Gûtimik ilisarssinek.

ássigĩngitsorpagssuit avĸutigalugit Gûte ingminik uvavtínut sarĸúmersíniartarpoĸ ingminigdlo inôĸatigingnilersíniartardluta. píngortitaussup misigíssutsivut sianíssutsivutdlo kipisuitsumik oĸalũtuarpai. ũmatip matusimángitsup tupigusûtigiumârpai Gûtip asangníssusia angingârssusialo agssaisa suliaisa nalunaiagait. siutip nalornissup tusarsínauvdlugulo pâsisínauvâ Gûtip oĸalungnera píngortitarssuákut. narssat ĸorssûssut, orpigssuit portoĸissut, orpît sivkersugssartángue naussutdlo, nuíssat ikerínákôrtut, sialuit, kũnguaĸ kûgpalaortoĸ ĸilagssûvdlo alutornássusia uvavtínut oĸalugput ĸaerĸuvdluta ilisarileriartorĸuvdlugo tamákunínga tamanik píngortitsissoĸ.

ánáussissup ajoĸersuinine ĸavsînik píngortitanĩtunik ilassarpâ orpît, tingmíssat, naussut, ĸagtorngit, taseĸ, ĸilak alianaitsoĸ mákulo uvdluínarne inûnerme nâpítagkat pissartutdlo sagdlusuíssutip oĸausertainut ilángutdlugit atortarpai inungnut ajoĸersiũssutine erĸaissáinarĸuvdlugit agdiât ulapitdlune ĸasussardlunilo sulinerup nalâne.

Gûtip suliane ĸitornaminut pingârterĸuvai nunavdlo najugarissavta alianaeĸutainik nuánâruteĸarĸuvdluta. pínersunik asangnigtûvoĸ, ĸagdlíkutdlo kajungernássuseĸartunit pingârnerutitdlugo inuk kussanartumik píssusilik asavâ.

Gûtip piumavâ minguíssuseĸ piuáissuserdlo agdliartortísagivut pínersauteĸardlutalo kussanássusermik nivtarsáutũngitsumik narssap naussuine takussartagkavtinik.

nâlaorumasinaruvta Gûtip pingortitaisa ilíniagagssamik pingârtorssuarmik nâlangnermik tateĸarnermigdlo ilíniartísavâtigut. uvdloríssanit ukiorparujugssuarne ingmingnut avĸutigerĸussákut ingerdlajuartunit atomimut mingnerpãnguamut píngortitat tamarmik pingortitsissup piumassâ nálagpât. Gûtivdlo píngortitane tamaisa isumagalugitdlo atatípai. silarssuarnigdlo kisíneritsumik isusigssáungitsumĩtunik atatitsissûjutigalune isumagãtaoĸ ĸupalorarssúnguaĸ sujôrassuteĸarane nipínguaminik nikanarpalugtumik ĸardlortartoĸ. inuit uvdluínarne sulivfingmingnukarângata ĸinunikut Gûte ujarângássuk, únúkut ínarângata uvdlãkutdlo makítarângata; pisôĸ igdlússârssuarmine nererssuartitsitdlarângat pîtsuvdlo ĸitornane nerrivingminut sutugagssaĸángingajaĸissumut igsâĸatigissarángagit atâtap ĸilangmiussup asangnigdlune tamaisa pârissarpai. ĸuvdlinik kûgtoĸángilaĸ Gûtip takúngisainik, ĸungujungneritdlo tamaisa arajutsíngilai.

tamána nãmagtumik ilumôrtumigdlo ugperĩnaruvtigo isumakulûtit iluaĸutáungitsut tamarmik pêrumârput. inûnerput mãnákut pakatsivigssaĸartigiungnáisaoĸ, tássa pingârtut pingãngitsutdlũinît Gûtimut perĸujumâravtigik isumakulûterpagssuarnit artorssíneĸarneĸ ajortumut oĸimáissusiánitdũnît aĸugdiârtitaussángitsumut. tauva anersãkut ĸasuersârnerme tipaitsugkumârpugut ĸavsêrpagssuit sivisôrssuarmik misiligsimángisãne.

sianíssutsivit kussanássuseĸ nunamiussoĸ tamât tipaitsûtigissarângássuk erĸaissaruk silarssuagssaĸ ajortip toĸuvdlo aseruinerisa patdlitagssaríngisât, perdlorĸússutip tarrânit tâgdlerneĸángisáinásassoĸ. erĸarsautigkut takordlôruk ánáussaussut inigssât, erĸainiarugdlo takordlûinernit pitsaunerpâmitdlũnît alianáinerungãsangmat. Gûtip tuníssuterpagssuine píngortitamĩtune uvavtínut túniússaine nâlangnarssusiata takutdlatsiáinartarparput, sôrdlo agdlagsimassoĸ: »issip takúngisáinagâ siutivdlo tusángisáinagâ inûvdlo ũmámiugíngisáinagâ Gûtip asassiminut piarêrsagâ.« 1 Kor. 2, 9.

taigdliortoĸ píngortitarsiortordlo píngortitaĸ avativtínĩtoĸ pivdlugo oĸausigssakaĸaut. kristumiordliuna nunap píníssusianik nuánâruteĸarnerpaussartoĸ tássane takussaramiuk asangningneralo malugissardlugo naussune, orpigkane orpingnilo. kialũnît ĸagtorngit ĸôrĸutdlo, kûit tatsitdlo Gûtip inungnut asangningnerata erssernerisut issigilersínaulersínagit nãmagtumik pingârtísínáungilai.

Gûtip sujulerssuinermigut anersâmilo ũmáme súnîssarnerisigut oĸalugfigissarpâtigut. píssutsine nalúngisavtíne avatangîssivtínilo avdlángorarnernilo uvdlut tamaisa avativtíne pissartune pingârdluínartunik ilíkagagssarsisínauvugut ũmativut táukunúnga ilagsingnerúsussuseĸarpata. Gûtip sujulerssuinermine suliai erĸaivdlugit tugsiausiortoĸ oĸarpoĸ: »nâlagkap isumagssuinerisa nuna tamákerpât.« »ilisimatûssoĸarune tamáko torĸordligit Nâlagkavdlo sáimáunera erĸarsautiginiardliuk.« tugs. 33, 5; 107, 43.

Gûtip oĸautsimigut oĸalugfigissarpâtigut. tássane Gûtip ĸanoĸ íssusia, inungnik ingerdlatitsinera utertitsineruvdlo suliarineĸarnerujugssua sule erssaringnermik sarĸúmersitáuput. tássane atâtaunerpât, pruvfîtit avdlatdlo angutit iluartut ingerdlausiat taimaníkorpiamit nivtarneĸarpoĸ. inûsimáput uvavtitut atugaĸartartut. Jâk. 5, 17. takuvarput ajornartorsiutinik uvagut atortagkavta ásserpiainik atugaĸartartut, ĸanoĸ ússernartune uvavtitut ordlussartut taimáitordle sapîtdlerĸigdlutik Gûtivdlo sáimáuneragut ajugauvdlutik. tarnána ĸimerdlôrtarângavtigo iluarnermik norĸainiarnivtíne ĸĩmagsarneĸartarpugut. misigissait pingârtorssuit atuarângavtigik, ĸaumassoĸ, asangningneĸ pivdluarĸússutitdlo nuánârutigissait suliardlo Gûtip sáimáuneragut nãmagsissât, tauva anersâp táussuma táukunúnga piumatdlersitsissup ũmativtíne piumatdlersitauneĸ iluartoĸ ikítarpâ kigsautigilersítardlugulo píssusîsigut ássigilerumavdlugit - Gûte ilagalugo táukutut ingerdlajumavdlune.

Jîsuse testamentitorĸame agdlagsimassut pivdlugit oĸarpoĸ (ĸanordlime testamentitâme agdlagsimassunut erĸorsimanerutigigaluarpat): »táukua nalunaiarpãnga." Juán. 5, 39. nalunaiarpât utertitsisserput, inûnermik nâgssáungitsumik neriungnivta tamarme tûngavia. bîbilivme tamarme Kristuse nalunaiarpâ. píngortitsinerme nalunaerúmit sujugdlerpâmit - »táussumûna píngitsumik atautsimigdlũnît píngortut píngortoĸángitdlat« - neriorssũmut kingugdlerpâmut: »ata, ĸilamiĸ aggerumârpunga." (Juán. 1, 3; sarĸ. 22, 12), atuarpavut suliai, nipâlo tusâvarput. ánáussissoĸ ilisarilerumagugko agdlagkat iluartut atuartákit.

ũmatit ilũngardlune Gûtip oĸausînik ímerneĸardle. imeĸ-una inũssutilik ĸilalingârningnik imeruersautigssaĸ. tássa neĸigssaĸ inũssutigssaĸ ĸilangmit pissoĸ. Jîsuse oĸarpoĸ: »inûp ernerata uvínga neríngíkuvsiuk, aualo imíngíkuvsiuk, iluvsigut inũssuteĸásángilase." oĸautsinilo navsuiarpai ima oĸarame: »oĸautsit ilivsínut oĸauserissáka anersauvdlutigdlo ûmássutáuput.« Juán. 6, 63. timivut nerissavtigut imigkavtigutdlo ineriartortitáuput, sôrdlulo silame ingerdlanerme ítoĸ taimatútaoĸ anersãkut ítune ípoĸ. erĸarsautigivdluagkavtauna anersãkut inûnerput píssusigssalertarâ nakũssuserdlugulo.

utertitauneĸ najorĸutauvoĸ íngilit itsuarumassât. utertitauneĸ utertitaussut nâgssáungitsugssame oĸalûserissaisa tugsiutigissaisalo erĸartornerpaujumârpât. mãnamît tamána pâsiniardluásavdlugo erĸarsautigivdluartalísavdlugulo pissariaĸángínerpa? Jîsusip nagdligtuingârnerssua asangningneralo pivdlutalo pigdliutâ itinerpâmik ilungersornerpâmigdlo erĸarsautigissariaĸarpavut. utertitsissivta igdlersuissivtalo píssuserpiâ erĸarsautivtigut uníngavigissariaĸarparput. ugpernerput asangningnerputdlo nakússagtitáusáput taima ĸilaup pê ĸimerdlôruvtigik, ĸínutivutdlo Gûtimut ilagsissagssaunerujartuínásáput ugpernermik asangningnermigdlo imaĸarnerujartuínásagamik. sujuneĸarpalungnerujartúsáput ilungersorpalungnerujartordlutigdlo. Jîsusimut soraiángínerujartortumik tatigingníssuseĸaleriartúsaugut uvdlutdlo nungutdlugit misigissarilisavdlugo píssaunera ingmigut Gûtimut ornigútunik tamanik pivdlualersitsissoĸ.

ánáussissup nãmagdluínássusia ĸimerdlôruvtigo kigsaut uvavtíne pilísaoĸ avdlángortíneĸardluínarumavdluta nutãngortitauvdluínarumavdlutalo táussuma minguíssusiata ássingane. kâgtutut imerusugtututdlo erinigísavarput patdlorfigissagssarput ássigiumavdlugo. Kristuse erĸarsautiginerujartortitdlugo avdlanut oĸalûserinerujartúsavarput silarssuarmutdlo sarĸúmiúnerujartúsavdlugo.

bîbile ilisimatûínait pivdlugit agdlangneĸángilaĸ. inuitdliuko nalingínaussut pivdlugit agdlangneĸartoĸ. sagdlusuíssutip pê pingârtorssuit pivdluarnigssamut pissariaĸartut seĸinertut ersserĸarigtigaut. kúkussoĸarsínáungilaĸ támartajârtoĸarsínaunanilũnît nangmingneĸ silaĸássutsimingnik najorĸutaĸardlutik Gûtip piumassâ erssarigdluartoĸ sarĸurrussoĸ pínago ingerdlaniartũngitsunik.

inûp kialũnît agdlagkanik ima isumaĸartitsiniarnera kisiat aulajangiútariaĸángilarput, Gûtivdle oĸausê nangminêrdluta pâsiniartariaĸarpavut. avdlat sivnerdluta isumaliortitariguvtigik uvagut pínata taimailiornivta píssaunikitdlisarumârpâtigut anersãkutdlo ítumik pigínáussutsivut nukigdiârtitdlugit.

erĸarsautigissariaĸartunik pigssaĸángínermit pigínáussutsit táuko erdlingnaĸissut ima iloĸíssersimatigisínáuput Gûtip oĸausîsa isumãnik itisûmik pâsingnigsínaujungnaerdlutik. erĸarsarsínáussuseĸ nakússagtitaussarpoĸ túngavigssanik bîbilimĩtunik pâsiniarĸigsârníkut agdlagsimassut agdlagsimassunut anersâvdlo pê anersâp pînut nalerĸiútardlugit.

avdla agdlagkanik iluartunik pâsiniarĸigsârnertut silaĸássutsíkut pigínáussutsinik nakússagsaitigisínáungilaĸ. atuagkat avdlat bîbilitut píssauneĸángitdlat, erĸarsautit ĸutdlartísavdlugit anersãkutdlo pigínáussutsit nákússagtísavdlugit bíbilip sagdlusuíssutai pingârtorssuit pitsángoriartortitsissartut kisimik píssauneĸarmata. Gûtip oĸausê pâsiniardluartariaĸarnermigsut pâsiniardluarneĸarpata inuit anersãkut ineriartorneĸ, tarnip atarĸinarnerulernera pilerssârutinilo aulajáissuseĸ nalivtíne ĸaĸutigôĸissumik takugssaussut angujumârpait.

íkátumigdle pâsiniarpiarane agdlagkane atuarneĸ ingmánguáinaĸ iluaĸutigssarsivigssauvoĸ. bîbile nâvdlugo atuarneĸarsínauvoĸ tusarníssusia pâsinago sujunertâlo itisôĸ issertugaĸ pâsinago. iluaĸutaunerussarpoĸ agdlagsimavfik atauseĸ erĸarsautigalugo isumâta erĸarsauvtivtíne pârinigssâ tikitdlugo ánáussiniarnermilo súkut atornera erssarigsitserdlugo kapitalerpagssuarnik atuarnermit sujunertarissaĸarpiarnane pâsíssutigssarsivatdlârnanilo; atuartaruk periarfigssaĸarângavit, agdlagsimavfîtdlo puiuíkiúniartákit. agdlagsimavfingmik atuagaĸarsínauvutit avĸusiníkutdlũnît ingerdlagaluardlutit erĸarsautigalugulo taimalo puiuíkiutdlugo.

ilisimássut aitsât angusinauvarput eĸiasuitsumik ilungersortumigdlo pâsiniainíkut Gûtivdlo anersâta ilitsersũssinigssâ ĸínutigalugo. ilumut agdlagkat iluartut ilâtigut erssaringârângamik pâsinerdlugagssauneĸ ajorput. agdlagsimavfîtdle ilaĸarput ĸiviatsiáinardlugit pâsineĸ ajornartunik isumât sarĸumĩnartũngingmat. agdlagsimassut agdlagsimassoĸatáinut nalerĸiútariaĸartarput. perĸigsârdlune ujardlertariaĸarpoĸ erĸarsardlunilo ĸinuniautigalune. pâsiniaineĸ taimáitoĸ nãmangârtumik akilerneĸásaoĸ sôrdlo sagfiugagssarsiortup núngarutit sagfiugagssaussut erdlingnartut nunap iluane torĸorsimassut navssârissarai, taimatut ĸasusuitdlune Gûtip oĸausîne erdlingnartûtinik torĸortanik ujardlersututdlusôĸ ujardlersup nanísavai sagdlusuíssutit naleĸarnerpât asule ilungersorane ujardlersumut issertorsimassut. Gûtip oĸausê ũmáme erĸarsautigineĸarunik kûgtut inûnerup puilassuanit kûgtutut piumârput.

ĸinorĸârdlune aitsât bîbile atuartariaĸarpoĸ. magpertínago anersâp iluartup ĸáumarsainigssâ ĸínutigineĸartariaĸarpoĸ, tauva uvavtínut túniúneĸásaoĸ. Nathanaele Jîsusimut tikiungmat ánáussissoĸ oĸarpoĸ: »tássa Israilikûssoĸ perĸuserdlungnermik ilumiugissaĸángitsoĸ.« Nathanaele oĸarpoĸ: »sumit ilisarainga?« Jîsusip akivâ: »Pilipup ĸaerĸúngíkatdlarmatit fîgeĸússûp atânîtitdlutit takuvavkit.« Juán. 1, 48. 49. Jîsusip ãma uvagut takúsavâtigut issertortume ĸinuguvta, táussumánga ĸáumarsarneĸarnigssavtínik kigsauteĸaruvta sagdlusuíssut ilisariumavdlugo. ũmámik manigũtumik Gûtimut ilitsersûterĸussut ĸaumassup nâlagauvfianit íngilit najorumârpait.