túniúneĸ

Gûtip únersûtá tássa: »ujarumârpavsinga nanivdlungalo ũmativsigut ilũngardluse ujaruvsinga.« Jer. 29, 13.

ũmatip ilũngâgut Gûtimut túniútariaĸarpoĸ taimáingigpat táussuma ássingane avdlángornigssaĸ uvavtíne pinaviángingmat. pilerĸârnivtínit Gûtimut takornartauvugut. ĸanoĸ íssuserput anersâp iluartup ima oĸautigâ: "pinerdlungnivsíne ajortivsínilo toĸungagaluarpuse,« »niaĸoĸ tamarme ánernarsivoĸ, ũmat tamarme náparpoĸ.« diâvulup nigânit nigarneĸarpugut "táussuma pissaringmatigut piumassaminik iliorĸuvdluta." Evf. 2, 1; Is. 1, 5. 6; 2 Tim. 2, 26. Gûtip katsorsarumavâtigut aniguisíkumavdluta. taimaliornigssamutdle avdlángordluínarnigssaĸ - inûtsivta nutãngortitauvdluínarnigssâ - pissariaĸarmat ilũngardluta táussumúnga túniútariaĸarpugut.

isúmavta uviningmut túngassup agssortorniarnera sorssûtigineĸartartunit tamanit ilungersornarnerssauvoĸ. nangminiússutsip túniúnera - tamákerdlune Gûtip piumassânut túniúnigssaĸ sorssungnermik ilaĸarpoĸ. kisiáne tarneĸ Gûtimut túniútariaĸarpoĸ iluássuserme nutãngorĸuvdlune. Gûtip sujulerssuinermine píngitsailîneĸ nãmaginaitsoĸ nâlagarsiordluínardluta malerûtĩnarfigissagssarput atúngilâ, nauk Sátanip taimáinerarsínaugaluarâ. sujulerssuinera inûp silaĸarssusianik tarningatalo nalúngíssusianik sâgfigingningneruvoĸ »ĸáisassuse, erĸartûteĸatigîgsa.« Is. 1, 18. taima píngortitsissup píngortitaminut ĸaerĸussinera nipeĸarpoĸ. Gûtip píngortitame piumássusiat píngitsailiniangilâ. patdlorfigingningneĸ kajumigdluarnermit aulajangerfigissaĸarêrnermitdlo píngitsoĸ ilagsísináungilâ. nâlangniartup píngitsailissaunermit pilersitaussup tarnip inûvdlo ĸanoĸ íssuserpiâta ineriartordluarnigssaraluat akornusersorumârpâ. tamatuma inuk maskînatut píssusilersortúngortísavâ, tamánalo píngortitsissup sujunertaríngilâ. táussuma piumassarâ inuk píngortitame pitsaunersât ineriartornermik pitsaunerpâmik angussaĸásassoĸ. uvavtínut sarĸúmiúpai pivdluarĸuneĸarnigssat angingârtut táukunúnga sáimaunermigut ingerdlákumagaluardluta. ingminut túniuterĸuvdluta ĸaerĸuvâtigut piumassane uvaguvtíne suliariumavdlugo. ajortime inugsiautaunivtínit aniguisíneĸarumanerdluta Gûtivdlo ĸitornaisa kivfáungíssusiánik iluartumik peĸataujumanerdluta uvagut nangmineĸ ĸinigagssarârput.

Gûtimut túniúkuvta sôruname sûtdlũnît táussumánga avigsârtitsísinaussut taimaitísavavut. taimáitumik ánáussissoĸ oĸarpaĸ: »taimatáoĸ ilarse kinalũnît pigissaminik tamanik isumákĩngitsoĸ ajoĸersugarisínáungilara.« Lúk. 14, 33. ũmatip Gûtimit nigoriartûtigisínaussai tamaisa pêrtariaĸarput. ĸavsêrssuit pisũssutit Gûtipilugait. aningaussanik asangningnerup pisũssutinigdlo kajungerissaĸarnerup kalungnertut sâtanimut pitugsimavai. avdlat tusâmassauneĸ silamiututdlo atarĸineĸarneĸ anguniarpait, avdlatdlo ingmingnuínaĸ asaneĸ avdlanik sugssákêrissoĸ soĸutigingningitsordlo inûnerât. tamákule ĸilerutit kigtorarneĸartariaĸarput; Gûtivdlo silarssûvdlo atautsíkut pigisínáungilâtigut. Gûtip ĸitornarisínáungilâtigut ilũngardluta táussumúnga pigissaritíngíkuvta. ĸavsît Gûte kivfartũniardlugo oĸartarput, kisiáne nangmingneĸ ilungersorniarnerínartik tatigât. inatsisai nâlangniarpait pitsaunerulerniardlutigdlo ánáuneĸarniardlutigdlo nangmingneĸ pigínáussusĩnarmíkut. Kristusip asangningnerata itíssusianik pâsingningnermik ũmatait agtorneĸarsimángitdlat, kristumiututdle nãmagsiniagagssatik nãmagsiniarpait taimailiornigssamut Gûtimit píngitsailineĸangajagsimassututdlusôĸ ĸilangmut isersínaorĸuvdlugit. Kristumiûssúseĸ taimáitoĸ sũngilaĸ. ĸristuse ũmáme ineĸarpat tarneĸ asangningneranit táussumíngalo peĸateĸarnermik nuánâruteĸarnermit ima ulivkârneĸarsimatigissarpoĸ: inûp taimáitup táussuminga ĸimerdlûinermine nangminiússutse tunugdliúsínaulersardlugo. Kristusimik asangningneĸ ĸanoĸ iliornerinut tamanut pikialavfíngorumârpoĸ. Gûtip asangningneranit píngitsailineĸartutut misigissut Gûtip piumassasisa ĸanoĸ oĸínerussumik nãmagsinigssâ ujarnaviángilât. anguniagaĸ mikinerpâĸ ujarnaviángilát utertitsissimigdle piumassâ nâpertordluínardlugo inûnigssaĸ tubârtariumârdlugo. ĸilanângarnermik peĸardlutik tamaisa tûniúkumârpait Gûtivdlo pianik anguniagkamik naleĸássutigissânik soĸutigingningnertik takutíkumârdlugo Kristusimik navsuerutigingningneĸ asangningnermik itisûmik taimáitumik ilaĸángitsoĸ oĸausĩnauvoĸ, oĸausĩnavik, inugsiautauneĸ artornartoĸ.

isumaĸarnerputit tamaisa Kristusimut túniutísavdlugit angivatdiârtoĸ? ima ingminik aperigit: Kristuse uvanga pivdlunga ĸanoĸ iliorame? Gûtip ernerata tamaisa túniúpai - asangningneĸ, ániarneĸ, agdiât inûnine - utertíneĸautigssavtínik. uvagut asangningnermik táussumínga pineĸartugsssaungikaluaĸissugut ũmativut táussumúnga erdligisínaunerparput? inûnivtíne nal. akúnere tamaisa pivdluarĸússutai sáimáuneranit pissut tigussarpavut, taimáitumigdlo nãmagtumik pâsisínáungilarput ilisimáissusermit nãkinássusermitdlo ĸanoĸ ititigissumit ánáuneĸarsimassugut. ajortivta ikilerssortitât issigingnâgínarsínaunerparput taimáitordlo asangningnera ingminigdlo túniúnera narrugalugit? nâlangnássutsip nâlagâ ĸanoĸ agtigissumik nikanarsarsimassoĸ erĸarsautigiguvtigo, tauva sorssungníkut ingminigdlo nâggârfiginíkut aitsât inûnermut isersínaunerput narrusûtigisínaunerparput?

isumamíkut manigûtíngitsut ĸavsît aperiumásáput: sôĸ perĸigsiminiásanerpunga manigũniásanerdlungalo naugdle Gûtip ilagsiumásanerânga pâserĸãngíkaluardlugo? Kristuse ĸiviarĸuvara ilingnut. ajorteĸángilaĸ agdlãme sule angnermik: ĸilagssûp nâlagarâ. inugdle pivdlugo ajortíngorpoĸ, »pinerdlugtunutdlo ilaliússauvoĸ; amerdlasûtdlo ajortuliausiat táussuma erssugpâ savssarpordlo pinerdlugtut sivnerdlugit.« Is. 53, 12.

sûtdliuko uvagut tamákerdluta túniúsaguvta iperagagssavut? - ũmat ajortimit âtsugaussoĸ Jîsusip nangmineĸ aungminik evĸiartariaĸagâ asangningnermigutdlo kigdleĸángitsúkut ánáutariaĸagâ, taimáitordlo inuit tamaisa iperásaguníkik artornartorssûtítarpât. kángusûtigãka oĸautsit taimáitut tusásavdlugit; kángusûtigãka agdlásavdlugit.

pigalugo iluaĸutigissavtinik Gûtip arsârniángilâtigut. ĸanoĸ iliornermigut tamatigut ĸitorname iluaĸutigssât sujunertarissarpâ. ĸanortoĸ-una Kristusimik ánáussissugssamigtut ĸinigaĸarsimángitsut tamarmik pâsisínautsiardlíssuk táussuma tuniniarâtik nangmingneĸ ujagkamingnit ajúngínerungârtumik. inuit nangmingneĸ tarnertik ajoĸusingârtarpât ajortumîngârtardlutigdlo erĸarsautimíkut iliornermíkutdlo Gûtip piumassânut akerdliussumik iliûseĸarsimassarângamik. avĸûme táussuma ajúngínerussumik ilisimangnigtup píngortitamilo iluaĸutigssáinãnik iliortartup inerterĸutigisimassâne nuánârnermik piviussumik navssâgssaĸángilaĸ. pinerdlungnerup avĸusernga nagdlingnarssutsip aserugauneruvdlo avĸutigssarât.

kúkuneruvoĸ isumalioráine Gûtip ĸitorname nâgdliungnerat iluarisagâ. ĸilangmiut tamarmik inuit pivdluardlutik inûnigssât soĸutigingârpât atâtavta ĸilangmiussup píngortitame ilai nuánârnerup matuisa silatãnut mátúniángilai. Gûtip piumavâ nuánârutit sûssut pivdluáinermik pakatsinermigdlo pivdluarneruvdlo isâvfianit anisitaunermit kinguneĸarsínaussut píngitsôrniásagivut. silarssûp utertitsissâta inuit taimaigínartitdlugit ilagsiumavai, amigautait, nãmagdluángíssutait sángĩssutaitdlo tamaisa atortitdlugit. ajortimitdlo evĸiarniáinángilâtigut aungmigutdlo utertíniáinarata, ũmativdle erininera erĸigssíssutigssarsisíkumavdluta kíkúne tamane nangmáutaminik tigusiumassune nangmagkaminigdlo nangmagkiússiumassune. ingminut ornigútut inũssutaussumik piumavdlutik erĸigsinermik ĸasuernermigdlo tunissarpai. piumassâ unáinauvoĸ: nãmagsissagssavut nâlángitsut angusínáungisãnut ĸilangme pivdluarĸuneĸarnigssamut uvavtínik ingerdlatitsissugssat nãmagsísagivut. tarnip inûnera nuánârnivigdlo tássa Kristusip nâlangnarsinigssamik neriûtip ũmativtíne ineĸalernera.

ĸavsît aperissarput: Gûtimut túniutísaguma ĸanoĸ iliúsaunga? táussumúnga túniúnigssat nangmineĸ kigsautigigaluarpat, ilerĸorigsârniarníkutdle pisínaunerit sũngilaĸ; ĸularnerup nanertorpâtit ilerĸunitdlo ajortime inûnermit pissunit nâlagkersugauvdlutit. únersuigaluarnitit imailiorumavdlutitdlo aulajangerdluarnitit siorĸatut kuerssatut ĸajangnartigaut. erĸarsautitit, kajungerfigilersagkatit, misigíssutsitit nâlagkersorneĸ saperpatit. únersûtitit uniorĸutísimassatit imailiorumagaluarnititdlo píngitsûgkatit ilisimagagkit iluamêrniarsínaujungnaersorilerputit isumaliulerdlutitdlo Gûtip ilagsisínáungíkâtit. ernumaĸinagdle. pâsissariaĸarit-una piumássutsip píssaunera. piumássutsip inûp píssusia aĸugtarpâ - aulajangersínaunera ĸinersisínauneralũnît ajúngitsumik ajortumigdlo. piumássutsip erĸortumik atorneranik tamarmik patsiseĸartarput. Gûtip inuit sordlernik iluarnersunik ĸinerdlersínáussusermik tunisimavai. ũmatit avdlángortísínáungilat; ingminingnit Gûte asasínáungilat, kisiáne kivfartũkumavdlugo ĸinersínauvat. piumássutsit táussumúnga túniúsínauvat, tauva ilingne súnĩsaoĸ piumatdlersítardlutit nãmagsissaĸartítardlutitdlo iluarissane nâpertordlugo. tauva píssutsit tamarme Kristusip anersâta súníneranut pisíneĸarumârpoĸ. ĸilanârissatit táussumúnga sangmitíneĸarumârput erĸarsautitit táussuma erĸarsautainut nalerĸútúngorumârdlutik.

ajúngínigssamik iluarnigssamigdlo kigsarnitit ajúngitsũput pigigugkit; kigsautigĩnaraluarugkitdle iluaĸutigísángilatit. ĸavsît támarumârput nauk neriugdlutigdlo kristumiúngorusugkaluardlutik. piumanerat ima angitigilersimángilaĸ piumássusertik Gûtimut túniúsínaulersísimángínamíko. mãnákut kristumiúngorumavdlutik aulajangersimángitdlat.

piumássuseĸ erĸortumik sangmiveĸarsíneĸarpat inûnerme avdlángordluínarneĸ pisínauvoĸ. piumássutsit Kristusimut túniúkugko píssauneĸ píssaunernit avdlanit sákortunerussoĸ peĸatigilísavat. píssauneĸ pavánga písavat ilingnik sernigingnigsínaussoĸ, taima Gûtimut túniutúarníkut inûneĸ nutâĸ, ugpernerup inûnertâ inûnerilersínauvdlugo.