mianerssorĸússutit núngutât

"kingornalo takuvara íngile avdla angisûmik pigínáussuseĸartoĸ ĸilangmit arĸartoĸ, ĸaumaneranitdlo nuna ĸáumarsaguvoĸ. nipinilo nipigtortitdlugo tordlulavoĸ oĸardlune: úpípoĸ, úpípoĸ Bâpale angisôĸ, anersâpiluitdlo najugarilerpât, anersâtdlo mingugtût tamalât parnaerússauvfigilerpât, tingmíssatdlo mingugtût ûminartutdlo tamalât parnaerússauvfigilerpât!" "nipilo avdla tusarpara ĸilangmit oĸartoĸ: táussumánga anigitse, ínugtáka, ajortaisigut peĸatigileĸinavase, perdlûtigssainigdlo pineĸaĸinavuse." (sarĸ. 18, 1. 2. 4).

agdlagsimavfiup tamatuma sujunigssame Bâpalip úpínigssâ kapitalit 14-iáne (sarĸ. 14, 8) íngilip áipânit nalunaerutigineĸartoĸ áipagssânêrneĸartugssatut uparuarpâ, tássûnalo aserũsimanerit nalunaerutip 1844-me nalunaerutigineĸarĸârneranit Bâpalime inuiaĸatigîngnut ássigĩngitsunut erĸúneĸarsimassut ilángutdlugit nalunaiautigineĸarput. silamiut ugperissaĸarnermut túngassumik píssusiat tamatumûna oĸalugtuarineĸartoĸ ánilârnardluínarpoĸ. sagdlusuíssúmik narrugingningnerit tamardluínarmik inungnik taggaringnerussumik târsiortitsíput ũmatainigdlo mángertitsineruvdlutik, kîsalo ugpíngíssutsip malartitagssáungitsup igpiliugâta tunuane ĸimâvfigssarsiorumârput. Gûtip perĸússutâ mianerssorĸússutâlo soĸutiginago inatsisit ĸulit ilât tugdlâriuarumârpât, kîsalo inatsímik tamatumínga ivdlernartitsiumassut ĸinuginialerumârpait. Kristuse ilagínarneĸartarpoĸ oĸausîsa ínugtaisalo nikagineĸarnerisigut. ilagĩkûtât anersâlerissut ajoĸersûtainik ilagsissaĸaleriartortitdlugit uviniussumik ũmatilingnut kigaitdlagsautit pîarneĸariartorput, kristumiututdlo navsuerutaussoĸ ĸagdlersautíngorumârpoĸ gûtĩssusermik sualungnerpâmik issertûtaussoĸ. anersât sarĸúmerneránik ugperissaĸarnerup anersât támartitsiniartut Diâvuluvdlo ajoĸersûtai angmáukumârpait, tamatumûnalo íngilipiluit ilagĩkûtât súnîvigilerumârpait.

tamatumínga sujuligtût taimane sarĸúmiúneĸarmat, Bâpale pivdlugo oĸauseĸarpoĸ: "ajortáime ĸilangmut apigsíput, iluaitsuliornerilo Gũtip erĸaivai." (sarĸ. 18,5). ajortigssane nãmagtisimavai aserorneĸarnigssamigdlo erĸugaugalugtualerdlune. Gûtile Bâpalime sule ínugtaĸarpoĸ, pitdlautigssamigdlo autdlartitsisínane, ilumôrtut táuko kalerríniarpai Bâpalimit anerĸuvdlugit "ajortaisigut peĸatigileĸinangmássuk, perdlûtigssainigdlo pineĸaĸinangmata." tássa sujunertarineĸartoĸ íngilip ĸilangmit arĸartup, ĸaumaneranitdlo nuna ĸáumarsagaussup niperssuarmigdlo Bâpalip ajortainik tordlulassup, nalunaerutâtigut. táuname tordlulavoĸ: "táussumínga anigitse, ínugtáka!" nalunaiautit táuko íngilip pingajugssãnik nalunaerutânut atassut, naggatâmik nunarssûp inuinut mianerssorĸússutáuput.

píssutsit silamiut iserfigiumâgait ĸununardluínarumârput. silamiut píssaunigdlit kátúkumârput Gûtip ínugtai inatsisânut nâlagtut ima perĸússuteĸarfigalugit: tamarmik "mikissutdlo angisûtdlo pisûtdlo pîtsutdlo kivfáungitsut kivfaussutdlo" (sarĸ. 13, 16) ilagît ilerĸorerĸussât nâpertordlugo sagdlussumik sapâtigititaĸ ivdlernartûtísagât. tamatumúnga nâlagkumángitsut nâlagauvfingmit pitdlarneĸartugssatut erĸartũssaussarumârput, kîsalo toĸutagssángortitaunigssât norĸáissutigineĸartalerumârpoĸ. igdluatungânĩpoĸ Gûtip inatsisâ píngortitsissup sapâtânik ivdlernartitserĸussissoĸ; tamatumûna nâlangnigssaĸ piumassarineĸarpoĸ uniorĸutitsissutdlo kamáuneĸarnigssât sujôrasârutigineĸardlune.

kinalũnît píssusiussoĸ tamána ilisimavdluardlugo Gûtip inatsisânik tungmagaĸartoĸ inuitdlo perĸússutigissãnut nâlagkumanerussoĸ, táuna nerssúmit ilisarnaĸutsersípoĸ, ilisarnaĸutserneĸásaordlo Gûtimut nâlagkumángitsup píssauneruvdle nâlagkumavdlugo ĸinigkame ilisarnaĸutânik. ĸilangmit mianerssorĸússut imáipoĸ: "kialũnît nerssut ássingalo patdlorfigigunigit ĸaormigutdlo agssangmigutdlũnît ilisarnaĸutsersikune, táunátaoĸ vĩnimik kamáumik Gûtip pianik akoĸartínago ermutsimut kamangnerata pianut imísavoĸ." (sarĸ. 14, 9. 10).

kisiáne atauserdlũnît Gûtip kamangneranit erĸugáusángilaĸ sagdlusuíssut táussumúnga sarĸúmiúneĸarêrtinago narrugineĸarêrtínagulo. ĸavsît sagdlusuíssut uvdluvtínut mákunúnga túngassoĸ tusásavdlugo pivfigssaĸartitausimángisáinarput. inatsisit sisamâta maleruarneĸartariaĸarnera pivdlugo erĸortumik ĸáumarsagausimángisainarput. Gûtip ũmatinik tamanik ilisaringnigtup patsisigissanigdlo tamanik misigssuissup kinalũnît sagdlusuíssúmik pâsissaĸarumassoĸ agssortũssutigineĸartup sũssusianut túngassumik támartitaorĸúsángilâ. inássutaussoĸ ínugtanut tagpîtdliortitaussunut píngitsailíssutigineĸásángilaĸ. inuit tamarmik nãmagtumik ĸáumarsagaujumârput pâsisimangnigtumik ĸinigaĸarsínaorĸuvdlugit.

sapât nâlássusermut misiligússuángorumârpoĸ, tássauvorme sagdlusuíssut pingârnerussumik agssortũssutigineĸartoĸ. inuit naggámik misilingneĸalerpata Gûtimut kivfartũssissut táussumûnga kivfartũssíngitsunit ingmíkôrtitaujumârput. sapâtip sagdloĸítautip inuit inatsisáinut nâpertũtumik inatsisitdlo sisamãnut akerdliussumik ivdlernartitaunera ersserĸigsumik píssaunermut Gûtip akerarissânut ilumôrnermik navsuerutáusaoĸ, sapâtivdle Gûtip inatsisânâpertordlugo ivdlernartitaunera píngortitsissumut nâlangnermut nalunaerutaujumârpoĸ. inuit ilait silamiut pissortáinit ĸunutitaussutut ilisarnaĸutsersitdlugit. tássa nerssúmit ilisarnaĸutsersitdlugit, ardlaisa Gûtimut nâlangnigssartik ĸinerumârpât taimalo Gûtip ilisarnaĸutânik naĸíssusertíkumârdlutik.

ĸangarssuardle ukiorpagssuit ingerdlanerisigut Gûtip kivfane autdlartítarsimavai ajortuliorneĸ silamiune ilagîngnilo pitdlarumavdlugo. inuitdle únersiutigingnigtumik oĸalugfigineĸarnigssartik kigsautigissarpât. sagdlusuíssut akoĸarnane minguitsoĸ iluaríngilât. iluarsaerĸingniat ĸavsît sulilernermingne aulajangertarsimáput ilagît inuiaĸatigîtdlo ajortuliainik agssuarissaĸarnigssamingne misigssorĸigsârumavdlutik. neriugtarsimáput kristumiûvdluartutut inûseĸardlutik maligagssiuinermíkut ínugtaussut bîbilip ajoĸersûtigissáinut utertísínáusavdlugit. Gûtivdle anersâvata tikítarpai kúngíp gûtîtsup ínugtaussutdlo tunússisimassut ajortuliait pitdlarĸuvdlugit, sôrdlo Eliarse iliortoĸ, bîbilivdlo ersserĸigsumik oĸauserissai nalunaiautigíngitsôrsínáungilait - ajoĸersûtigissagssat nangmingneĸ sarĸúmersíkusúngíkaluagkatik. tamaviârtitáuput sagdlusuíssut ilungersortumik oĸalûtigísavdlugo tarnigdlitdlo navianartorsiutigissait uparuásavdlugit. kingunigssai ĸunuginagit oĸautsit Nâlagkamit oĸausersiarissatik oĸalûtigait, ínugtaussutdlo piumángíkaluarângamik mianerssorĸûssut tusartariaĸartarpât.

íngilit pingajuata nalunaerutâ taimatut nalunaerutigineĸarumârpoĸ. sákortunerpâmik sarĸúmersitauvfigssâ nagdliugpat Nâlagaĸ suliumârpoĸ ikiortigissane nikanarnerpât avĸutigalugit kivfagssamisutdlo túniúsimassut erĸarsautai sujulerssordlugit. sulissugssat píkorigsarneĸarumârput Anersâp ivdlernartup tanitsinera avĸutigineruvdlugo ilíniartitaunerdlo angnikínerussumik avĸutigalugo. angutit ugperdlutigdlo ĸinussartut autdlartitaujumârput oĸautsit Gûtimit oĸausersiatik ilungersortumik oĸalûtigiartûsavdlugit. Bâpalip ajortuliai sarĸúmersitaujumârput. nâlagauvfiup pissortai ikiortigalugit ilagît ilerĸorerĸussainik maleruartitsinerup kingunipilue, anersâlerissut akuliúnerat, pâvíkut issertortumik pilertortumigdle sujumukarnerat - tamarmik sarĸúmersitaujumârput. mianerssorĸússutitigut ilungersornartutigut tamákunatigut ínugtaussut itertitaujumârput, inuitdlo tûsintiligpagssuit taima oĸalungnermik tusagaĸángisáinarsimassut tusâjumârput. tupigusûtigssamingnik tusarumârpât ilagit tássaungmata Bâpale, úpísimangmatdlo támarnerpagssuane ajortuliarpagssuanilo píssutigalugit, sagdlusuíssutdlo ĸilangmit nagsiússarsiarissnne narrugisimangmago, tauvalo ajoĸersortigisimnssatik ornigdlugit ilungersortumik aperigpatigik tamáko ilumut taimáinersut, tauva palasiussut neriunartumik sujuligtuiumârput ersinerat tugpatdlersarumavdlugo tarnivdlo nalúngíssusia itertitaussoĸ ernumajungnaerĸuvdlugo. ĸavsîtdle inuínait oĸartugssáussusiat nãmagiumásángigpássuk mánalo tusarumásangmássuk "Nâlagaĸ taima oĸarmat", taimáitumik oĸalũssissartûssut farisîarit ĸanga oĸartugssáussusertik ĸularineĸalermat iliornerátut nalunaerut Sãtanip suliâtut únerdlûtigiumârpât, inugpagssuitdlo ajortigdlit kamagsarumârpait nalunaerúmik oĸalûtigingnigtut mitautigerĸuvdlugitdlo ĸinugissarĸuvdlugit.

akiũneĸ siaruariartortitdlugo inuitdlo erĸarsautait Gûtip inatsisânut tungmagaussumut sangmitíneĸaleriartortitdlugit Sãtane tamaviâleriartorumârpoĸ. píssauneĸarnerup nalunaerutip ilagissâta akerarissai narragtĩnarumârpai. palasiussut tamaviâvigdlutik ilungersorumârput ĸáumarĸut iserfigssaĸarĸunago pârissamingnigdlo ĸáumarsaerĸunago. sákugssausínaussut atortorisínaussatik sût tamaisa atordlugit aperĸutit pingârtut tamáko oĸaloĸatigĩssutigineĸarungnaersíniarumârpait.

ilagît silamiut pissortait píssauniligssuit ikiortigssarsiarinialerumârpait, taimailiornermingnilo katûgdlit nâggârtutdlo peĸatigîgkumârput. seĸernup uvdluata ivdlernartitaunigssâ píngitsailĩssutiginiardlugo ilungersûtigingningneĸ aulajangersimanerujartordlunilo sapĩnerulersitdlugo Gûtip inatsisânut nâlagtut akerdlilerniardlugit erĸartũssissut ikiortiginiarneĸalerumârput. akilîsitaunigssamik parnaerússaunigssamigdlo sujôrasârneĸarumârput ilaitdlo pingârutilingnik atorfinigtitaunigssamik akigssarsiagssanigdlũnît avdlanik neriorssorneĸarumârput ugperissartik isumákêrumaguníko. aulajaitsumigdle akíssutigssât imáikumârpoĸ: "támarsimanerput Gûtip oĸausiagut takutisiuk," tássa ássinganik atugaĸartitdlune Lutherip akíssutigissâ. erĸartũssissunut savssartitaussut sagdlusuíssut sákortûmik igdlersorumârpât, tusartutdlo ilait aulajangîssariaĸarumârput Gûtip inássutai tamaisa nâlagkumavdlugit. taimailivdlune ĸáumarĸut tûsintiligpagssuarnut sagdlusuíssutinik tamákunínga ilisarssísángíkaluartunut sarĸúmiússaujumârpoĸ.

Gûtip oĸausianut nâlarĸigsârniarneĸ pikigtitsinertut iliorfigineĸarumârpoĸ. Sãtanimit tagpîtdlisitauvdlutik angajorĸât ĸitornartik ugpertoĸ sukangavfigiumârpât, ítûssuvdlo ningiûssuvdlũnît kivfaĸ Gûtip inássutânut nâlagtoĸ ĸunutíniarumârpât. píssusigssâtut asangningnigssaĸ pêrukúmârpoĸ mêrĸatdlo kingornússissugssaujungnaersitauvdlutik ilaĸutarîngnit autdlartitaussarumârdlutik. Paulusip oĸausê erĸûtíneĸavigkumârput: "Kristusime Jîsusime Gûte mianeralugo inûjumassut tamarmik ĸinugineĸásáput." (2 Tim. 3, 12). sagdlusuíssutip ilungersûtigingnigtuisa seĸernup uvdluata sapâtigineĸarnigssâ nâlagkumángigpássuk ilait purnaerússaujumârput ilaitdlo inugsiatut pineĸarumârdlutik. tamána inûp isumaliortausianut mãnákut ĸularnardluínartutut íkaluarpoĸ; kisiáne Gûtip anersâvata kigaitdlagsainera inungnit pêrsitaugpat Sãtanimitdlo nâlagkersugaulerpata, táussuma Gûtip inássutai ûmigingmagit tupingnartunik pissoĸartarumârpoĸ. ũmatigdlit nãkigtáisínaussaĸaut Gûtimut mianeringningneĸ asangningnerdlo pêrúkângata.

anorerssuaĸ ĸanigdlilerpat, inugpagssuit íngilip pingajugssãnik nalunaerutânut ugpilersimassut, sagdlusuíssúmutdle nâlangnermut ivdlernarsarneĸarsimángitsut, avdlamik isúmertugssáuput akerdliussunut ilángutdlutik. silarssuarmut akuliúníkut táussumalo anersâvanut peĸataulerníkut táuko, silarssuarmik taimâgdlât pingârtitsissutut, isumaĸangajalersugssáuput, misiligauvfigdlo nagdliugpat oĸínerussoĸ atarĸineĸarnigssamut atassoĸ ĸinísavdlugo. angutit píkorigsut oĸatdlorigsutdlo, sujornatigut sagdlusuíssúme nuánâruteĸarsimagaluit, mãna pigínáussusertik atulísavât tarninik pututitsiniardlutik támartitsiniardlutigdlo. sujornatigut peĸatigisimassatik akerdlerinerpaussarilísavait. sapãmik ivdlernartitsissut erĸartũssivingmut savssartíneĸarpata ugpernertik igdlersúsavdlugo, táuko támarsimassut Sãtanip únerdlũssiniarnermine sákugivdluarnerpaussugssauvai, erĸúngitsumigdlo oĸauserissatigut perrôrtitsiniarníkutdlo, nâlagaussut táukunúnga kamagsârniásavdlugit.

ĸinugissaunerup nalâne tamatumane Nâlagkap kivfaisa ugpernerat misilingneĸarumârpoĸ. ilumôrdlutik mianerssorĸússut nalunaiautigisimavât Gûte oĸausialo kisîsa tunâralugit. Gûtip anersâta ũmataisigut súnîvigisimavait oĸalugtariaĸalersitdlugit. iluartumik ilungersorneĸ kajumíssutigalugo Gûtimitdlo sákortûmik kajumigsârneĸardlutik suliagssartik suliarilersimavât kingunigssai isumaliutiginagit, Nâlagkamitdlo oĸausersiatik ínugtaussunut oĸalûtigissarsimavait. timikut ítumik iluanârutigssartik sujunertarinago atarĸissaunertik inûnertigdlũnît erdligissarsimángilait. sukangassumigdle mitautigineĸaierdiutigdlo ĸinugissaulerunik ilait uípatdlerdlutik nivdlerumârput: "oĸautsivta kingunigssai ilisimasimagaluaruvtigik nipangersimásagaluarpugut." angnikitdliûtinik kaujatdlagáuput. Sãtanip sákortûmik ússerniartarpai. suliagssaĸ autdlarnigât pigínauneĸarneránut nalerĸiutdlugo artornardluínartutut ípoĸ. nungutitaunigssaĸ navianartorsiutigât. kajumigdluínássuseĸ misigissaraluat pêrúpoĸ. kisiáne tunuariarfigssaĸángitdiat. taimailigpat saperdluínalerfingmingne Gûte ĸimâvfigiumârpât ajugaĸángitsumit píssagtitaujartordlutik. erĸaiumârpât oĸautsit oĸauserisimassatik nangmingneĸ oĸauseríngíkitik, tássaussutdle mianerssorĸússúmik oĸariartortitsissup oĸausê. Gûtip sagdlusuíssut ũmatimingnut íkungmago sarĸúmiutíngitsôrneĸ sapersimavât.

ukiorparujugssuit ingerdlanerine Gûtip angutitai taimatut misilingneĸartarsimáput. Wickliff, Hus, Luther, Tyndale, Baxter Wesleylo ersserĸigsaissũput ajoĸersûtigissagssat tamarmik bîbilíkut misiligtariaĸarneránik, oĸartarputdlo bîbilip ajorissai tamaisa narrugissarumavdlugit. angutit táuko sukangaĸissumik ĸinugineĸarput, kisiáne sagdlusuíssut oĸalûtigiungnáingilât. ukiune ássigingitsune sagdlusuíssutit ilât naligissamut nalerĸútoĸ Gûtip ínugtaisa pissariaĸarneratut ilungersûtigineĸartarsimavoĸ. sagdlusuíssut nutâĸ tamatigut kigdlormôrneĸ, ûmigssuineĸ akerdlilînerdlo avĸutigalugît sujumukartitaussarsimavoĸ, sagdlusuíssutivdlo ĸáumarĸutânit ĸáumarsagaussut ússernartorsiortitauvdlutigdlo misilingneĸartarsimáput. Nâlagkap inuit sagdlusuíssúmik ingmíkut ítumik tunissarpai píssusiussut nâpertordlugit pissariaĸalerângat. kina sapîsersínauva oĸalûtigineĸarnigssâ pinaiserfigísavdlugo? kivfane perĸuvai sáimáunerup kingugdlermik ĸaerĸússutâ silamiunut oĸariartûtigerĸuvdlugo. tarnitik navianartorsiortíkumángíkuníkik nipangersimáinarneĸ saperput. Kristusip autdlartitai kingunerineĸartugssat uníssutigineĸ saperpait. suliagssarititaussoĸ suliarissariaĸarpât kinguneralo Gûtimut isumagissagssángortitdlugo.

akerdlũîneĸ sákortusiartortitdlugo Gûtip kivfai angnikitdliorĸigkumârput. angnikitdliorfingmik pilersitsisimassutut misigiumârput. kisiáne tarnip nalúngissusiata Gûtivdlo oĸausiata pâsitíkumârpai erĸortumik iliorneránik, misiligaujuaraluardlutigdlo atúsavdlugit nakússagtitaujumârput. akiũneĸ ĸanigdliartordlunilo sákortusiartorumârpoĸ, ajornartorsiutitdlo agdliartorumârput. navsuerutât imáipoĸ: "Gûtip oĸausia avdlángortísavdlugo ĸunugârput, inatsisâ iluartoĸ avigsínáungilarput ilâ pingârtutut ilâlo pingâruteĸángitsutut oĸautigísavdlugo, tamatumûna silamiunit iluarineĸarumavdluta. Nâlagkap kivfartũssavta aniguisísínauvâtigut. Kristusip píssaunerit silamiûssut ajugauvfigisimavai, uvagutdlo silamiut ajugauvfigineĸarêrsimassut ĸunugísagaluarnerpavut?"

ĸinugingningneĸ avdlángorartunik píssusilik ingerdláneĸartuarumârpoĸ Sãtane kristumiússuserdlo ûmássuseĸaratdlartitdlugit. kialũnît Gûte kivfartũsínáungilâ târtup katerssârssuinit akerartorneĸalísanane. íngilipiluit sãssukumârpait súnînerata pissagssaraluamingnik arsâlermatik. inupiluit iligiumârpait maligagssiuinera nangminermingnut agssuardliutaungmat, pilerinartunigdlo ússerniarumârpât Gûtimit avigsârtíkumavdlugo. ússernartorsiortitsinerit kinguneĸángíkângata nalúngeĸatigingníssusia píngitsailiniarumârpât.

íngilit pingajuata nalunaerutânik nalunaeĸataussup íngilip nâlangnássutsimigut nuna tamât ĸáumarsásavâ. tássûna silarssuaĸ tamákerdlugo sulinigssaĸ sákortungârtugssaĸ sujuligtûtigineĸarpoĸ. 1840-1844-me adventisiorneĸ Gûtip píssauneĸarneranik nuáningârtumik sarĸúmersitsineruvoĸ; íngilip sujugdliup nalunaerutâ silarssuarme ajoĸersuiartortitaĸarfingnut tamanut oĸariartûtigineĸarpoĸ. nunaĸarfîtdlo ilaine soĸutigingnilerneĸ nuname sumilũnît ukiut 1500-gdlit kingornagut angnertunerpausimassoĸ pilersitauvoĸ. íngilitdle pingajuata mianerssorĸussinerane ingerdlatsinigssaĸ sule angnertunerujumârpoĸ.

sulinerujumârpoĸ pînsip nagdliútuane suliarineĸartup ássinga. sôrdlo "sialuit piârtut", anersâp ivdlernartup îvangkîliup autdlartínerane túniússaussut siaruartigkat pútúsínaorĸuvdlugit, taimatut "sialuit kingorĸutsissut" torarumârput naggatâne katerssugagssat ineriterĸuvdugit.

îvangkîliup suliarssua nãmagsineĸásaoĸ Gûtip nukingata sarkúmersíneĸarneranik, táussuma autdlarĸautânit ilisarnautigissânit inornerúngitsumik.

ungagingningnermit iluartumit ĸaumassunik kînaĸardlutik Gûtip kivfai tuaviordlutik angalaorumârput ĸilangmit nalunaerut oĸariartûtigissardlugo. mianerssorĸússut nunarssuaĸ tamákerdlugo nipinit tûsintiligpagssuarnit akisuatíneĸarumârpoĸ, náparsimassut ajorungnaertitaujumârput, ugpertunísaordlo nalunaeĸutinik tupingnartulianigdlo pissoĸartarumârpoĸ. Sãtanísaoĸ sagdlup tupingnartuliaisigut suliumârpoĸ ingnermigdlo nunamut agdlât inuit tákuáne nákartitsivdlune. (sarĸ. 13, 13). taimatut nuname najugagdlit aulajangîssariaĸartitaujumârput.

nalunaerut agssortũssutitigut pivatdlârnane Gûtip anersâta itisûmik ĸularungnaersitsineragut sujumukartitaunerujumârpoĸ. agssortũssutit navsuiautitdlo sarĸúmersitausimáput. siaruartigagssat siaruarterneĸarumârput, mãnalo sivkerdlutigdlo paormanigkumârput. atuagagssiat ajoĸersuiartortitanit siaruarterneĸarsimassut súniuteĸarsimáput, kisiáne inugpagssuit isumaliortautsimíkut nãmagtumik pâsísavdlugo nâlásavdlugulũnît akornuserneĸarsimáput. mãnákut ĸaumanerup ĸíngornere tamane apũkiartorput. sagdlusuíssutip ersserĸíssusia pâsineĸarpoĸ, Gûtivdlo ĸitornaisa ilumôrtut ĸilerssûtigissatik kigtoralerpait. ilaĸutigissanut ilagîgsoĸatigîngnutdlũnit atássutigissatik uníssutigisínaujungnaerpait. sagdlusuíssut avdlanit tamanit erdlingnarneruvoĸ. píssaunerit sagdlusuíssúmut akerartuissut ĸavsît kátúsimagaluartut, taimáitordle inugpagssuit Nâlagaĸ iligiumavdlugo aulajangersimáput.