Kristusimut avkutigssaĸ kapitel 7. Fra side 57tilbage

jîsusimit ajokersugaussup ilisarnakutai

»taimáitumik kinalũnît Kristusimĩtoĸ píngortitauvoĸ nutáĸ; pisoĸaĸ ĸângiúpoĸ, ata, nutãngorpoĸ.« 2 Kor. 5, 17. inuit tamarmik ímaĸa erĸordluínardlugo oĸautigisínáungilât ĸanga imalũnît sume avdiamik isumatârnertik tamatumúngalũnît patsisaussut tamaisa tíkuarsínaunagit. imáingilardle sule avdlamik isumatársimángitsut. Kristuse Nikudîmusimut oĸarpoĸ: »anore isumaminik pissaraoĸ sujorssungneralo tusartaraluarpat, sumitdie pissoĸ sumutdlo ingerdlassoĸ ilisimángilat. taimáiput anersámit erniusimassut tamarmik.« Juán. 3, 8. Gûtip anersâta inûp ũmatânut súnînera ássersũneĸarsínauvoĸ anorimut takugssáungingmat, kingunerile taimáitoĸ erssarigsumik takuneĸarsínaulerdlutigdlo misigineĸarsínaulersarput. píssaunerup erniorĸigsitaussup inûp issánit takuneĸarsínáungitsup inûneĸ nutâĸ tarnime pilersípâ; inuk nutâĸ Gûtip ássingane píngortípâ.

anersâp píngortitsinera nipaitsumik malungnaitsumigdlo ingerdlatitdlugo kingunere sarĸúmísáput. ũmat Gûtip anersâgut nutãngortitausimagpat inûneĸ tamatumúnga nalunaerĸutáusaoĸ. ũmativta avdlángortínigssãnut Gûtivdlo isumânut nâpertũtúngornigssamut ingmivtínit ĸanoĸ ilioriusigssaĸángisitdluta ingminuínardlo tatiginiángitdluínartariaĸaratdlartitdluta suliavutdlũnît ajúngitsut isumavdlûtiginiartariaĸángisitdlugit inûnivta sarĸúmerumârpâ Gûtip sáimáunera ilumiuginerigput -ngínerigputdlũnît. takujumârpat avdlángorneĸ ĸanoĸ-íssusivtíne, ilerĸuvtine soĸutigissavtínilo. ĸanoĸ-ísimagaluarnivta mãnalo ĸanoĸ-íssutsivta ássigĩngíssusiat ersserĸigdluínarumârpoĸ. inûp ĸanoĸ-íssuserpiane sarĸúmersítarpâ iliornertigut ajúngitsutigut ajortutigutdlũnît nalautsortutigut pínago kisiáne imáissutsíkut angníkut oĸalugtarnermine iliortarnerminilo ilemungnârissamigut.

ilumôrpoĸ samumissúkut agssuarnaitsumik píssusilersortoĸarsínaussoĸ Kristusip píssaunera nutãngortitsissoĸ pigíngíkaluardlugo. sûtíneĸarneĸ avdlanitdlo atamineĸarneĸ angujumavdlugo kajungerneĸ ajúngitsumik agssuarnaitsumigdlo inûsínáungortitsissarpoĸ. ingminut ataminartiniarnerup samumissúkut ajorte nigortertísínauvâ. ũmat nangminigssarsiortoĸ ajúngitsorssuarmik iliorsínauvoĸ. ĸanorme tauva ilivdluta ilisimásavarput sordlerne ardláinîtdluta?

kina ũmativtíne nâlagauva? kina erĸarsautivta uníngavigât? kina oĸalûsererusungneruvarput? kimut pigitípavut misigíssutsivut itinerussut nukivutdlo ajúngínerit? Kristusip pigigpatigut erĸarsautigísavarput emarsautivutdlo nuánernerit táussumúnga sangmitíneĸásáput. sũssuserput pigissavutdlo. erinigísavarput ássigilerumavdlugo, anersâvanit sujulerssorneĸarumavdluta.

Kristuse Jîsusime píngortitángortut nutât anersâp inerititainik inerititaĸásáput nakûssunik: »asangningneĸ, tipaitsungneĸ, emigsineĸ, kamajuíneĸ, avâgingningneĸ, angajomautserneĸ, ilumôrneĸ, ĸanilárneĸ, pîtaiuíneĸ.« Gal. 5, 22. piumássusitorĸat malerĸigkumajungnáisavait Gûtivdle erneranut ugperníkut tumai atuardlugit ingerdlajumalísáput ĸanoĸ íssusia ingmingne ersserneĸartíkumalísavdlugo minguiarumalísavdlutigdlo sôrdlo táuna minguitsûssoĸ. sujornagut ĸíngarssorsimassatik mãna asalerpait, sujornagutdlo asasimassatik ĸíngarssorpait. manigũssuseĸángitsut isumáinarmingnigdlo ingerdlajumassut ĸanilârtúngorput ũmatimíkutdlo manigũtúngordlutik. pingâkujugtut ilungersorpalugtúngordlutigdlo nikanartítúngorput. imerajugtoĸ imerajugtûjungnaerpoĸ inûnerdlugtordlo ilerĸorigsúngorpoĸ. silarssuarmiut ilerĸue atortuilo aserujassut taimaitdlêrneĸarput. kristumiut pínersaut ĸagdleĸ ujásángilât »pínersauteĸásáputdle inungmik issertugkamik ũmatip, anersâp piuaitsup sagdlaitsup pianik aserujuitsumik, táuname Gûtimut erdlingnaĸingmat.« 1 Pîtr. 3, 3. 4.

inuk avdlamik isumatârsimassutut taineĸ ajornaĸaoĸ inûnerane pitsaunerulernermik pissoĸarsimángigpat. ajortigdlip únersũne nãmagsiguniuk, ilumũingíníkut pigssarsiane taorserdlugit, ajortine ángîautigalugit Gûtilo inoĸatinilo asavdlugit, ilisimásavâ toĸumit inûnermut nûgsimavdlune.

támartut ajortiligtut píssuseĸardluta Kristusimut piguvta sáimáuneragut ajortit isumákîgauneránik pigssarseĸatauvdluta asangningneĸ ũmáme sivkilísaoĸ. nangmagagssaĸ sûssok artornarungnáisaoĸ Kristusip uvavtínut nangmagkiutitâ oĸingmat. pissugssáussuseĸ nuánersuinaulísaoĸ, ingminigdlo túniúneĸ tipaitsungnartuínaulísaoĸ. avĸut târtumit matôrsimasorissaĸ iluássutsip seĸernanit ĸáumarsarnekartûlísaoĸ.

Kristusip píssusia asanartoĸ malingnigtainísaoĸ takutíkumârpoĸ. Gûtip piumassâ suliarísavdlugo nuánarâ. Gûtimik asangningneĸ nâlangnautigssâlo pivdlugo nikatdlujuineĸ ánáussissivta inûnerane nakũssutauput. asangningnerup táussuma ĸanoĸ iliortarnere pínersardlutigdlo pingârtúngortípai. asangningneĸ Gûtimit pivoĸ. ũmatip avdlamik isumatârsimángitsup píngortísínaunagulũnît naulersísínáungilâ. ũmáme Jîsusip najugâne aitsât ítarpoĸ. »asavarput asarĸârmatigut.« 1 Juán. 4, 19. ũmáme Gûtip sáimáuneragut nutãngortitaussume ĸanoĸ iliornerit tamaisa ansangningnerup ingerdlatilersarpâi. táussuma inûp píssusia pilersítarpâ, piumatdiertarnere aĸútarpai, kajungíssusê nálagkersortarpai, akerarîngneĸ ajugauvfigissarpâ inûvdlo misigíssusê ajúngitsúngortítardlugit. asangningneĸ táuna tarnime pigineĸarune inûneĸ nuánersúngortítarpâ tamagingnilo erĸavtínĩtune minguersaissutut súnîneĸ siaruardlugo.

kúkússuteĸarpoĸ mardiungnik Gûtip ĸitornaisa - pingârtumik aitsât sáimáuneranut túniuterdlâjussut - mianerssorfigissariaĸagainik. sujugdleĸ erĸartorêrparput, tássa nangmineĸ suliáinane tatigalugit sákugalugitdlo Gûtimut iluarissagssauniarneĸ. suliamigut iluartungorniartoĸ inatsisit maleruarniarĸigsârunigitdlũnît ajornardluínartumik nãmagsiniagaĸartûvoĸ. inuit Kristuse ilaginago suliarisínaussaralue tamarmik ingminut asanermit ajortimitdlo âtsugáuput. Kristusip sáimáunerata kisime iluartúngortísínauvâtigut ugperníkut.

kúkússut tamatuma akerdlia sujugdliuvdlo navianaĸatâ tássa isumaĸaráine Kristusip inuit Gûtip inatsisainut nâlangniartariaĸartíkai ugpernerínákut sáimáunerminik peĸatausínáungoravta taimalo suliavut ánangnigssavtínut atorsínaunatik.

malugiuk nâlangniarneĸ ĸagdlĩnákut Gûtip piumassainut nâpertũniarnerúngitsoĸ tássaussordle asangnigtup kivfartornera. Gûtip inatsisaisa ĸanoĸ íssusia nalunaerpât. pâsíssutigssáuput asangnigdiune sujunertarissânut angisûnut, taimáitumigdlo inatsisai ĸilangme nunamilo nâlagkersuinerata túngavigai. ũmativut nutãngortitausimagpata Gûtip ássingane, Gûtip asangníssusia tarnivtínut íkúneĸarsimagpat, tauva inássutai inûnivtíne erssísángínerpat? asangningnerup sujunertâ ũmativtíne íkúneĸarsimagpat inuk táussuma píngortitsissime ássingane nutãngortitausimagpat, tauva angerusisâp neriorssûtâ erĸũsimásaoĸ: »inássutíka ũmatainut túniúkumârpáka erĸarsautáinutdlo agdlagkumârdlugit.« Epr. 10, 6. inatsisaitdlo ũmáme agdlagsimagunik inûneĸ súnersimásángínerpât? nâlangneĸ - tatigissagssáussutsip asangningneruvdlo kivfartũssíssutât - ajoĸersugkamut ilisarnauterpiauvoĸ. taimáitumik agdlagsimassut oĸarput: »tássauvoĸ Gûtimik asangningneĸ inássutai maleruaruvtigik.« »oĸartoĸ ilisarâra, inássutailo maleruarnagit, táuna sagdlutûvoĸ, sagdlusuíssutdlo ilumiugíngilâ." 1 Juán. 5, 3; 2, 4. ugpernerup nâlangnigssaĸ inungnut pissariaerutínago kiserdluínarme Kristusip sáimáuneranik ilangêĸautaulersípâtigut taimailivdlutalo nâlangnermik takutitsisínaulersitdluta.

nâlangnivtigut ánáuneĸarnigssaĸ pigssarsiaríngilarput, mássame ánangnigssaĸ Gûtip akeĸángitsumik tuníssutigâ ugperníkut tigussariaĸartoĸ. nâlangnerdle ugpernerup inerítorâ. "ilisimavarsilo ajortit pĩsavdlugit erssersoĸ, ajortimigdlo ilumiugissaĸángilaĸ. kinalũnîtdle táussumanĩtuartoĸ ajortuliortaríngilaĸ; kinalũnît ajortuliortup takunagulo ilisaríngilâ." 1 Juán. 3, 5. 6. ilisarnaut erĸortoĸ tássauvoĸ. Kristusimĩkuvta Gûtivdlo asangningnera uvavtínîgpat misigíssutsivut, erĸarsautivut ĸanordlo iliornivut Gûtip piumassânut inatsisine erssersitaussumut nâpertûkumârput. »ĸitornánguáka kimutdlũnît támartitínavêritse. iluarnermik ilerĸulik iluarpoĸ sôrdlo táuna iluartoĸ.« 1 Juán. 3, 7. Gûtip inatsisaisa iluartut inatsisit ĸulit Sînaime túniússat iluarneĸ sûssoĸ nalunaerpât.

Kristusimut ugpernermik taineĸartartoĸ oĸautigineĸartartordlo Gûtimut nâlangniarnermik pissariaerutitsissutut, ugpernerúngilaĸ pissûssârneruvordle. »sáimáunermit ánagtitauvuse ugperníkut.« »taimátaoĸ ugperneĸ sulianik ilaĸángitsoĸ taimáinermine toĸungavoĸ.« Evf. 2, 8; Jâk. 2, 17. Jîsuse nunamut píngíkatdiarame oĸarpoĸ: "Gûtiga, perĸussat nãmagsísavdlugo kajungeĸaunga, inatsisititdlo ũmámiugãka.« tugs. 40, 9. kingumutdlo ĸilaliángitsiarnermine nalunaerpoĸ: »atâtama inássutai maleruaríka asangníssusianĩtuardlungalo." Juán 15, 10. agdlagsimassut oĸarput: »matumûnalo nalujungnaerpugut ilisarigigput inássutai maleruaruvtigik. . . táussumanĩtuardlune oĸartoĸ ima saĸissariaĸarpoĸ sôrdlo táuna saĸissoĸ.« »Kristusísaoĸ ániarmingmat ilivse pivdluse maligagssaĸartitdluse, tumine atuarĸuvdlusigik.« 1. Juán. 2, 3-6; 1 Pîtt. 2,21.

inûneĸ nâgssáungitsoĸ angorĸuvdlugo piumassarineĸartoĸ táunarpiauvoĸ táunaujuarsimassoĸ - paradîsime angajorĸâvta sujugdlerpát ordlunerat sujorĸutdlugo táunaujuarsimassoĸ: Gûtip inatsisainut nâlagdluínarneĸ, iluardluínarneĸ. tamatumánga mingnerussumik piumassaĸarníkut inûneĸ nâgssáungitsoĸ túniúneĸartugssaugaluarpat silarssuarssûp tamarme pivdluarnigssâ navianartorsiortitáusagaluarpoĸ. tamatumame ajorte nâgdliungnautâlo erdloĸíssutauneralo nâgssáungitsumut tássáutuínartugssángortísagaluarmago.

Adamip ordlunerme sujornagut Gûtip inatsisainut nâlangníkut iluardluartumik píssuseĸásavdlune sapíngilâ, ajortulioramile sapilerpâ, ajortuliâlo pivdlugo pilerĸârnivtínit aserugauvugut ingminik iluartúngortísínaujungnaerdluta. ajortiliugavta iluaitsûvdlutalo inatsisit ivdlernartut nãmagdluínartumik nâlagsínáungilavut. ingmivtíne iluarssuseĸángilagut. Gûtip inatsisaisa nãmagserĸussait tamákîssumik nãmagsisínáungilavut; Kristusivdle periarfigssarsivâtigut. nuname inûvoĸ misiligaunerit ússigauneritdlo nâpitagssarissagkavut táukorpiait atordlugit. ajorteĸángitdluínardlune inûvoĸ. pivdluta toĸuvoĸ, ajortivutdlo ingminut pisíkumavai iluássusermigdlo tuniumavdluta. táussumúnga túniúkuvit ánáussissigtutdlo ilagsisimavdlugo táuna pivdlugo iluartûtineĸásautit ĸanordlũnît inûningne ajortuliortûtigisimagaluaruvit. Kristusip píssusia píssutsingnut taorsiúneĸásaoĸ, Gûtivdlo ajortuliorsimángisáinartutut ilagsísavâtit.

agdlãme tamatumánga angnerussumik: Kristusip ũmat avdlángortísavâ ugperníkut ũmatingne ineĸalerame. peĸatigilernera tamána atatíniartariaĸarpat ugperdlutit, piumassatdlo táussumúnga perĸútuínardlugo; taimáituartitdlutitdlo ilingne súnîumârpoĸ piumatdlersítardlutit nãmagsissaĸartítardlutitdlo iluarissane nâpertordlugo. tauvame oĸarsínáusautit: »mãnalo uviningme inûserissara Gûtip erneranut ugperdlunga inûsetâta, uvavnik asangnigtumut ingminigdlo túniutdlune pivdlunga.« Gal. 2, 20. Jîsuse ajoĸersugkaminut oĸarpoĸ: "ilivse oĸalugtũngínavse, atâtavsile anersâ ilivsíne oĸalugtûngmat." Mat. 10, 20. taima Kristuse ilingne suligpat anersâta ássinganik erssersitaĸásautit suliaisalo ássinginik suliaĸardlutit - iluarnerup nâlangneruvdlo suliainik.

tauva ingmivtíne usorsitsautigssaĸángilagut ingmivtínik angisûtíniarnigssamut túngavigssaĸarata. Kristusip iluarnera uvavtínut pigssángortoĸ suliardlo anersâta uvavtíne uvavtigutdlo nãmagsissâ neriungnivta kiserdluínât túngavigâ.

ugperneĸ oĸalûserigângavtigo erĸaimásavarput ugperneĸ atausĩnáungitsoĸ. ĸularungnaersitaunermik túniússaussoĸarpoĸ kristumiut ugperneránit avdlauvdluínartumik. Gûteĸarnera píssauneralo oĸausîsalo ilumôrssusiat ilumut piussũput Sâtanivdlũnît kivfapiluisalũnît ilumôrdlutik miserratigisínáungisáinik. bîbile oĸarpoĸ: »anersâpiluítaoĸ ugperât ûligdlutigdlo."Jâk. 2, 19. tamánale ugpernerúngilaĸ. Gûtip oĸausîsigut nalujungnaersitauvdlune akerdlilersuíngínerínarmik píssuseĸarane piumássutsinigdle táussumúnga túniússissup Gûte ũmánik asangningnerminigdlo tunivâ; inuk taimáitoĸ ugperneĸarpoĸ - ugpernermik asangningníkut sulissumik tarnimigdlo evĸiaissumik. ugperníkut táussumûna ũmat Gûtip ássingane nutãngortitaussarpoĸ, ũmatdlo táuna sângniángíkatdlarnermine Gûtip inatsisainut nâlagtûsimángíkaluartoĸ taimáitûsínáungíkaluartordlo, mãna inatsisainik ivdlernartumik nuánâruteĸalerpoĸ tugsiausiortoĸ oĸaĸatigisínãngordlugo: »ata, inatsisitit asangâravkit; uvdloĸ nâvdlugo erĸarsautigissarãka.« tugs. 119, 97. inatsisit iluarnerat uvavtíne nãmagsinekartarpoĸ »uvinik malingnago anersârdle maligdlugo saĸissune.« Rûm. 8, 4.

inoĸarpoĸ Kristusip asangningneranik isumákêrfigingnigtumik misigissaĸarsimassunik ilumutdlo kigsauteĸalersimassunik Gûtimut ĸitornaujumavdlutik kisiánile pâsivdlugo píssusertik nãmángipatdlârtoĸ inûnertigdlo kúkunernik ulivkârdlune, ĸularerĸajâgínarpâtdlo ũmatimik anersãkut iluartúkut nutãngortitausimanerat. ũmatinut taimáitunut oĸarumavunga: ĸularnermit tunuáinaĸinak. ĸavsînik Jîsusip isigaisa sãnut patdlortariaĸartarpugut ĸiavdluta amigautivut kúkunivutdlo pivdlugit. kisiáne sapĩssusêrútariaĸángilagut. nauk akerĸamit ajugauvfigineĸaraluaruvta taimáitoĸ Gûtimit ĸimagáungilagut ajagtugaunatalo. nâgga, Kristuse Gûtip talerpiata tungânĩpoĸ ĸínutdlutalo. Juánase asanartoĸ oĸarpoĸ: »tamákunínga ilivsínut agdlagpunga ajortuliorĸunase ajortuliortoĸaraluarpatdlo atâtame igdlersuissoĸarpugut, Jîsuse Kristusimik iluartûssumik." 1 Juán. 2, 1. Kristusip oĸausê puioĸinagit: "atâtap asavâse." Juán. 16, 27. ingminut uterterusugpâtit nangmineĸ minguíssutse ivdlernássutsilo ilingne akisugtut takujumavdlugit. táussumúnga túniúkumasínaruvit táussuma ajúngitsuliarnik ilingne autdlarnîssup nãmagsiumârpãtaoĸ Jîsusip Kristusip uvdlugssâne. ilungersorneruvdlutit ĸinussarit: angnerussumik ugperit. uvagut nangmineĸ sángĩssuserput takuleruvtigo utertitsissivta nakũssusianut perĸusa. tauva únersiutigísavarput táuna, kĩnavta ĸáumarĸutât.

Jîsuse ĸanigdliartortitdlugo nangmineĸ ilingnut nãmángíssutsit pâsiartuínásavat tagpingneruleriartúsagavit amigautititdlo táussuma píssusianut nãmagdluínartumut akerdliussut erssarigdluínartumik sarĸúmísangmata. tamána ugpernaĸutauvoĸ Sâtanip támartitsiniarnerisa píssaunêrúsimaneránut Gûtivdlo anersâta inûneĸalersitsissumik súnîssartup ilingnik utertitsilerneranik.

ũmáme nangmineĸ ajorteĸassutsiminik takúngitsume Jîsusimik asangningneĸ itisûmik ísínáungilaĸ. tarnip Kristusip sáimáuneragut avdlángortitaussup Kristusip Gûtisut píssusivia nuánârutigiumârpâ. kisiáne ilerĸúkut aserorsimássuserput takúngíkuvtigo tamána uniúsángitsumik ugpernaĸutauvoĸ Kristusip píssusianik pingârnerússusianigdlo takungnigsimángínivtínut.

ingmivtínik atarĸiungnaeriartoruvta ánáussissivta minguíssusia asangníssusialo kigdleĸángitsoĸ takuvdluariartordlugo nuánarileriartúsavarput. nangmineĸ ajorteĸássutusivta táussumúnga isumákîsínaussumut pisísavâtigut; tarnerdlo sápíssutsiminik misigalune Kristusimik ujardlerpat táussuma píssaunine ramât pigalugo sarĸúmerfigiumârpâ. ajulíssutsivtínik misiginivta táussumúnga Gûtivdlo oĸausianut ĸaningnerujartortípatigut angnerungârtumik píssusia pâsiartúsavarput sulilo nãmangnerujartortumik ássingane ersseriartúsavdluta.