ugperneĸ ilagsingningnerdlo

tarnivit nalúngíssusia anersâmit iluartumit eĸêrsíneĸaleriartortitdlugo pâsiartulísavat ajortip ajússusia, píssaunera, pitdlartariaĸássusia, ánernartua nuánaríngitdluínardlugulo ĸiviarsínaulisavat. malugísavat ajortip Gûtimit avigsârtísimagâtit inugsiautaussutitdlo ajortip píssaunerata atâne. aniguiniardlutit ilungersornerujartortitdlutit sapíssutsit takuvdlualeriartuínásavat. nuánarissatit mingugtũput ũmatit ajortûvdlune. takulerpat inûnerit ilingnut asanerínaviusimassoĸ, isumákêrfigineĸarnigssatdlo erinigilerpat, evĸiarneĸarnigssaĸ aniguisitaunigssardlo erinigilerdlugo. Gûtimik erĸigseĸateĸarnigssaĸ táuna ássigilerdlugo ĸanoĸ angúsanerpiuk?

erĸigsineĸ pissariaĸarpat - Gûtip isumákêrfigingningnera erĸigsinera asangníssusialo misigalugit. erĸigsineĸ táuna aningaussanik pisiarineĸarsínáungilaĸ, sianíssutsip túniúsínáungilâ, ilisimassutsíkut anguneĸ ajornarpoĸ. ivdlit nangmineĸ ilungersornikut pigssarsiarinigssâ ilimagísángilat, Gûtivdle ilingnut akeĸángitsumik túniúniarpâ. aningaussanik pínago akilersínago." Is. 55, 1. pigssarât agssat isagtĩnarugko tiguvdlugulo. Nâlagaĸ oĸarpoĸ: "ajortuliauserse augpatdlarigsutut íkaluarune aputitut ĸaĸortigilísavoĸ; augpatdlarigsautitut íkaluarune savat merĸuisut ĸaĸortigilísavoĸ." "ũmámik nutâmik tuniumârpavse anersârdlo nutâĸ iluvsínut túniutdlugo." Is. 1, 18; Hsk. 36, 26.

ajortitit navsuerutigisimavatit ũmatíkutdlo ilumôrdlutit ĸimagsimavdlugit. aulajangersimavutit ingminik Gûtimut túniúkumavdlutit. tauva orniguk ĸínuvigalugulo ajortimit evĸiarĸuvdlutit ũmámigdlo nutâmik tunerĸuvdlutit. taima únersuerêrame taimailiúsassoĸ ugperit. tamássa Jîsusip nunamĩkatdlarame ilíniartitsíssutá Gûtip túniúkumassâ písagigput písavdlugo ugperuvta. Jîsusip inuit nápautait ajorungnaersítarpai píssaunine ugperigângássuk. takusínaussaisigut ikiortarpai taimalo takusínáungisatik pivdlugit tatigisínaulersitdlune - pisípai ajortimik isumákîsínaunine ugperisinaulersitdlugo. tamána ersserĸigsumik taivâ tumartorsimassoĸ ajorungnaersíkamiuk. "ilisimarĸuvdlusiuk inûp ernera nuname ajortinik isumákîsínaussoĸ, tumartorsimassoĸ oĸarfigâ: makitdlutit ínangavît tigûk angerdlardlutitdlo." Mat. 9, 6. imáitumigtaoĸ îvankîliulersârtoĸ Juánase oĸarpoĸ Kristusip tupingnartuliai erĸartoramigit: "tamákule agdlagsimáput ugperĸuvdluse Jîsuse Kristusiussoĸ Gûtip ernera arĸagutdlo inũssuteĸarĸuvdluse ilivse ugpertuse." Juán. 20, 31.

bîbilime oĸalugtuarineĸartunit erssarigsunit, ĸanoĸ Jîsusip náparsimassut ajorungnaersítarai, ilíniarsínauvarput ĸanoĸ tatigísagigput ajortívtinik isumákêrfigineĸarĸuvdluta. angutip Bethesdap tasiata sinâne náparsimassup oĸalugtuarineĸarnera erĸaimasigo. angutikulúnguaĸ saperdluínarpoĸ avatinilo ukiune 38-ne atorsínausimángilai, Jîsusivdle perĸuvâ: "makitdlutit ínangavît tigûk angerdlardlutitdlo." Juán. 5, 8. náparsimassoĸ oĸarsínaugaluarpoĸ: "ajorungnaersíniarungma oĸautsitit nâlásaváka." kisiáne nâgga, Jîsusip oĸausê nâlagpai, ugperpoĸ ajorungnaersitauvdlune, ánáussissuvdlo perĸussinera ernĩnaĸ nâlagpâ. pisungniardlune isumalerpoĸ, pisulerpordlo. sôrdlo Kristuse oĸartoĸ taima iliorpoĸ, Gûtivdlo nakũssusermik tunivâ; ajorungnaerpoĸ.

taimatut ivdlit ajorte nápautigât ajortitit ingminingnit akilersínáungilatit, ũmatit avdlángortísínáungilat ingminigdlo iluartúngortísínaunak. Gûtile neriorssuivoĸ tamákunínga tamanik iliorfigiumavdlutit Kristusíkut. únersût tamána ugperât - ajortitit ángîautigalugit Gûtimutdlo ingminik túniutdlutit. kivfartũkumavdlugo aulajangerputit. taimailioruvit ilumut Gûtip únersũne ilingne nãmagsísavâ. neriorssût ugperigugko isumákêrfigineĸarsimassutitdlo ugperalugo Gûtip mána piviussúngortísavâ: ajorungnaersitausautit sôrdlo Jîsusip tumartorsimassoĸ pisugsínaulersíkâ ajorungnaersitaunigssane ugperingmago. ugperuvit taima písaoĸ.

ajorungnaersitausimaningnik maluginigssat utarĸeĸinago, kisiáne oĸarit: perêrsoĸ ugperâra imángitsoĸ taimailerêrnera malugigavko, kisiánile Gûtip taima neriorssormanga."

Jîsuse oĸarpoĸ: "sunalũnît piumavdlugo ĸínutigiguvsiuk piumârigse ugpersínaritse, tauva písavarse." Mák. 11, 24. neriorssûtip tamatuma nãmagsineĸarnigssânut patsisigssaĸarpoĸ tássalo: ĸinúsassugut Gûtip piumassânut nâpertũtumik. piumassâle tássauvoĸ ajortimit evĸiarumavdluta, Gûtimut ĸitornangortikumavdluta inûnermigdlo iluartumik inûneĸarsínaussúngortíkumavdluta. taimáitumik pivdluarĸuneĸarnigssat táuko ĸínutigisínauvavut písagivut ugperdluta Gûtilo ĸutsavigalugo táukunínga tunísagâtigut ĸulángínavta. pisínautitaorêrpugúme Jîsusimukarnigssavtínut tássane evĸiarneĸardluta inatsisitdlo sãne atasínaulerdluta kángusûteĸarnata tarnivtalo nalúngíssusiagut nanertugaunata. "tauva mãna Kristuse Jîsusimĩtut pitdlagagssautitagssaujungnaerput." Rûm. 8, 1.

taima misigissaĸarêrdluse ingmivsínik pigiungnaerpuse. akisûmik pisiarineĸarpuse utertineĸaravse. "aserujassumik sîlvimigdlũnît kûltimigdlũnît pínase... aungmigdle akisûmik sôrdlo savârĸap agssuarnaitsup ínardluitsup tássa Kristusip pianik." 1 Pîtr. 1, 18, 19. iliorníkut artornaitsúkut Gûtimut ugpilerdlutit túniúkavit anersâp iluartup ũmatingne inûneĸ nutâĸ pilersípâ. ĸitornángorputit Gûtip ilaĸutainut ilángútoĸ, asavâtitdlo sôrdlo erne asagine.

mãna Jîsusimut túniuterêruvit tunuarniaĸinaĸ. ĸimangniaĸinago, uvdlutdle nungutdlugit oĸartarit: "Jîsusip pigânga táussumúnga túniuterêrama." Gûte ĸínuvigiuk anersâminik tunerĸuvdlutit sáimáunermigutdlo ataterĸuvdlutit. sôrdlo Gûtimut túniúnigkut táussumúngalo ugpilerníkut táussumúnga ĸitornángorsimassutit, taimatut táussumane inûssariaĸarputit apustile oĸarpoĸ: "taimáitumik Kristuse Jîsuse Nâlagaĸ pigileravsiuk taussumane saĸigitse." Kul. 2, 6.

ima isumaliortoĸartánguatsiarpoĸ misilingneĸarĸârtariaĸardlutik Nâlagkamutdlo sângniarsimanertik nivtarĸârtariaĸardlugo - aitsâtdlo tauva pivdluarĸussinera ĸínutigisínaulísavdlugo. Gûtivdle pivdluarĸússutâ mãnamît perêrsínauvat. Gûtip sáimáunera, Kristusip anersâ sángĩssutsimingne ikiortigssartik pissariaĸarpât taimáingigpat ajorte agssortorsínáungínamíko. Jîsusip piumavâ taimaigínardluta ornísagivtíne: ajortilikulûvdluta, ikiortigssaerutdluta, átaveĸalerumavdluta. aggiútariaĸarpavut: sángĩssuserput taillât, sianîtsorpatdlangnerput, ajorteĸarnerput perĸigsimivdlutalo isigaisa sãne nâtdlútariaĸarnerput. táussuma nâlangnautigssarâ asangningârdlune pákutísavdluta, ikivut mitusersordlugit mingungnivtínitdlo tamarmit evĸiardluta.

tássane tûsinterpait kúkussarput. Kristusip nangminêrdlune isumákêrfigigâtik ugperíngilât. Gûtip oĸausĩnâ ugperíngilât. kisiáne kinalũnît unersũmik ugperingnigtoĸ ilisimásavoĸ Gûtip sáimáunermigut . ajortit tamaisa isumákêrai. erĸarsaut una Gûtip neriorssûtai ivdlit pigssaríngíkitit, erĸarsaut táuna anisíniaruk. kialũnît ajortuliortup perĸigsimissup pigssarai.

nakũssut sáimáunerdlo Kristusíkut uvavtínut túniússáuput, kivfartortutdlo íngilit tarnimut ugpertunut tamanut aggiútarpaît. kina ĸanordlũnît ajortuliortûtigigaluarune nakũssúmik, minguíssusermik iluartûtitaunermigdlo Jîsusime pivdlune toĸussume pissagssaĸarpoĸ. Kristusip erinigâ atissait ajortip mingugtitai pêrumavdlugit iluarssutsimilo atissainik ĸaĸortunik atitíkumavdlugit. inôrĸuvai; toĸorĸúngilai.

Gûtip inuit toĸujassut ingmingnut iliũtarneratut iliorfigissángilâtigut. erĸarsautai isumagssuigajússusermik, asangningnermik nagdligingnigkajússusermigdlo ulivkârput. oĸarpoĸ "iluaitsup ĸimagdliuk avĸutigissane, piúngitsuliortuvdlo ĸimagdligit erĸarsautine sâgdlunilo Nâlagkamut, táussuma angajorĸautserfigiumârpâ tauva, Gûtivtínut sâgkile isumákînertoĸingmat." "pinerdlungnitit pîarpáka nuiatut isivdlugit, ajortuliautsitdlo putsutut." Is. 55, 7; 44, 22.

"mássa iluaríngilara toĸulersoĸ toĸugpat, oĸarpoĸ Nâlagaĸ nâlagaussoĸ, sâgdlusilo inûgitse." Hsk. 18, 32. Sâtane piarêrsimavoĸ Gûtip únersûtainik erdlingnangârtunik arsârumavdluta. pisínaugaluarune ĸaumassup seĸernere neriûtdlo tamât tarnimit pêrumagaluarpai; kisiáne taimailiorniarnerane akuereĸinago. ússîssoĸ tusâĸinago kisiáne oĸarit: »Jîsuse toĸuvoĸ inôrĸuvdlunga; asavânga, támarĸúngilângalo.« nãkigtarajugtumik ĸilangme atátaĸarpunga, naugdlo asangningnera asigínarsimagaluariga, nauk pivdluarĸússutit uvavnut túniússai atupilugsimagaluarivka, nikuíniarpunga atâtavnukardlungalo oĸarfigísavdlugo: »atâtaĸ, ilingnut ĸilangmutdlo ajortuliorpunga, kingorna ernernik taineĸarneĸ ĸíngarĸúpunga. kivfartortivit ilãtut itínga.« ássersûtip oĸalugtũpâtit erneĸ támartoĸ ĸanoĸ ilagsineĸásassoĸ: »sulile ungasigsumîtitdlugo angutâta takulerpâ nãkigingálerdlugo, arpagdlunilo ĸungasiagut eĸípâ kunigdlugulo.« Luk. 15, 18-20.

ásserssûtivdlũnît táussuma nauk ima kivdlingnartigigaluardlune atâtavta ĸilangmiussup nagdligtuinera nâgssáungitsoĸ nãmagtumik oĸarautigisínáungilâ. Nâlagaĸ pruvfîtíkut oĸarpoĸ: »asangningnermik soraiuitsumik asavavkit, tamána pivdlugo isumagssuinermik ĸilussarpavkit.« Jer. 31, 3. ajortuliortoĸ sule atâtame igdluanut ungasigssorssuarmîtitdlugo nunamilo takornartame pigissaminik nungulugsínautitdlugo atâtap ũmatâta erinigingârpâ, erinilernerdlo sunalũnît tarnime itertitaussoĸ Gûtimut uterumalernermik kinguneĸartoĸ tássaugínarpoĸanersâp asangnigdlune ĸaerĸussinera, kimigîserdlune, oĸaomigsâriniardlune támalersordlo atâtap ũmámigut asangningneranut pisíniardlugo.

bîbilip neriorssûtai angingârtut issigerêrdlugit ĸularneĸ inigssaĸartisisinauunerpiuĸ? isumaĸarsinaunerpit ajortulikulúnguaĸ uterurumatdlerpat ajortinilo asigínarumalerpagit Nâlagkap sukangnersûvdlune akornuserumásagâ perĸigsimivdlune ingminut perĸunago? erĸarsaut taimáitoĸ pêrdle! erĸarsautit taimáitut atâtat : ĸilangmiussoĸ pivdlugo erĸarsautaussut aitsât tássa tarnimut ajoĸutaussut. ajorte ûmigâ; kisiáne ajortilik asavâ, Kristusimilo ingminik túniúpoĸ tamaisa piumassut ánáuneĸalersínaorĸuvdlugit pivdluarnermigdlo soraiuitsumik nâlangnássutsip nâlagauvfiane angusserĸuvdlugit asangningnine nalunaerniardlugo oĸautsit ukunínga nangmineĸ ĸinerîgkaminit asangnerpalungnerussut sákortunerussutdlo uvavtínut atorsínausimagaluarnerpai? nalunaiaivoĸ: »arnap nâlungiángue puiortarnerpâ timime iluata erniâ nagdligtúsanago? puioraluarpatdlũnît taimáitoĸ uvanga puiúsángilavkit.« Is. 49, 49, 15.

ârdlorit ĸulartutit sujôrassutitdlo; Jîsuse inûvoĸ sivnerdlutit savssarumavdlune. Gûte ĸutsavigiuk erne asassane túniungmago, ĸinugitdlo pivdlutit toĸua pilugsínarĸunago. anersâp uvdlume aggerĸuvâtit. ũmativit ilũngâgut Jîsusimukarit; tauva pivdluarĸussinereranik piumavfigísavat.

neriorssûtitit atuartarângagkit erĸaimassaruk asangningnermut taigssáungitsumut nagdligingningnermutdlo nalunaemutaussut. asangningnerup soraiuitsup ũmatâ sáimaussoĸ ajortilingnut sangmivoĸ kigdleĸángitsumik isumagssuíssuseĸardlune. »táussumûna utertitauvugut auagut ajortivtínik isumákêrfigineĸardluta sáimáussingârnera migssiliordlugo.« Evf. 1, 7. ugpersínarit Gûte ikiortigigit. ássine inungme pilersemigkumavdlugo piumassarâ. navsuerdlutit perĸigsimivdlutitdlo ornigkugko patdlísavâtit isumagssuinermik isumákînermigdlo peĸardlune.