akiũnerssuaĸ kapitel 38. Fra side 325tilbage

Gûtip ínugtaisa aniguisitaunigssât

Gûtip inatsisânik atarĸissaĸartut inuit inatsisaisigut sernigineĸarungnaerpata nunane ássigĩngitsune tamatumúnga ingerdlaĸataussunik nungutíneĸarnigssât sulíssutigineĸarumârpoĸ. pivfigssaĸ perĸússúme aulajangigaĸ ĸanigdliartortitdlugo inuiaĸatigît isumalioĸatigîgkumârput ingmíkôrniaĸatigît ûmigissat nungúniarumavdlugit. aulajangerumârput únuaĸ atauseĸ sãssússerujugssuarumavdlutik nipe avdlanardlunilo agssuardlerpalugtoĸ nipangersíkumavdlugo.

Gûtip ínugtai - ilait parnaerússivît inêrainîtdlutik ĸáĸanilo ĸimâvfingne avíngarusimassumĩtut - Gûtimit sernigineĸarnigssamingnik sule ĸinujumârput angutit sákugdlit íngilipilugssuarnit kajumigsârneĸardlutik toĸorainiarnigssamingnut piarêrsartitdlugit. taimailigpat, angnikitdliornerpâvfikut, Israilip Gûtiata ĸinigkane aniguisíkumârpai. ajugausimârtumik nivdliavdlutik, mitautigingnigdlutik perdlorĸussivdlutigdlo inupalârssuit pissagssatik sãssúnialerugtorait, taimailerugtortoĸ târssûp únuap târneranit ĸernernerussup nuna ĸagdlerumârpâ. taimailissúkut neriussâĸ Gûtip igsiavíssârssuanit ĸaumatíneĸartoĸ ĸilákut siârtíneĸarumârpoĸ inuit peĸatigĩkûtârdlutik ĸinussut tamaisa kaujatdlagtutut itdlugit. kamagtorpagssuit tússángáinaĸ unigtitaujumârput. mitautigingnigtumik suaornerat nipaerúkiartorumârpoĸ. ĸinugingârdlugit toĸorarumassatik puiorumârpait. Gûtip angerusiata nalunaeĸutâ ernumavdlutik issigiumârpât ĸaumangârneranutdlo sernigineĸarnigssartik erinigalugo.

Gûtip ínugtaisa nipe ersserĸigdlunilo tusarnersoĸ tusarumârpât oĸartoĸ: "ârdloritse!" ĸilagdlo ârdlorfigititdlugo neriorssûtip neriussâva takujumârpât. nuiarssuit ĸernerdlutik ârdlerinartut ĸúpersitaujumârput, Stivfânusitutdlo ĸilak issigiuardlugo Gûtip nâlangnássusia inûvdlo ernera igsiavíssârssuarmine igsiassoĸ takujumârpât. Gûtisut timâne nikanarsagausimanerata nalunaeĸutai takujumârpait, ĸarnanitdlo ĸínut atâtaminut íngilinutdlo iluartunut oĸautigissâ tusarumârpât: "uvavnut túniússatit uvavnêrĸuváka najugkavne, uvavnut nâlangnássuserititat táukunúnga takorĸuvdlugo." (Juán. 17, 24).

nipllo tutsiuterĸigkumârpoĸ tusarnerdlunilo ajugausimârpalugtoĸ, ima oĸartoĸ: "aggerput! aggerput! iluardlutik, píngitsûvdlutik narrunarsagaunatigdlo. nikatdlujuînígssamik oĸausera atatísimavât, íngilitdlo akornane angaláusáput." ugperissamingnigdlo aulajangiússisimassut ĸardlumingnit sajugtunit ajugaunermik nivdlerumârput.

Gûtip píssaunine únuap ĸerĸane sarĸúmersîkumârpâ ínugtanilo aniguisitdlugit. seĸineĸ nuiumârpoĸ pisínaunine tamât ĸáumarsautigalugo. nalunaeĸutit tupingnartuliatdlo pilertoĸissumik tugdlerîârdlutik piumârput. gûtîtsut issigissagssat ánilâĸalutigdlo tupigutsaĸalutik issigiumârpait, iluartutdlo nalunaeĸutit aniguisitaunermingnut nalunaeĸutitut issigiumârpait. silame sût tamarmik ilerĸumigtut íkungnaerumârput. kûit kûgkungnaerumârput. nuiarssuit târtut sarĸúmerdlutik ingmingnut aporáukumârput. ĸilait kamagtut ĸerĸine atautsimik nâlangnartorssuaĸarumârpoĸ, tássángalo Gûtip nipâ ermit ĸavsît nipãtut tutsiutdlune oĸarumârpoĸ: "perêrpoĸ." (sarĸ. 16, 17).

nipip tamatuma ĸilait nunalo sajugtíkumârpai, nunalo sajugtorssuángorumârpoĸ "nuname inoĸalerĸârneranit nuna tailla ítumik taima agtigissumik sajugsimángisáinartoĸ" (sarĸ. 16, 17. 18). ĸilait angmarneĸardlutigdlo matussutut íkumârput Gûtivdlo nâlangnássusia tutsiúkumârdlune. ĸáĸarssuit aulajumârput ivigkatut anorimit aulatîneĸartutut, ĸaersuminerssuitdlo tamanut tamaunga miloriúneĸartarumârdlutik. sujorssugpalugssuaĸ anorerssuartut pitoralersutut ítoĸ tutsiúkumârpoĸ. imaĸ magdlersupilugssuángorumârpoĸ. anoripilûp anersâpiluitdlo aserorteriartortut nipât tusarssaujumârpoĸ. nunarssuaĸ ímap maligssuisut aulajumârpoĸ. ĸâva ĸupissarumârpoĸ ĸeĸertatdlo nunagineĸartut pêrutdlutik. igdloĸarfît umiarssualiviussut gûtĩssutsimíkut Sûtumángorsimassut imarssuarmit ĸarssutitíneĸarumârput. Bâpale angisôĸ Gûtimit erĸaineĸarsimásaoĸ "ermuseĸ vĩnimik kamangnerata katsungaitsup pianik imalik táussumúnga túniúneĸarĸuvdlugo". natarĸornarssuitdlo tamarmik "oĸimailutarssuartut oĸimaitsigissut" aserorteriumârput (sarĸ. 16, 19. 21). nuname igdlorpagssuaĸarfît takoránernerit aserortigaujumârput. igdlússârssuit silamiut akimanertaisa pingârniutigalugit akigssaiautigisimassait pigingnigtue issigititdlugit úpikâtíneĸarumârput. parnaerússivît ĸarmarssue ĸupissarumârput Gûtivdlo ĸitornai ugperissartik píssutigalugo parnaerússausimassut aniguisitauvdlutik.

ilerfit angmagaujumârput "amerdlasûtdlo ivssup seĸungnerine sinigtut iterumârput, ilait inûnermut nâgssáungitsumut, ilaitdle kángusungnermut maujungnarnermutdlo nâgssáungitsumut." (Dân. 12, 2). íngilit pingajuata nalunaerutâ ugperalugo toĸusimassut tamarmik nâlangnarsisitauvdlutik ilivermingnit aniumârput Gûtivdlo inatsisiminut nâlagsimassunut erĸigsinigssamik angerusia tusásavdlugo "táukútaoĸ táussumínga kapississut" (sarĸ. 1, 7). toĸulernerane Kristusimik mitautigingnigtut sagdlusuíssutânigdlo ínugtainigdlo akerartuinerpausimassut makíkumârput nâlangnássusiane takúsavdlugo ilumôrdlutigdlo nâlagsimassut atarĸinarsagaunigssât takúsavdlugo.

nuíssat torssusût sule ĸilak matusimavât, ilãníkutdlo seĸineĸ Jehovap issâtut akiniaissutut issíkoĸardlune pitarútarumârpoĸ. ingnâtdlagiarssuit ĸilangmit anitdlagtarumârput nunalo ingnermik uligdlugo. kagdlernerssuanit nipitunerussumik nipit nalunarpalugdlutigdlo ánilârnartut tutsiútarumârput gûtîtsut piunêrúneĸarnigssât nalunaerutigalugo. oĸautsit oĸauserineĸartut tamanut pâsigssáungíkaluartut ajoĸersuinerdlugtut ersserĸigsumik pâsiumârpait. tássa tauvánguaĸ kigdlormôrdlutik ajugausimârdlutigdlo nãkigtáikaluaĸissut Gûtip ínugtainut nâlagtunut, mãna ánilânganermit sajugkumârput. ániardlutik nivdlianerat silapilungneragut tusarssaujumârpoĸ. anersâpiluit Kristusip Gûtiússusia pâsiumârpât píssauneĸarneranutdlo sajugdlutik, inuitdlo sáimáuneĸarnigssartik kimigîserdlutik ĸínutigiumârpât nãkinartumik ĸunuvdlutik paormortitdlutik.

nuíssap ĸúpâgut uvdloriaĸ ĸaumajumârpoĸ, ĸaumaneralo sisamariáumik sákortusiumârpoĸ târnerup nalânut. ilumôrtut erĸigsinigssamik tipaitsungnigssamigdlo nalunaerfigai Gûtivdlo inatsisânik uniorĸutitsissut sukanganermik kamáuneĸarnigssamigdlo nalunaerfigalugit. Kristuse píssutigalugo erdligissaĸaratik pigdliuteĸarsimassut mãna erĸasûtigssaerúput, Nâlagkap tovĸane issertugavdlutik. misiligausimáput, pivdlutigdlo toĸussumut ilumôrnertik silamiunut sagdlusuíssúmigdlo narrugissaĸartunut ugpernarsarsimavât. táukoiluássutsimingnik aulajangiússisimassut, agdlât toĸulernermingne, tupingnartumik avdlángorsimásáput. tássángáinaĸ inungnit diâvulúngorsimassunit ĸunutitaunermingnit aniguisitausimáput. kînait ĸanigtúnguákut asingavdlutik ernumarpalugdlutik aliasugpalugdlutigdlo nãkinarpalugsimagaluartut mãna tupigusungnermit, ugpernermit asangningnermitdlo ĸaumalerput. tipaitsugdlutik ajugausimassutut agpíkumârput: "Gûte tássa ĸimâvfigput píssauterput, angnikitdliornartúkut ikiuissartoĸ misiligauvdluartoĸ. tamána pivdlugo ersísángilagut, nuna avdlángoraraluarpatdlũnît, ĸáĸarssuitdlo aulaleraluarpata imarssuit ĸiterpiãne; maligssue igtugtorssûvdlutik ĸagfiumissâraluarpata, ĸáĸarssuit sajugtitdlugit inertigagssáungíneranit." (tugs. 46, 2-4).

oĸautsit táuko iluartumik isumavdluarnermik nalunaerutaussut Gûtimut ĸutdlariartortitdlugit nuíssat pîagaujumârput uvdloriarpagssuitdlo sarĸúmerdlutik târnerup nalânut takoráningârdlutik. igdloĸarfiup ĸilangmĩtup ĸaumangârnera isâvfigtigut angmassutigut aniajumârpoĸ. tauva agssak ĸilaup ĸilãngussâta nalâne takúkumârpoĸ agdlagfigssianik mardlungnik peĸitigaussunik tigumiardlune. pruvfîte oĸarpoĸ: "ĸilak tagpavna ĸaerĸussivfigâ, nunalo, ínugtane erĸartũssíssutigiumavdlugit." (tugs. 50, 4) inatsit iluartoĸ tamána, Gûtip nâpertuivdluássusia, kagdlernerup ingneruvdlo nalâne Sinaime inûnerme ilerĸugssatut nalunaerutigineĸarsimassoĸ, mãna inungnut sarĸúmersitauvoĸ erĸartũssinerme najorĸutarissagssatut. agssaup agdlagsimavfît angmarpai, inatsisitdlo ĸulit agdláumit ingnerussumit agdlagsimassutut issigissagssaulerput. oĸautsit ersserĸingârmata tamarmik atuarsínáusavait. erĸaimatdlarĸíssuseĸ sákortusarneĸásaoĸ, ugperissapalât ajoĸersuinerdlûtitdlo eĸungassumik ajoĸersûtait tamane pêrutísáput, Gûtivdlo oĸausê naitsumik navsuitsumik nâlangnartumigdlo nuname najugalingnut tamanut sarĸúmiúneĸásáput.

Gûtip iluartumik perĸussainik tugdlârissaĸarsimassut sujôravdlutigdlo isumatsangârnigssât oĸalugtuarineĸ ajornarpoĸ. Nâlagkap inatsisiminik tunivai. píssusertik tamatumúnga ássersũsínausimagaluarpât amigautigissatigdlo perĸigsiminigssamut sângniarnigssamutdlo pivfigssaĸaratdlartitdlugo ilisarisínausimagaluardlugit; inássutigissaile uniorĸutítarpait inoĸatitigdlo uniorĸutitsinigssamut ilíniartitdlugit. Gûtip ínugtai píngitsailiniarsimavait sapâtâ ivdlernartoĸ narrunarsarĸuvdlugo. mãna erĸartũneĸásáput inássut narrugisimassartik nâpertordlugo. ánilârnavigsumik pâsiumârpât utorĸatsíssutigssaĸarnatik. kivfartũkumassartik patdlorfigiumassartigdlo ĸinersimavât. "tauva uterdluse takujumârpase ĸanoĸ ássigĩngitsigissut iluartordlo iluaitsordlo, Gûtip kivfartũssissâlo kivfartũssissigíngisâlo." (Mal. 3, 18).

Gûtip inatsisâta akerai, oĸalũssissartunît mingnertât ilángutdlugo sagdlusuíssut pissugssáussuserdlo nutâmik pâsissaĸarfigísavait. kingusinârtumik pâsiumârpât sapât inatsisit sisamãne perĸússutigineĸartoĸ tássaungmat Gûtip ûmassup naĸíssutâ. kingusinârtumik pâsiumârpât sagdloĸítáumik sapâtigissartik sunaussoĸ, igdluliorfigisimassamigdlo sioráussusia pâsivdlugo. pâsiumârpât Gûte akerdlilerdlugo akiũsimavdlutik. ugperissagssanik oĸalûtigissaĸartut tarnilingnik támartitsissarsimáput pâratîsip isâvfînut ingerdláneraraluardlugit. uvdloĸ naggámik nautsorssuivfigssaĸ nagdliugpatangutit ivdlernartumik atorfigdlit ĸanoĸ agtigissumik akissugssáussuseĸarnerata ilumũngíneratalo ĸanoĸ kingunipiloĸartigisínáussusiat aitsât pâsineĸarumârpoĸ. nâgssáungitsume aitsât tarnip atausĩnángûp támartitaunera nãmagtumik pâsisínaujumârparput. nãkinásaĸaoĸ Gûtip ima oĸarfigiumâgâ: "nigorit, kivfapalaussutit ûmâ!"

ĸilangmit Gûtip nipâ tutsiúpoĸ uvdloĸ akúnerdlo Jisusip tikiuvfigssâ angeruseĸ ítuínartoĸ ínugtainut túniúkiartordlugo nalunaerutigigâ. kagdlerssuartut oĸausîsa nuna kaujatdlagkiartorpât. Gûtip israilíkue nâlaordlutik ĸeĸarput, issitik ârdlungatitdlugit. kînait ivdlernássusianit ĸáumarsagaujumârput sôrdlo Môrsasip kînâ Sinaimit arĸarnerane ĸáumarsagaussoĸ. gûtîtsut táuko issigísavdlugit sapísavait. pivdluarĸuneĸarpatalo nipitôrssuarmik ajugaussutut suaorneĸarumârpoĸ.

kangiane nuiánguaĸ angutip agssâta agfâtut angitigigunartoĸ tákutilertorumârpoĸ. tassa nuiaĸ ánáussissup uligissâ, ungasianitdlo târmit uligsimassutut íkumârpoĸ. Gûtip ínugtaisa nalúngilât tamána inûp ernerata nalunaeĸutigingmago. kivdlingnartup pianik nipangersimavdlutik nunamut ĸanigdliartortitdlugo ĸaumanerujartordlunilo nâlangnarsiartortitdlugo issigiumârpât, kîsalo nuiarssuángorumârpoĸ ĸaugdlorigsoĸ, atimigut ingnertut tamanik nungutsissutut ĸaumatigalune angerutsivdlo neriussâvanit ĸulangerneĸardlune. Jîsuse ajugaussutut píssarssuartut ĸimugserdlune aggerumârroĸ - mãnákut ániartitaujartornane narrunarsagaujartornanilo. "ilumôrtumik sagdlusuitsumigdlo taineĸarpoĸ erĸartũssinermigutdlo sorssungnermigutdlo nâpertuivdluarpoĸ. . . . katerssatdlo ĸilangmiussut maligpât." (sarĸ. 19, 11. 14). íngilerparujugssuit ingerdlaĸatigiumârpât ĸilangmiorpalugtumik erinalingmik ajugauneĸ tugĸlutigalugo. ĸilaup ĸiláungussâ íngilinik ĸaumassunik ulivkârtutut íkumârpoĸ - "tûsintit ĸuligdlit tûsintilingnik ĸuleriarsimassut tûsintigdlitdlo tûsintileriarsimassut." inuínaup issigissagssat tamáko nãmagtumik agdlautigineĸ saperpai toĸujassut nâlangnássusiat takordlôrneĸ saperpât. "naleĸángíssutâta ĸilak matôrpâ unersiutigingningnerata nuna tamákerpâ. akisungnera ĸáumartutut ilivoĸ." (Hâp. 3, 3. 4). nuiaĸ sule ĸanigdlinerutitdlugo tamarmik inũssutip nâlagâ issigisínãngúsavât. niaĸua mãna niaĸorúmik kapinartulingmik narrunarsagáusángilaĸ, nâlangnássutivdle niaĸorutâ ĸaormiorísavâ. kînâta seĸineĸ uvdlup ĸerĸane ĸaumaneragut akisungnermigut ĸângísavâ. "ĸagdlersáumigutdlo ĸitermigutdlo agdlagsimassumik ateĸarpoĸ imáitumik: kúngit kúngiat nâlagkatdlo nâlagât." (sarĸ. 19, 16).

"tamarmik kînait asíngarput" táussuma sâvane, Gûtivdlo avâgingníssusianik narrugingnigsimassut isumatsagdlutik ersingâlerput. "ũmatait nâsângáput, sêrĸue patajáput, tamarmik kînait asingáput". (Jer. 30, 6; Nâg. 2, 11). iluartut sajugdlutik tordlulajumârput: "kíkut atasínáusápat?"

íngilit tugsiarungnaerput, ilungersornartumigdlo nipaitdlivoĸ. tauva Jîsusip nipâ tutsiúkumârpoĸ oĸardlune: "sáimáunera nãmagísavarse." iluartut kînait nuánârpalulerput tamarmigdlo ũmatimíkut tipaitsulerput. íngilit agperĸigput, mãna nipitunerussumik, nunalo ĸanigdliartordlugo tugsiarumârput.

kúngit kúngiat nuiákut arĸariartorpoĸ ingnermit ikualassumit uligsimavdlune. ĸilait atuagatorĸatut imuneĸarput. nuna sujornane aulavoĸ, ĸáĸatdlo ĸeĸertatdlo inigissamingnit igdluartitáuput. "Gûterput aggerpoĸ nipangísananilo! - ingneĸ nungutsivoĸ sujornagut, avatâgutdlo anorerssuarpoĸ. ĸilak tagpavna ĸaerĸussivfigâ, nunalo, ínugtane erĸartũssíssutigiumavdlugit." (tugs. 50, 3. 4).

mitautigingnigtumik ĸuiasârutit nipangiúneĸarput. sagdlup ĸarne nipangersitáuput. sákut nipât sorssugtutdlo uiverpalugtumik nipiliornerat "atissatdlo aungmut agssatdlagsimassut" (Is. 9, 5) áungariartorput. tusarssaussutuaulerput ĸinuniarneĸ, ĸianeĸ nimârnerdlo. ĸarnit ĸanigtúnguákut mítatigdlîssut nivdlerumârput: "uvdlorssuaĸ kamautip uvdlua nagdliúpoĸ, kíkutdlo atasínáusápat?" gûtîtsut ĸinujumârput ĸáĸat ĸaersutdlo atãnut matôrneĸarumavdlutik nikagalugulo narrugisimassartik kînarsiumanago.

nipe tamána toĸusimassut siutáinut tutsiútoĸ ilisarât. ĸavsêriardlutik tamatumánga saimassumik ilungersortumigdlo oĸaorĸigsârneĸarsimángínerpat sângniarĸuneĸardlutik? ĸavsêriardlune ikíngutip, ĸatángutip utertitsisiniartuvdlũnît nipâgut oĸaorĸigsârivdlune akisuassarsimángínerpa? sáimáuneranik narrugissaĸarsimassunut táussuma nipâ tamanit sujôranarnerpaujumârpoĸ taima sivisutigissumik kimigîsertarsimassoĸ: "sâgitse, sâgitse ingerdlavivsínit ajortunit; sôĸ toĸujumavise?" (Hisk. 33, 11). takornartavdlũnît nipigigaluarpagutoĸ una! Jîsuse oĸarpoĸ: "tordlulagaluarama piumángitsusile, agssáka isagtíkaluaravkit nalunaerssuissoĸángitsordle, sujúnersûtíkalo tamaisa taimaitíkavsigik inerterĸutíkaio piumanagit." (úss 1, 24. 25). nipe táuna erĸaisitsivoĸ puiorumagaluagáinik - mianerssorĸússutinik nikagissamingnik ĸaerĸússutinik ilagsíngisamingnik iluaringnigkumanernik soĸutigisimángisamingnik erĸaisitsivoĸ.

inoĸarsimavordle nikanarsagaunerane Kristusimik mitautigingnigsimassunik. táukua erĸaimavdluarumârpait Jîsusip oĸausê palasiunerup ugpernarsaivdlune akerĸungmane oĸauserissai: "matuma kingornagut inûp ernera takujumârparse píssaunerup talerpiata tungâne igsiassoĸ ĸilauvdlo nuiaisigut aggersoĸ." (Mat.26, 64), píssauneruvdlo talerpiata tungâne igsiatitdlugo takujumârpât.

Gûtimit ernerineĸardlune oĸausianik mitautigingnigtut mãna nipangersitáuput. tamássa Herûtase akimaniartoĸ Kristusip kúngiuneranik mitautigingnigtoĸ sákutûtdlo perĸuvdlugit kúngisut niaĸoruserĸuvdlugo. tamássa angutit iluaitsut Jîsuse ĸagdlersáumik augpatdlarigsumik atitíkât kakitdlarnaĸutinigdlo niaĸoruserdlugo ĸauagut ivdlernartúkut, suvdlortûmigdlo agssaisigut talerpigdiertigui tigúmisíkât, sêrĸumiarfigalugulo mitautigalugulo Gûtimik mitautigingnigtumik. angutit inũssutip nâlagânut ĸitserartut anauvdlugulo, táuko mãnákut ánernartumik issigingningneranut tunúkumârput nâlangnangãssusialo nigorterniardlugo. agssainik isigainigdlo kikiagtuissut sákutûvdlo sanerânik kapississup tamatuma nalunaeĸutai uípatdlerdlutik perĸigsimivdlutigdlo takujumârpait.

sagdlusuíssúmik narrugissaĸartut tamarmik ilãníkut tarnimik nalúngíssusiata eĸêrnera misigissarpât, tauvalo inûnerdlungnermik erĸaimassaĸartarput, tarnimíkutdlo kingunigssaĸángitsumik perĸigsimineĸ erdloĸíssutigissarpât. tamána malungniúkumârpoĸ uvdloĸ ersiorfigssaĸ nagdliugpat "sujôragissarse nagdliugpat piunêrússinerssuartut, perdlugsiornigssarsilo nagdliugpat anorâsuatut!” (úss. 1, 27). taimailigpat perĸigsiminigssaĸ naleĸásángilaĸ. Kristusimik ínugtainigdlo piunêrússiniaraluartut nâlangnássusianik issigissaĸartitaujumârput. ĸunungâlerugtornermingne iluartut tipaitsugdiutik tordiulanerat tusâjumârpât: "tássa-una Gûterput utarĸissarput, ánáupâtigut." (Is. 25, 9).

nuna sajugtitdlugo, ingnâtdlagíssat ingnâtdlagtitdlugit kagdlerssuartitdluguio Gûtip ernerata iluartut sinigpârsimassut ĸaerĸujumârpai. iluartut ilerfe ĸiviardlugit agssane ĸilaup tungânut ĸutdlarumârpai tordlulavdiunilo: "iteritse, iteritse, iteritse, ilivse pujorailangme sinigtuse, makitdlusilo!" nunarssuarme tamardluínarme toĸusimassut nipe tamána tusâjumârpât, tusâssutdlo ûmajumârput nunarssuardlo tamarme pisugpalugtunit akisuajumârpoĸ inuiaĸatigîngnit ingmíkutdlo oĸausilingnit katerssârssuit savssalerpata. toĸup parnaerússivianit aniumârput toĸusuitsumik nâlangnássuseĸardlutik imalo tordlulavdlutik: "toĸo-â, ajugaunerit nauk, toĸo-âigûtit nauk?" (1 Kor. 15, 55). taimailissúkutdlo iluartut inûssut makítutdlo peĸatigîgdlutik tipaitsungârdiutik ajugáussutaussumik sivisûmik suaorumârput.

tamarmik ilivermit aniumârput ilissaunermingne angíssuserissartik angíssuseralugo. Adame makítunut ilaujumârtoĸ angisûmik nâlangnarpalugtumik timeĸarpoĸ. Gûtip erneranit mingnerulâgínardlune. kinguârîngne kingugdliussune inuit malungnaĸissumik ássigĩngíssuteĸarfigai, ássigĩngissutsíkutdlo tamatumûna inuit aserũkiartungârsimanerat takugssaujumârpoĸ. tamarmigdle inûsugtũssutsip pianik nukigtuvdlutigdlo perĸigdlutik ítuínartugssanik píssauneĸardlutik makíkumârput. autdlarĸautâne inuk píngortitauvoĸ Gûte ássersûtigalugo, píssuseĸ pĩnarnago ãmale timíkut kĩnákutdlo ítutigut. ajortuliorníkut Gûtimut ássingússuseĸ tamána eĸutitauvdlune pîagaungajagsimavoĸ; Kristusivdle ánaineĸartut iluarsiumavdlugit sujunertarâ. time nikanarsagaĸ timiminut nâlangnartumut naligîgsardlugo avdlángortíkumârpâ. time toĸujavdlunilo aserujassoĸ píníssusîtsoĸ ajortuliorníkutdlo narrunarsagausimassoĸ nãmagdluínartúngortíkumârpâ toĸusuitsúngortitdlugulo. iloĸiáussuseĸ akornutdlo sunaugaluartordlũnît iliverme ĸimataujumârpoĸ. utertitaussut kingumut Gûtip nautsîviane orpik inûnartoĸ ornigsínaussalerdlugo inuit autdlarĸautâne angíssusiat inûseríssusiatdlo angujumârpait. ajortuliat perdlûtaisa núngutait pîarneĸarumârput, Gûtivdlo ĸitornai sarĸúmerumârput "Nâlagkap Gûtivta píníssusiane" (tugs. 90, 17, tuluit bîbiliáne nugterneĸarneratut) anersãkut, tarníkut timíkutdlo Nâlagartik ássinguvdlugo. utertitaunerup sivisûmik oĸalûserissamik, sivisûmik neriûtigissamik sivisûmigdlo ĸilanârissamik tipaitsungnássusia!

iluartut ûmassut avdlángortitaujumârput "tássángáinaĸ, uisorĩnaĸ". Gûtip nipâgut nâlangnarsisitáuput, mãna toĸusuíssusermik atitíneĸásáput iluartutdlo makítut ilagalugit siláinarmut ĸutdlartitauvdlutik Nâlagaĸ nâpísavdlugo. íngilit ĸinigai katerssorpait "anorinit sisamaussunit, ĸilaup isuanit isuanut". íngilit iluartut mêránguit anânamingnit pákúneĸartugssatut ãkumârpait. ikíngutigît ĸangale toĸúkut avigsârtitaussut nâperĸigkumârput avigsârĸigtugssaujungnaerdlutik, únersiutinigdlo tugsiardlutik Gûtip igdloĸarfianut ĸutdlariartorumârput. .

Gûtip igdloĸarfianut isertínagit ánáussissup maligtigissane tamaisa ajugaunerup nalunaeĸutainik tuniumârpai kúngisutdlo nâlangnássusîsa ilisarnaĸutainik tunivdlugit. takoránersut sisamanik saneraligtut kúngertik kaujatdlagdlugo siagtitaujumârput, táussumalo timâ kúngerpalugtoĸ iluartunit íngilinitdlo ĸutsingnerujumârpoĸ, kînâlo ilungersortumik asangningnermit táukunínga ĸáumarsaiumârpoĸ. agssangminik talerpigdlermik Jîsusip nangminêrdlune ajugaussut nâlangnássutsimik niaĸoruserumârpai. tamarmik ingmíkut niaĸorutigssaĸarput inuata "atertâvinik" agdlagfigisimassumik (sarĸ. 2, 17) imalo agdlangneĸartumik: "Nâlagkamut pigititaĸ." tamarmik ajugaussup palmianik kúkilagtaríssamigdlo ĸivdlertumik tigumiartitaujumârput. íngilit nâlagât agpigpat tamarmik noĸartigdlit tusarnersumik píkorigsumigdlo nipilerssortíkumârpait. ũmatit tamarmik navsuiagagssáungitsumik tipaitsungnermik ulivkârumârput, tamarmigdlo ĸujamasugdlutik tugsiarumârput: "táussuma asagâtigut, aungmigutdlo ajortaiarâtigut, kúngiuvfíngortitdlutalo palasíngortitdlutalo Gûtimut atâtaminut; nâlangnaut píssaunerssuardlo táussuma pigiligit nâgssáungitdluínartumik!" (sarĸ. 1, 5. 6).

utertitat katerssũsimassut sujornánĩpoĸ igdloĸarfik ivdlernartoĸ. Jîsusip isâvfît sapangaussut angmarumârpai, inuiaitdlo sagdlusuíssúmik atatitsisimassut isâjumârput. Gûtip nautsîvia, Adamip ajorteĸángíkatdlarame najugâ, takujumârpât. tauvalo nipe erínamit inûp súkutdlũnît eríniânit tusarnernerussoĸ tusâjumârpât oĸartoĸ: "akiũnerse nãmagsivoĸ, ĸaigitse, atâtama pivdluarĸussai ukorsê! nâlagauvfik silarssûp túngavilerneĸarneranit ilivsínut piarîgaĸ kingornúniarsiuk."

navsuiagagssáungitsumik asangníssusilingmik Jîsusip ingminut ilumôrtut tikitdluarĸujumârpai "nâlagkamik tipaitsugfianut". ánáussissup nuánârutigissâ tássaujumârpoĸ nâlangnartup nâlagauvfiane tarnigdlit nâgdliungnermigut nikanarsagaunermigutdlo ánagtitausimassut takusínáusagamigit. utertitatdlo nuánâĸatigiumârpât pivdluarĸussat akornáne ĸínússinermíkut, sulíssússinermíkut nangminigssarsiujuíssutsimíkutdlo Kristusimut ínugtángortitaussut takuguníkik. igsiavíssârssuaĸ ĸaĸortoĸ katerssûvfigiguníko tipaitsungnerup oĸautsisigut navsuiarneĸarsínáungitsup ũmatait ulivkârumârpait Kristusip ínugtagssâtut isumaĸatigssarsiarissartik avdlanigtaoĸ ilagssarsisimassoĸ, táukulo ãma ilagssarsisimavdlutik - tamarmik erĸigsinerup umiarssualivianutdlusôĸ tulagdlutik, tássane niaĸorutitik Jîsusip isigaisa sãnut ilivdlugit nâgssáungitdluínartumigdlo únersiutigalugo.

aniguisitaussut Gûtip igdloĸarfianut tikitdluarĸuneĸartitdlugit nuánârnermik únersiutigingningnermigdlo suaorneĸ siláinákut tutsiúkumârpoĸ. Adame sujugdleĸ Adamivdlo áipâ nâpilerput. Gutip ernerata taline siârpai inuit nagguviat ilagsiumavdlugo, inuk táuna píngortitsissuminut ajortuliorsimassoĸ, ánáussissup sáningassulingmut kikiagtugaunerup nalunaeĸutautigissânik. Adamip kikiagssuit inait ánilârnartut takugamigit nâlagkaminut pákutitínane isigaisa sâve patdlorfigai manigũtumigdlo tordlulavdlune: "atarĸinarpoĸ, atarĸinarpoĸ savâraĸ toĸutaĸ!" ánáussissup asangnigtumik nikuitíkumârpâ Gûtivdlo nautsîvia taima sivisutigissumik anisitauvfigisimassâ ĸimerdlôrĸerĸuvdlugo.

naleritsavigdlune orpît ĸanga nuánârutigissartagkane ĸimerdlôrumârpai - orpît táukorpiait uvdlune ajorteĸángitsûvfingmine paormartorfigissartagkane. vĩneĸutit agssangminik iluarsáutarsimassane naussutdlo taimane pârísavdlugit nuánârutigissartagkane táulûssut takujumârpai. sût tamarmik piviússusiat pâsiumârpâ, Gûtip tamána nautsîvigigâ anisitaunerminit sule alianáinerulersimassoĸ. ámáussissup inûnartup orpianut tasiorumârpâ paormânigdlo tunivdlugo nererĸuvdlugulo.

Adame erĸaminut ĸinerdlune erĸardlerpagssuarminik Gûtip nautsîviane takussaĸarumârpoĸ. tauva niaĸorutse ĸivdlertoĸ Jîsusip isigaisa sâvinut iliumârpâ utertitsissordlo pákutdlugo. kúkilagtaríssamik kûltitigkamik agpíkumârpoĸ, ĸilauvdlo ĸilãngussainit tugsiut únershitaussoĸ akisuajumârpoĸ: "atarĸinarpoĸ, atarĸinarpoĸ, atarĸinarpoĸ savâraĸ toĸutaussoĸ ũmarĸigtordlo!" Adame erĸardlîsa tugsiuĸntigiumârpât niaĸorutsitigdlo ánáussissup isigaisa isâvánut ilivdlugit patdlorfigingnigtumik sikigfigiumârpât.

nâpeĸatigêrĸingneĸ tamána issigineĸarumârpoĸ íngilinit Adamip ordlunerane ĸiasimassunit, Jîsusivdlo makitdlune, ilerfit aterminut ugperumassunut tamanut angmarumavdlugit, ĸilaliarnerane nu anársimassunit mãna utertitsineĸ nãmagsineĸartoĸ issigilerdlugo agpitdlutik únersiutigingnigtut ingiaĸatigiumârpait.

"ímame igalâgssiaussame ingnermik akussatut ítume - Gûtip nâlangnássusia taimatut akisuatipâ - tássane igsiavíssârssûp sâvane katerssũsimajumârput nerssúmik ássinganigdlo arĸatalo kisitsisânik ajugauvfigingnigtut". (sarĸ. 15, 2). tamána pivdlugo Gûtip igsiavíssârssuata sânĩput nâlagfiutâne kivfartûtdlugo uvdlúkut únuákutdlo; igsiavíssârssuarmilo igsiassup tuperfigiumârpai. nuna takusimavât perdlerarfiuvdlunilo aserũnartumik nápauteĸartitdlugo, nangmingnerdlo nâgdliungneĸ, kângneĸ ĸilalernerdlo misigisimavait, kisiáne kingorna "kâlísanatigdlo imerusulísángitdlat, seĸernuvdlo sûvdlũnît kiangnerup tugfigísángilai; savârĸap igsiavíssârssûp ĸerĸanĩtup pâriumârmagit tasiordlugitdlo imermik puilassunut inûnerup pianut; Gûtivdlo ĸuvdlît tamaisa issáinit atdlarterumârpai." (sarĸ. 7, 14-17).

ánáussissup ĸinigai súkutdlũnît misiligauvfiup ilíniarfiane ajoĸersugaussardlutigdlo perorsagaussarsimáput. silarssuarme avĸusernit amitsut ingerdlavigissarsimavait, angnikitdliorfiuvdlo ûtsiviane salitaussarsimáput. Jîsuse pivdlugo akerartugauneĸ, ûmigineĸarneĸ mamardligaunerdlo nãmagissarsimavait. akiũnerne sákortûne maligtarsimavât; nangminigssarsiujuitdlutik pakatsinartut nãmagissarsimavait. nangmingneĸ misiligtagkamíkut ajortip nâgdliungnartua, píssauneĸarnera, pissũssutâ ánernartualo ilisarisimavait, maujugingnigtumigdlo issigât. ajortip pîagaunerata akisússusin pâsigamíko ũmatimíkut ĸujamasugdlutigdlo únersiutigingnigput ússernartumut pisíneĸángisáinartut nãmagdluartumik pâsisínáungisânik. asangningârput angisûmik isumákêrfigineĸaramik. Kristuse nâgdlioĸatigisimavât, taimáitumigdlo nâlangnássusiane ilagísavdlugo piúkúnarput.

Gûtip kingornússissugssai aggersimáput inêránguanit ĸulerît ĸutdlersáinit, parnaerússivingnit, toĸutsissarfingnit, ĸáĸanit, puilassuitsumit, nunap ĸârusuinit ímavdlo iternanit. "ajorssardlutik, angnikitdliordlutik nâgdliugtitauvdlutigdlo nuname angalassarsimáput". milliûnigdlit kángunarsagaoĸalutik ilissaussarsimáput Sãtanip támarnartuinut nâlagkumasimángínamik. inuit erĸartũssissuisa pinerdlugtutut ajornerpâtut erĸartũtarsimavait. mãnale Gûte tássauvoĸ erĸartũssissoĸ. (tugs. 50, 6). nunamiut erĸartũssutait atorungnaersitáuput. Nâlagkap ínugtame "narrugissaunerat pêrpâ". "taineĸarumârputdlo inuiangnik ivdlernartunik, Nâlagkap utertitainik." aulajangersimavoĸ "Sîunip alinsugtue pissísagíka, niaĸorúmik pínersáumik tunineĸarĸuvdlugit arssat taortigssãnik ûliamigdlo tipaitũmik aliasungnerup taortigssânik uligússamigdlo usornáumik anersâp nikatdlortup taortigssânik". (Is. 25, 8; 62, 12; 61, 3). sángĩkungnaerdlutigdlo, nikatdlungajungnaerdlutigdlo ĸunutitaujungnaerput. matuma kingorna Nâlagaĸ najortuínásavât. igsiavíssârssuaĸ savssarfigât nunamiut súkutdlũnît atissarisimassáinit pínernerungârtunik atissaĸardlutik. niaĸoruserneĸarput nunamiut kúngîsa súkutdlũnît niaĸorutáinit ĸaumanerussunik. nâlangnássutsip kúngiata tamarmik kînait ĸuvdlingiarsimavai aliasûtigssat tamardluínarmik pîagáuput. palminik aulaterivdlutik tusarningârtumik únersiúmik tugsiardlutik agpíput ĸilaup ĸilãngussâ akisuatitdlugo: "ánáussut Gûtivta igsiavíssârssuarme igsiassup savârĸavdlo pigât. íngilitdlo tamarmik igsiavíssârssûp avatâne utorĸauneritdlo táukua avatãne ûmassutdlo táukua sisamat avatãne ĸeĸarput, kĩnamingnigdlo igsiavíssârssûp sâne patdlorput Gûte patdlorfigalugo oĸardlutik: ãmen, pivdluarĸússut nâlangnautdlo ilisimássutdlo ĸujaniutdlo atarĸinautdlo píssaunerdlo nakũssutdlo Gûtivta pigai nâgssáungitdluínartumik!" (sarĸ. 7, 10.12).

mâne inûnivtíne utertitaunigssamik aperĸut tupingnangârtoĸ pâsiniásavdlugo taimâgdlât autdlarnersínauvarput. pâsingnigsínaunivtigut kigdliligaussúkut ilungersorĸigsârdluta narrunarsagauneĸ nâlangnássuserdlo, inûneĸ toĸulo, nâpertuivdluássuseĸ kamagingningnerdlo sáningassulingme nâpeĸatigîgsut isumaliorĸutigisínauvavut; kisiáne anersãkut pigínauneĸarnerput tamákerdlugo tamaviârtíkaluardlugo isumâ tamákerdlugo pâsineĸ saperparput. ánáussissup asangníssusiata sivisússusia, atitússusia, itíssusia ĸutsíssusialo issigiarssungnarput.

ánáussinerup ârĸigssũneĸarnera nãmagdluínartumik pâsineĸavingnaviángilaĸ, agdlât utertitaussut issigilerpata issigineĸarnermigtut, ilisarineĸarpatalo sôrdlo ilisaringnigdlutik. sagdlusuíssutdle nutâĸ tarnilingmut tipaitsugtumut siârneĸartuarumârpoĸ nâgssáungitdluínartumik. nauk nunap aliasûtai, ániautai ússernartuilo kipisimagaluartut perĸutâtdlo pîagausinmadlune, taimáitoĸ Gûtip ínugtaisa ánáussutigssamik akisusimássusia ersserĸigsumik silaĸartumigdlo ilisimajuarumârpât.

utertitaussut nâgssáungitdluínartumik Kristusip sáningassulia ilisimatusautigalugulo tugsiutigiuarumârpât. Kristusime nâlangnarsisitaussume Kristuse sáningassulingmut kikiagtugausimassoĸ issigiumârpât. puiúngisáinarumârpât táussuma píssauneĸarnermigut silarssuarmik tamanigdlo píngortitsivdlunilo atatitsissup, táussuma Gûtip asassâta ĸilangme kúngiussup kêrûpit serâvfitdlo ĸaumassut patdlorfigísavdlugo tipaitsûtigissâta - táussuma inuk ordlusimassoĸ makitingmago ingminut nikanarsarnermigut, ajortuliap pissũssutâ kángunautâlo nangmangmagit atâtamilo kĩnane ingminut issertoraluarmago nãmagingmago, silamiut támartut ánernartuánit ũmatine seĸumitdlugo Gûlgathap sáningassuliane toĸutautserdlune. táussuma, silarssuarmik píngortitsissup, inungnik asangningnermit nâlangnássutse igdluartitdlugo ingminik nikanartísínausimanera silarssuarme tamavingme únersiutigineĸartuardlunilo tupigusûtigineĸartuásaoĸ. inuiait utertitaussut utertitsissertik issigalugo atâtap nâlangnássusia kînânit akisuatitdlugo takuguníko, igsiavíssârssualo nâgssáungitdluínartumik ítuínartoĸ takuguníko ilisimavdlugulo kúngiuvfia soraiuitsũsassoĸ, tauva tusarnersumik agpíkumârput: "atarĸinarpoĸ, atarĸinarpoĸ savâraĸ toĸutaussoĸ uvavtínigdlo Gûtimut utertitsisimassoĸ nangmineĸ akisûmik aungmigut!"

sáningassugdlip nalunartuata nalunartut avdlat tamaisa navsuiarpai. ĸaumaníkut Gûlgathamit ĸáumarĸutaussúkut Gûtip píssusê ersigalugitdlo mianerisimassavut pínersutut unganartututdlo sarĸúmersitaujumârput. asangningnerup ivdlernássusermut, nâpertuivdluássusermut píssaunermutdlo kátúnera pâsinarsiumârpoĸ. igsiavíssârssua ĸutsigdlunilo takoránersoĸ issigititdlugo ãmátaoĸ Nâlagkap píssusia sáimáuníkut takugssauneragut takujumârparput, tauvalo arĸup asanartup isumâ sujornagornit pâsivdluarnerujumârparput: "atâtarput."

tauva pâsiumârparput táussuma kigdleĸángitsumik ilisimassaĸartup ánáukumavdluta avdlatut ajornavigsimassumik ernine túniútariaĸarsimangmago. tamatuma ĸujanartumik kingunerissâ tássa nunap inungnik utertitaussunik iluardlutigdlo pivdluardlutigdlo toĸusuitsunik inoĸartitausínaunigssâ. ánáussissup târtup píssaunerinut akiũnermigut angussâ tássa utertitaussut tipaitsungnerat Gûtip nâgssáungitsumik atarĸinautigssâ. tarnerdlo erdlingnangârmat atâtap akiliutigissaĸ nãmagâ; Kristusivdlo nangmineĸ túniússame angingârtup inerítitai takugunigit nãmagiumârpai.