitaussarnerardlugit, tássanilugôĸ kamangnera misigiuásagât; ingnernilugôĸ ĸamiuitsune ániartitdlugit Nâlagkap tugdlûsimavdlune issigai.

taimatut akerarssûp inungnik píngortitsissoĸ ajúngitsuliortordlo nungmineĸ píssuserissaminik píssuseĸarnerarpâ. nãkigtáissuseĸ Sãtunip pigâ. Gûte asangningneruvoĸ, táussumalo píngortitai tamarmik minguíput, iluarput asanardlutigdlo ajortip pikigtitsissorssuákut tikiúnera tikitdlugo. Sãtane nangmineĸ akerauvoĸ inuit ússerdlugit ajortuliortitsiniartoĸ, kingornalo pisínaugune aserordlugit; piniagkanilo pissarigângamiuk aseruisimanine ajugausimârutigissarpâ. akurineĸaraluarune inuit tamákivigdlugit ĸagssutiminut pulatísagaluarpai. Gûtip píssaunera tássáungíkaluarpat Adamip ernerisa panîsalũnît ilât atauserdlũnît aniguinaviángíkaluarpoĸ.

Sãtanip uvdlumíkut inuit ajugauvfiginiarpai, sôrdlo sujuaissavut Gûtip nautsîviane ajugauvfigigine píngortitsissumut tatigingningnerat aulalersikamiuk Gûtivdlo silatûmik nâlagkersuineranik inatsisâtalo nâpertuivdluássusianik ĸulalersíkamigit. nangmingneĸ ajússusertik pikigtitsinertigdlo igdlersorniardlugo Sãtanip autdlartitaisalo Gûte nangminermingnit sule ajornerussutut oĸautigissarpât. sagdlutôrssûp nangmineĸ nãkigtáissutse atâtavtínut ĸilangmiussumut pigiliúkumassarpâ, ĸilangmit anisitaunermigut nâpertuivdluángivigsumik pineĸarnine ugpernarsarniardlugo, Nâlagaĸ taima nâpertuiv dluángitsigissoĸ nâlagkumasimángínamiuk. inungnut nangmineĸ saimassumik nâlagkersuilerune kivfáungíssusigssãnik oĸalũtarpai Nâlagkavdlo sukangasûmik perĸússutaisigut inugsiaunerat tamatumúnga nalerĸiútardlugo. taimailiordlune tarnigdlit Gûtimut ilu-môrungnaersíniardlugit ússînermine iluagtitsissarpoĸ.

ajoĸersûtip taimáitup asangnigtumik, nãkigtartumik agdlâtdlo nâpertuivdluartumik misigingningnivtínut akerdliússusia: perĸigsiminatik toĸusimassut ániartitsivingme ikumajuartume nâgdliugtitaujuartugssaunerardlugit, sivikitsumigdlo nuname inûsimanermingne ajortuliatik píssutigalugit Gûte gûtiutitdlugo nâgdliugtitaujuartugssaunerardlugit! ajoĸersûtdle tamána angnertûmik ajoĸersũssutigineĸarsimavoĸ, sulilo kristumiune ássigĩngitsunik navsuerutilingne ĸavsîne ugpererĸussanut tamána ilautitauvoĸ.

ajoĸersûtigissaĸ taimáitoĸ Gûtip oĸausiane sume takuneĸarsínauva? Gûtip nâgdliugtuartunik issigissaĸarnigssamik nuánarissaĸarneranik navsueruteĸásagaluaruvta tamána Gûtip súkut iluaĸutigísagaluarnerpâ? ániartitsivingme ikumassume nâgdliugtut nimârdlutigdlo nivdlianerat asangningârtorssûp tusarnersutut tusarnârsínáusaneramiuk? gûtîtsut kipísángitsumik nâgdliugtitaunigssât Gûtip ajortimik silarssûp erĸigsisimanigssânik aserorterutaussutut ûmigissaĸarneranik takutitsissugssatut oĸautigineĸartarpoĸ. mítatigdlînerup tamatuma ínilârníssusia! Gûtip ajorte ûmigingmago ajorte nâgssáungitsúngortítariaĸarnerame! ugperissagssarsiortúme tamáko nâpertordlugit nâgdliugtitaussut sáimáuneĸarnigssamik neriûtigssaĸaratik nâgdliugtuartugssáuput ajorte píssutigalugo, kamangârnermingnilugôĸ perdlorĸussiuardlutigdlo mítatigdlîuarníkut ajortuliartik agdliartortítuásavât. taimatut ajortuliamik agdliartortitaujuartumik nâvfigssaĸángitsumigdlo oĸalugtuarissaĸarneĸ Gûtimik nâlangnartitsinerúngilaĸ.

nâgssáungitsumik nâgdliungnigssamik ajoĸersûtip támarnartup kingunipiluisa angnertússusiat inuit nautsorssorneĸ saperpât. bîbilip kristumiússusia asangningnermik avâgingningnermigdlo ulivkârtok ugperissapalânit tâgdlerneĸarpoĸ ánilârnermitdlo ulingneĸardlune. tupigusûtigisínaunerparput iouit píngortitsisserput saimassoĸ sujôragingmássuk agdlâtdlo ûmigalugo, Gûtip píssusia Sãtanimit ĸanoĸ sagdlutigissumik oĸalugtuarineĸarnera erĸarsautigiguvtigo? Gûtimik ersigissaĸarnerup oĸalugtarfingnit oĸalũssiníkut silarssuarmut siaruarterneĸartup inuit tûsintigdlit, ilame miliûnigdlit, ĸulalersitdlugitdlo ugpingitsúngortísimavait.

nâgdliugtuarnigssamik isumaliutaussoĸ tássauvoĸ ajoĸersuinerdlûtit Bâpalip kamáumik vĩniliaralugo nuname ineĸartunut putumatitsiniutaisa ilât. (sarĸ, 14, 8; 17, 2). ilumôraluarpoĸ ajoĸersût tamána angutinit pitsauvdlutigdlo pingârtûssunit ilungersûtigineĸarsimangmat, kisiáne oĸalûserissagssamik tamatumínga uvavtitut ĸáumarsagausimangitdlat. táuko naligissamingne ĸáumarĸutaussuínarmut akissugssáussuseĸarput; uvagut ĸáumarĸúmut nalivtíne ĸaumassumut akissugssáussuseĸarpugut, Gûtip oĸausia tunúkuvtigo ajoĸersuinerdlûtinigdlo ilagsissaĸaruvta sujuaissavtínit ilungersûtigineĸarsimangmata, tauva Bâpalitut erĸartũneĸarumârpugut "vĩnilo uverssarnerata pia" imerfigissariaĸásavdlugo".

inuit ĸavsêrpagssuit nâgssáungitsumik ániarnigssamik ajoĸersût mamianartutut issigalugo tamatuma akerdlianit támartitaussarput. Gûtip agdlagkane iluartune asangnigtutut nãkigtartututdlo oĸalugtuarineĸarnera takussarpât, píngortitaminigdlo ániartitsivingmut ikumajuartumut igitsiumanigssâ ugperineĸ saperpât. tarnerdle inúngûseralugo toĸujuíssuseĸarsorigamíko avdlatut isumaliorneĸ saperdlutik inuit tamarmik naggatâgut ánagkumârsorait. ĸavsît bîbilip sujôrasârutai inuit nâlagtíniásavdlugit sujunertaĸáinartutut isumaĸarfigait, tássa sujôrasârutit tamáko piviussumik erĸûtíneĸásasoríngilait. taima isumaĸarneĸ túngavigalugo ajortilik pilerigissaminik nangminigssarsiordlune inûsínaugaluarpoĸ Gûtip perĸussai soĸutiginagit, taimáikaluartordlo naggatâgut sáimáuneĸarnigssane isumavdlûtigalugo. ajoĸersût taimáitoĸ túngavigssaĸángitsumik Gûtip avâgingningneranut tatigingnilersitsissoĸ, kisiáne Nâlagkap nâpertuivdluássusianik nautsorssûtigissaĸángitsoĸ uviningmik ũmatilingmut ilalernarpoĸ gûtîtsutdlo gûtĩssutsimingne sorráinefulersitdlugit.

inuit tamarmik tarnaisa toĸúkut ingerdláinavigdlutik ĸilangmut isrriartortarnerat ilumôraluarpat túngavigssaĸartumik inûnigssarput pínago toĸunigssarput kigsautigisínáusagaluarparput. taima isumuliorneĸ túngavigalugo ĸavsît nuname inûnertik naggasertarsimavát. angnikitdliûtit, ajornartorsiutit pakatsíssutitdlo artulerdlugit inûneĸ ĸajangnartoĸ kipivdlugo silap matuma áipânut tipaitsugfigssamut ĸutdlarniarnigssaĸ nangãssutigssáungitsutut isumaĸarfigilersínaussarpât.

Gûtip inatsisiminik uniorĸutitsissunik pitdlaiumârnine oĸautsimigut ersserĸigsumik ugpernarsarsimavâ. isumaliortoĸarune ajortuliortoĸ nâpertuivdluartumik pitdlásavdlugo Gûte saimavatdlârtoĸ, tauva táussuma Gûlgathap sáningassulia ĸiviáinariaĸarpâ. Gûtip ernerata minguitsup toĸunerata nalunaerutigâ "ajortip akigssarsiagssarititâ tássaungmat toĸo", Gûtivdlo inatsisânik uniorĸutitsinerit tamatigut nâpertuivdluartumik pitdlautisíssutigissariaĸarmata. Kristusip ajorteĸángitsup inuit sivnersimavai. uniorĸutitsinerup pissũssutâ táussumúnga pisíneĸarpoĸ, atâtavdlo alarpâ ũmatâ seĸumitserdlugo, nangmagkavdlo oĸimaitsup atâne toĸutserdlugo. sivnîssutut túniúneĸ tamána tamarme suliarineĸarpoĸ ajortigdlit utertitausinaorĸuvdlugit. avdlatut iliorníkut ajortiligtut pitdlagaunigssaĸ anigorsínáungilât, kinalo taimatut utertitaunermut ilaujumángitsoĸ uniorĸutitsinerminut nangmineĸ pissûssariaĸarpoĸ pitdlautigssâlo ingminut pisíturiaĸardlugo.

avâgingningnerup, nagdligtuinerup asangningneruvdlo najorĸutagssai ánáussissivta ajoĸersuinermigut maligagssiuinermigutdlo sarĸúmiússai Gûtip piumassânik píssusianigdlo nalunaerutáuput. Kristuse oĸarpoĸ atâtaminit pisimángisaminik ajoĸersûtigissaĸarnune. Gûtip nâlagkersuinermine najorĸutarissai ánáussissup inássutânut nalerĸutdluínarput: "akerĸase asaniarsigik." Gûtip nâpertuivdluássuseĸ erĸûtítarpâ silarssûp iluaĸutigssâ ãmalo erĸartũssinermigut erĸugaussut iluaĸutigssât sujunertaralugo. pivdluarĸunerúsagaluarpai nâlagauvfigissame inatsisainut nangminerdlo nâpertuivdluassutsiminut nâpertũtumik taimailiorsínaugaluarune. asangningnerme nalunaerutainik ungalussarpai, inatsisiminik ajoĸersortarpai sáimáunerminigdlo tuniumassardlugit; kisiáne asangningnera narrugissarpât, inatsisâ uniorĸutítarpât sáimáuneralo piumanago. tuníssutai ilagsiuartardlugit tunississoĸ kángunarsartarpât. Gûte ûmigât ajortuliatik narrugigai nalúngínamíko. Nâlagkap nâlagserĩneráne sivisûmik ĸajagssũtarpai; naggatâgutdle akúneĸ nagdliúkumârpoĸ ĸanoĸ pineĸarnigssaisa aulajangerneĸarfigssât. taimailigpat pikigtitsissut tamáko saniminut kalungnilerumásanerpai? píngitsailiumásanerpai perĸussamisut iliorĸuvdlugit?

Sãtanimik nâlagagssarsiorsimassut táussumángalo nâlagkersugauvdlutik, táuko Gûtip kînâta sânut savssarniásavdlutik piarêrsimángitdlat. angneruniarneĸ, sagdlutússuseĸ, nâlagserĩssuseĸ nãkigtáissuserdlo táukua píssusiáne sordlanigsimáput. ĸilak iserfigisínaunerpât tássane nunamĩkatdlaramik nikagalugitdlo ûmigisimassatik nâgssáungitsumik ilagiartordlugit? sagdlusuíssut sagdlutûp iluarinaviángilâ; manigũssuseĸ angneruniartup nãmaginaviángilâ; minguíssuseĸ ilerĸordlugtup ilagsisínaunaviángilâ; nangminigssarsiujuitsumik asangningneĸ nangminigssarsiortup nuánarinaviángilâ. timíkut ítuínarnik soĸutigissagdlit ĸilangme suna tipaitsûtigisínáusagaluarnerpât?

Gûtimut pikigtitsiuardlutik inûsimassut tássángáinaĸ ĸilangmut isertitausínaunerpat tássane nãmagdluínássuseĸ tássane píssusiujuartoĸ misigísavdlugo - tarnigdlit tamarmik asangnivigsut, kĩnat tipaitsugpalugtuínait, nipilerssûtit tusarningârtut Gûtimik savârĸamigdlo únersiutigssaussut utertitaussutdlo igsiavíssârssuarme igsiassumit ĸáumarsagaujuartut ilagalugit - ũmatimíkut Gûtimik ûmigssuissut sagdlusuíssúmigdlo iluássusermigdlo ûmigissaĸartut katerssârssuit ĸilangmiussut akuliuvfigalugit únersiutigingnigtumik tugsiaĸatigisínaunerpait? nâggale; ukiorpagssuarne misiligauvfigssaĸartitausimáput ĸilangme inûnigssamut naletĸútumik píssuseĸaleriartorniarĸuvdlugit; kisiáne minguíssuseĸ asaniásavdlugo ilíkángisáinarsimavât, ĸilangmiutut oĸalungneĸ ilíkángisáinarsimavât; mãnalo pivfigssaĸ ĸângiúpoĸ. Gûtimut pikigtitsissutut inûsimanerup ĸilangmĩnigssamut piúkúnarungnaersísimavait. minguíssusia, iluássusia erĸigsinássusialo nâgdliûtigisagaluarpait, Gûtivdlo nâlangnássusia taukunúnga ikualanerúsagaluarpoĸ nungutitsissoĸ. najugaĸ iluartoĸ tamána ĸimâvdlutik ĸimagsínaujumavdlugo erinigísagaluarpât. nungutitaunigssaĸ tikitdluarĸúsagaluarpât utertíkumavdlutik toĸussup kînânut issertorsínaujumavdlutik. gûtîtsut ĸanoĸ pineĸarnigssât nangmingneĸ ĸinigât nâpertordlugo aulajangerneĸartugssauvoĸ. ĸilangmut iserĸussáungínerat tássa nangmingneĸ ĸinigât, Gûtivdlo tungânit tamána nâpertuivdluartumik nãkigtartumigdlo iliorneruvoĸ.

sôrdlo taimane ulerssuaĸ tamatumínga nalunaerutausimassoĸ taimatut uvdlorme pingârtorssuarme ikualanerup gûtîtsut iluarsivfigssaĸángíneránik Gûtip aulajangînera nalunaerutigiumârpâ. Gûtip nâlagáussusia nâlagarsiorfigisavdlugo kajumissuseĸangitdlat. piumássusiat pikigtitsinermut atorneĸarsimavoĸ, inûneruvdlo naggaserneĸarnerane erĸarsautit uniorĸutitsinermit nâlangnigssamut ûmigssuinermitdlo asangningnigssamut sangutíniásavdluJit kingusigpatdlârpoĸ.

inuartup Kainip inûnera Gûtip ĸajagssũkamiuk silamiut takussaĸartípai ajortuliortup gûtissutsimine akornuserneĸarane inûtitaugínarnerata ĸanoĸ kinguneĸarnigssânik. Kainip ajoĸersuineragut maligagssiuineragutdlo kinguâvisa amerdlanerssait ajortuliornigssamut ússerneĸarput, kîsalo "ajorssusiat angingârpoĸ nuname", nunalo "aserorsimavoĸ Gûtip tákuane, iluaitsuliornernik ulivkârdlune." (1 Môrs. 6, 5. 11).

Nûap nalâne Gûtip silarssuaĸ sáimautdlugo silamiut ajortut pîarpui. saimanermigut Sûtumap inue ilerĸordlugtut nungutípai. Sãtanip támartitsissutut píssauneĸarneragut gûtîtsumik iliortut nuánarissángordlutigdlo nersorneĸartarput, tamatumûnalo inoĸutitik támartítuardlugit pikigtitsilersítarpait. taimáipoĸ Kainip Nûavdlo uvdluine Âperâvdlo Lútivdlo uvdluine, taimáipordlo uvagut uvdluvtíne. Gûtip naggatâgut sáimáunerminik ilagsissaĸarumángitsut pîarunigit. silarssuaĸ tamarmiussoĸ ĸajagssûtdlugo taimailiorumârpoĸ.

"ajortivme akigssarsiarititâ tássa toĸo, Gûtivdle sáimáunermit tuníssutâ tássa inûneĸ nâgssáungitsoĸ Kristuse-Jîsusime Nâlagkavtíne.” iluartut inũssut kingornutagssarigât gûtîtsut toĸo pissagssarât. Môrsasip israilíkut oĸarfigai: "uvdlume ilingnut sarĸangiúpáka inũssut ajúngitsordlo, toĸússut ajortordlo.” (Rûm. 6, 23; 5 Môrs. 30, 15). toĸússut agdlagsimavfingne táukunane oĸautigineĸartoĸ tássáungilaĸ táuna Adamimut oĸautigineĸartoĸ; táussumame iluaitsuliornera pivdlugo inuit tamurmik pitdlagáuput. tássauvordle "toĸup áipâ”, nâgssáungitsumik inũssutip akerdliatut, oĸautigineĸartoĸ.

Adamip ajortuliâta kingunerissânik toĸup inuiaĸatigît tamaisa tikípai. tamardluínarmik ássigĩngíssuteĸángitsumik iliveĸ ornigpât; ánáussinigssamigdlo pilerssârutaussoĸ nâpertordlugo tamardluínarmik ilivermingnit savssartitaussugssauput. "toĸussut makíkumârmata, iluartutdlo iluaitsutdlo;" "sôrdlume Âtamime tamarmik toĸussut, taima Kristusime tamarmik ũmartitáusáput." makítutdle ássigĩngitsúkûtât mardlûssut ássigĩngitsuliorfigineĸarumârput. "ilivernĩtut tamarmik táussuma nipâ tusarumârpât, anivdlutigdlo makísáput, ajúngitsuliorsimassut inûnermut pissugssauvdlutik, ajortuliorsimassutdle erĸartũssivingmut pissugssauvdlutik. makivfingme pigssaĸartut pivdluardlutigdlo iluarput, táukunúngalo "toĸup áipâ pigínáussuseĸángilaĸ;" kisiáne sângníkut ugperníkutdlo isumákêrfigineĸángitsut iluaitsuliornermik akigssarsiarititâ "ajortip akigssarsiarititâ" pitdlautisiagssarísavât. pitdlautisiumârput "suliatik nâpertordlugit" sivisússuseĸardlunilo sukangássuseĸarumârtumik; inerneĸarnerale tássaujumârpoĸ "toĸup áipâ." Gûtip nâpertuivdluartûvdlunilo nãkigtartûgame ajortuliortoĸ ajorteĸarnerane ánáusínáungivigkamiuk inũssutânik iluaitsuliornermigut ánaissariaĸagânik arsârumârpâ. súnîvigineĸardlutik agdlagtut ilât oĸarpoĸ: "iluaitsoĸ ĸilamik peĸarungnáisavoĸ, inâ nalunaerssoraluarugko peĸarungnáisavoĸ; ilâtdlo nalunaerpoĸ: "imailerumârput ... peĸángitsutut ilersitdlutik." (ap. sul. 24, 15; 1 Kor. 15, 22; Juán. 5, 28. 29; sarĸ. 20, 6; tugs. 37, 10; Opât. 16).

taimatut ajorte, ániarnerdlo aserugaunerdlo kingunerisimassai tamarmik pîagaujumârput. tugsiausiortoĸ oĸarpoĸ: "iluaitsut nungutípatit; arĸe pîarpatit nâgssáungitsumik pîagáutuinartitdlugit. ĸíngarssuissup piunêrússinere nãput nangingnavêrdlutik." Juánasivdlo nâgssáungitsugssaĸ sujunigssamĩtoĸ takordlôrdlugo silarssuaĸ tamákerdlugo únersiutigingningneĸ nipilungnermik mingnerpâmigdlũnît ilataĸángitsoĸ tusâvâ, píngortitat tamarmik ĸilangmilo nunamilo nunavdlo avatâne ítut nâlangnaut Gûtimut pigitípât. (tugs. 9, 6. 7; sarĸ. 5, 13). taimailigpat támartitaussunik tarneĸásángilaĸ Gûtimik mítatigingnigtunik nâgssaungitsumik nâgdliugtitdlutik, ániarfingmilo perdlorĸussaussoĸásángilaĸ utertitaussut tugsiarneráne nivdliavdlutik ingiatdlortunik.

inúngûseralugo toĸujuíssuseĸarnermik támarnartuvingmut túngavoĸ toĸusimanerme ilisimássuseĸarnermik ajoĸersût - ajoĸersût nâgssáungitsumik nâgdliungnigssamik isumaliutaussutut agdlagkat iluartut oĸausiánut, silaĸardluarnermut inugtutdlo misigíssuseĸarnivtínut akerdliussoĸ.

agdlagkat iluartut tamáko pivdlugit ĸanoĸ oĸausigssaĸarpat? Dâvip inuk toĸume ilisimángínerarpâ. "anerningerune ivssortaminut utísassoĸ, tauvalo isumaliornerssue támarsimásáput." Sâlumût tamatuma ássinganik nalunaerutigissaĸarpoĸ "mássa inûssut ilisimáput toĸúsagamik, toĸungassutdle súnguamigdlũnît ilisimángitdlat ... asangningnerdlũnît ûmigssuinerdlũnît sínganerdlũnît táukua atugait ĸangale áungarêrput; avgûtisivfigssaerutdluínarputdlo sunik seĸernup atâne ĸanoĸ pissaraluartunik." "unerivfingme ornigkangne suliagssaĸarnanilo sianigtorsautigssaĸarnanilo ilisarssíssutigssaĸarnanilo ilisimássutigssaĸángilaĸ." (tugs. 146, 4; akugdl. oĸ. 9, 5. 6. 10).

Hiskiap ĸínutigissame akíssutigssâtut inûvfigssane ukiunik 15-inik sivitsortíkamiuk kúngip táussuma ĸujamasungnermine Gûte únersiutigingârpâ avâgingníssusia pivdlugo. únersiutigissamine nuánârnerminut píssutigissane oĸautigâ: "mássa unerivfiup únersiutigíngilâtit, ániveĸángitsumut samungnartut neriugíngilât ilumôrssutsit. kisiáne inûssut, táukua únersiutigisavãtit, sôrdlo uvanga uvdlume iliortunga." ugperissagssarsiornerme isumaliutaugajugtut nâpertorrllugit iluartut toĸusimassut ĸilangmĩput tipaitsugfik iserfigisimavdlugo tássanilo Gûte únersiutigítuínardlugo; kisiáne Hiskiap toĸo taimatut isumavdluarfigisínausimángilâ. táussuma oĸausianut tugsiausiortup oĸausia nâpertũpoĸ: "mássa toĸussune erĸaineĸángilalit, kiame ĸutsavigísangmatit unerivfingme?" "toĸussut Nâlagaĸ únersiutigísángilât, nipangersitat inãnut samungnarsimassut." (Is. 38, 18. 19; tugs. 6, 6; 115, 17). Pîtrusip pînsip uvdlorsiutigineĸarnerane Dâve atâtaunerpaussoĸ ima oĸautigâ: "toĸuvoĸ ilissauvdlunilo, ilerfalo sule uvavtínĩpoĸ sule tamássa uvdlume." "Dâvime ĸilaliángilaĸ." (ap. sul. 2, 29. 34). Dâvip makínigssaĸ utarĸivdlugo iliverme utarĸĩnarnerata iluartut toĸugângamik ĸilaliartángínerat takutípâ. makíneĸ Kristusivdlo makísimanera kisîsa túngavigalugit Dâvip naggatâne Gûtip talerpiata tungâ ingivfigisínaujumârpâ.

Paulusilo oĸarpoĸ: "toĸussúme makísángigpata Kristusísaoĸ makísimásángilaĸ. Kristusile makísimángigpat ugpernerse piúngitsũsavoĸ, sule ajortivsínĩsause tauva; ãma Kristusime sinigpârtut tauva támarsimásáput." (1 Kor. 15, 16-18). iluartut ukiune tûsintilingne sisamane ingerdláinardlutik ĸilaliartarsimagaluarpata toĸoriarângamik, ĸanorme tauva Pauluse oĸarsínausimásagaluarpa makíneĸángigpat "ãma Kristusime sinigpârtut tauva támarsimásassut?" taimáitoĸarsimagaluarpáme makínigssaĸ pissariaĸarsimásángíkaluarpoĸ.

toĸussut píssusiat pivdlugo martêre Tyndale oĸarpoĸ: "ersserĸigsumik navsuerutigâra nâlangnássuseĸ Kristusip pia Gûtivdlũnît íngilîsa ĸinigkat najugât toĸussut najorĩsagât ugperivíngínavko; taimáikaluarpáme uvíngup makínigssânik nalunaiaineĸ suliatut piúngitsutut issigissariuĸásagaluarpara."

agssortûtigissagssáungilaĸ toĸúkut nâgssáungitsumik tipaitsungnigssamik neriûtip bîbilip makínigssamik ajoĸersûtânik angnertûmik sumigínaineĸ kingunerisimangmago. píssusiussoĸ tamána dr. Adam Clarkip sianigisimavâ agdlagkame: "kristumiune sujugdlerne makínigssamik ajoĸersût mãnákumit pingârtitaunerujugssûsimassutut ípoĸ! tamatumúnga suna píssutaunerpa? apustilit ajoĸersût tamána ersserĸigsartuarpât Gûtip ĸitornai eĸiasuínigssamut, nâlangnigssamut nuanárnigssamutdlo kajumigsârdlugit. nalivtínilo kingulîsa akugtusûmik erĸartortarpât! apustilit taima oĸalũssissarput, kristumiutdlo sujugdlît taima ugperissaĸarput; taimatut uvagut oĸalũssissarpugut, tusarnârtivutdlo taima ugperissaĸarput. îvangkîliume ajoĸersûteĸángilaĸ pingârtitaunerussumik; nalivtínilo oĸalũssissarnerme ajoĸersûteĸángilaĸ sumigínagaunerussumik."

sumigínaineĸ tamána ingerdláneĸartuardlune kîsa makínigssamik sagdlusuíssut tipaitsungnartoĸ kristumiune tâgdlerneĸangajalivigsimavoĸ. taimatut atuagkiortoĸ kristumioĸ Tásalûníkamiunut agdlagkat sujugdlît kap. 4-me versit 13-18 pivdlugit ima oĸarpoĸ: "tugpatdlersautigssatut uvagut iluartut toĸusimassut toĸujuíssusiánik ajoĸersût Nâlagkap tikiuterĸingnigssânik ajoĸersũmut ĸularnartumut taorsiutivigsimavarput. toĸunivtigut Nâlagkap aiumârpâtigut. tamánauvoĸ pigârutigalugulo utarĸissagssarput. toĸussut nâlangnássusermut iserêrsimaput. erĸartũssivingmut pivdluarfigssamutdlo savssarnigssamingne ĸardlortáussuaĸ utarĸíngilât."

Jîsusivdle ajoĸersugkane ĸimákamigit oĸarfigíngilai katsorna ornísagât. "inigssarsioriartorpavse," taima oĸarpoĸ. "inigssioriartorêruvsilo kingumut tikiukúmârpunga, uvavnutdlo pisíkumârpavse najugkavnêrĸuvdluse." Paulusivdlo nalunaerfigerĸigpâtigut: "Nâlagaĸ nangmineĸ ĸilangmit arĸarumârmat suaornermik íngilerssûvdlo nipânik Gûtivdlo ĸardlortáussuanik, Kristusimilo toĸussut makerĸãsáput; kingornisigutdlo uvagut inûvdluta angumeringnigtugut táuko ilagalugit nuiatigut autdlarúneĸarumârpugut siláinarme Nâlagaĸ pâriartúsavdlugo; taimalo Nâlagaĸ najortuínalísavarput. taimáitumik oĸautsinik tamákunínga tugpatdlersaĸatigîgitse." (Juán. 14, 2. 3; 1 Tás. 4, 16-18). oĸautsit tugpatdlernartut tamákua palasivdlo silamiorpalugtup oĸausê matuma sujulîne íssuarneĸartut ássigĩngíssusiat! kingugdlermik taineĸartup ikíngutit aliasugtut tugpatdlersarpai toĸussoĸ tamâne anerningerune íngilit akornáne ilagsineĸartugssaunerardlugo, ĸanordlũnît ajorteĸarsimatigigaluarune. Paulusivdle ugpeĸatigissane uparuartũpai Kristusip tikiúnigssânik, taimailissúkut ilerfit ĸilerssûtait kigtorarneĸásangmata "Kristusimilo toĸusimassut" nâgssáungitsumik inûneĸarnigssamut makísangmata.

kíkutdlũnît pivdluartut najugáinut isertínagit píssusê ĸanordlo iliorsimanere Gûtimit misigssorneĸartariaĸarput. sût tamarmik magpersagkane agdlagsimassut nâpertordlugit erĸartũssíssutigineĸásáput kíkutdlo tamarmik suliamingnut nâpertũtumik akilerneĸásavdlutik. erĸartũssineĸ tamána toĸúkut suliarineĸángilaĸ. apustilip oĸausia sianigisiuk: Gûtip "uvdlorme aulajangersagkamine inuit najugât nâpertuivdluardlune angut taimaerĸussane kivfaralugo erĸartũkumâramiuk, táunalo tamanut ugpernarsarpâ toĸussunit makitíkamiuk." (ap. sul. 17,31). tássûna Paulusip ersserĸigsumik pivfigssaĸ erĸartũssivigssatut aulajangerneĸarsimassoĸ oĸautigâ. Jûtarsivtaoĸ pivfigssaĸ tamána erĸartorpâ: "íngilitdlo píssuserĸâgartik aulajangerfiginago inigissartik ĸimangmássuk, tarrup atâne ĸilerssorsimátuínartitdlugit uvdlugssarssuaĸ erĸartûtivfigssaĸ nagdliutserdlugo torĸugarai." Enûvdlo oĸausia íssuarpâ: "ata, Nâlagaĸ iluartortane tûsintiligpagssuit ilagalugit aggersoĸ (aggísassoĸ), tamaisa erĸartũkiartordlugit." Juánase oĸarpoĸ: "toĸussutdlo mikissut angisûtdlo igsiavíssârssûp sâne ĸeĸartut takuváka, magpersagkatdlo ĸavsît magperneĸarput . . . toĸussutdlo erĸartũneĸarput magpersagkane agdlagsimassut maligdlugit." (Jût. 6. 14. 15; sarĸ. 20, 12).

toĸussutdle ĸilangme pivdlualerêrdlutigdlũnît ániarfiup ikualanefane ánialerêrpata, sujunigssame erĸartũssinigssaĸ sumúme tauva iluaĸutáusava? Gûtip oĸausiata ingmíkôrtut tamáko pivdlugit ajoĸersûtigissâ nalorninarnanilũnît ingminut agssortuíngilaĸ; inuínarnut pâsinarpoĸ. amerdlaneritdle isumaliutâta ilisimássutâ nâpertuivdluássusialũnît kia takusínáusavâ? iluartut erĸartũssivingme misigssorneĸarêrdlutik oĸautsit únersiutigingnigtut tusásanerpait: "ĸujanaĸ kivfaussutit ajúngitsoĸ ilumôrtordlo ... Nâlagkavit tipaitsugfianut iserit!" uvfa ímaĸa ukiune tûsintiligpâlungne najorêrsimavdlugo? gûtîtsut ániarfingmit ĸaerĸuneĸardlutik savssartitáusanerpat nunamiut erĸartũssissuánit ima erĸartũneĸásavdlutik: "uvavnit autdlaritse perdlorĸussaussuse ukorsê, ingneĸ nâgssáungitsumik ikumassoĸ Diâvulumut íngilînutdlo piarêrsimassoĸ ornigsiuk?" (Mat. 25, 21. 41). mítatigdlînerup sualússusia! Gûtip ilisimássusianut nâpertuivdluássusianutdlo únerdlûtigingningnerup kángunássusia!

tarnip toĸusuitsûsorineĸarnera tássauvoĸ ajoĸersuinerdlûtit ilagît rûmalerissut Gûtimik nalussunit tigussaralugo kristumiut ugperissãnut ilángutaisa ilât. Martin Lutherip tamána rûmamiut nalunerutaisa agtakuinit oĸalugtualiáinartut píssuseĸartutut issigâ. Sâlumûp akugdlîssup oĸausîne oĸautigissâ: "toĸungassutdle súnguamik ilisimangitdlat" pivdlugit iluarsaerĸingniartoĸ ima oĸarpoĸ: "tássanísaoĸ toĸusimassut ilisimássuseĸángínerat agdlagsimavoĸ. toĸusimassune pissugssáussuseĸángilaĸ, ilisimassuseĸángilaĸ pâsisimassaĸartoĸarunilo, Sâlumût isumaĸarpoĸ toĸussut sinigdlutik malugissaĸángitut. toĸussut tássane ínanguvdlutik uvdlunik ukiunigdlũnît kisitaĸángitdlat; itertíneĸarunigdle minúte atauserdlũnît sinigsimasorísangitdlat."

agdlagkane iluartune toĸúkut iluartut akigssarsiartornerat gûtîtsutdlũnît erĸartũneĸarnerat súkutdlũnît oĸautigineĸángilaĸ. atâtaunerit pruvfîtitdlo oĸauserissamik taimáitumik ĸimataĸarsimángitdlat. Kristusip apustilîsalo taimáitoĸarnera mingnerpâmigdlũnit oĸautigisimángilât. Bîbilip ersserĸigsumik ajoĸersûtigâ toĸussut ernĩnaĸ ĸilaliartángínerat. makivfiup tungânut sinigtutut oĸautigineĸartarput (1 Tás. 4, 14; Jûp. 14, 10-12). uvdlorme pitũtap sîlviussup kigtorarfigssâne ímersagkavdlo kûltiussup seĸumivfigssâne (akugdl. 12, 6), inûp erĸarsautai pêrúkumârput. ilivermut arĸartut nipaitsumiput, seĸernup atâne pissartut peĸatauvfigiungnaerpait (Jûp. 14, 21). ĸasuersârnigssap iluartunut ĸasussunut ĸujanássusigssâ! uvdlut sinigfigissat amerdlagpata ikigpatalũnît uisorernerínartut misigísavait. sinigput; Gûtip ĸardlortáussuanit toĸusuíssusermut pivdluarnartumut itersarneĸarumârput. "ĸardlortarumârporme, toĸussutdlo aserujuitsûvdlutik makísáput. '" aserujassoĸ mána aserujuíssúmik atitítariaĸarmat toĸujassordlo mána toĸusuíssúmik atitítariaĸarmat. aserujassuvdle matuma aserujuíssut atigpago, toĸujassuvdlo matuma toĸusuíssut atigpago, tauva erĸũkumârpoĸ oĸauseĸ agdlagsimassoĸ: toĸo ajugaunermut nungutitauvoĸ." itisûmik siningnermingnit itertitaugunik kingugdlermik erĸarsautigissatik nangíkumârpait. malugissât kingugdleĸ tássa toĸup nâgdliungnartua, kingugdlermigdlo erĸarsautigisimassât tássa ilivermukaleramik. ilivermit makíkunik erĸarsautigerĸâgartik ima oĸausertalerumârpât: "toĸo-â, igûtit nauk?" (1 Kor. 15, 52-55).