Ajortillit Kristusimik pisariaqassusiat

Pileqqaarnerminit inuk piginnaassutsinik iluatinnangaartunik isumatussutsimillu peqartitaavoq. Qanoq issutsimigut naammall uinnarsimavoq, Guu timillu avissaarsimanani. Eqqarsaatai minguipput pilersaarnerilu illernarlutik. Piginnaassusiili aserugaapput naalannginnikkut, imminillu asanerup asannissuseq taarserpaa. Pissuserpiaa unioqqutitsinikkut ima nukillaarsarneqarsimatigaaq, nammineq nakuussusiinnani atornagu ajortip pisaanera assortorneq saperluinnarlugu. Saatanimit tiguagaavoq, taamaattuassagaluarlunilu Guuti saammaannikkut akuliutinngippat. Ussiisup siunertarigaluarpaa Guutip inuit pinngortikkamigit pilersaarutaa akornuserniarlugu, nunalu nallinnassusermik aseruinermillu ulikkaarumallugu. Tamakkulu ajortut tamaasa qiviaqquniaraluarpai Guutip inunnik pinngortitsinerata kinguneranik pilersitaasutut.

Ajortulinngikkallartilluni inuup peqatigilluinnarpaa Ulla: "Ilisimassutsikkut paasinninnikkullu pisuussutit tamarmik isertugaaffigisaat." Kol. 2,3. Ajortulereeramili illernartuni tipaatsuutissarsisinnaajunnaarpoq, Guutimullu isertorniaraluarluni. Suli uummatip isumataarsimanngitsup pissusia taamaappoq. Guuti eqqissiveqatiginngilaa peqatigineranilu tipaatsuutissarsisinnaanani. Ajortuliortoq Guutip qanitaaniilluni pilluarnermik peqarsinnaanngilaq; iluartut katersorfiat najorumasanngilaa. Asanninneq imminut tunulliunnermik pissusilik tassaniikkumaartoq, uummatit tamarmik asanninnermik soraajuitsumik immerneqarfissaat, taassuma tarningani naaffeqalersinnaassanngilaq. Eqqarsaatai, soqutigisai aalaterneqaatigisinnaasaalu ajorteqanngitsut pigisaannit allaajumaarput. Piuaassusermi qilammiikkumaartumi allaasuujumaarpoq. Qilak taassumunnga anniarfittut issaaq. Tassani qaammaqqutaasumut nuannaarnerullu tassaniittup tamarmi qiterisaanut isertorniarumaarpoq. Guutip Guutitut piaaraluni qilammut isertikkumanngilai. Isertitaanngillat tassani najugassami naleqqutinnginnamik. Guutip naalannassusia taakkununnga innertut nungutitsisutut issaaq. Nungutitaanissaq qujarutiinnarumaarpaat utertikkumallutik toqusup kiinaanut isertorumallutik.

Ajortip nateqanngitsua kiviffigisarput anigorniassallugu, nammineq piginnaassusiinnarput atorlugu, uatsinnut ajornarluinnarpoq. Uummativut ajortuupput, allanngortissinnaanngilavullu. "Kiap minguttoq mingui tsunngortissinnaavaa? Ataatsimilluunniit taamaattoqarsinnaanngilaq!" "Uinngummi piumasaa tassa Guutimut akeraaneq, Guutip inatsisaanut naalatsigitinngilaq naalatsigitissinnaananilu." Job. 14,4; Rom. 8, 7. Ileqqulersuutitigut perorsarluarluarsimaneq (dannelse), piumassusertussuseq inuillu anguniagarisartagaat atorfissaminni iluaqutaasinnaapput; tassanili (qilammi) iluaqutaajunnaarput (atortussaajunnaarput). Ileqqoq ajunngitsoq, qallikkut ittoq, saqqummersissinnaavaat, uummalli allangortissinnaanagu. Inuunerup puilaffia minguiarsinnaanngilaat. Pissaaneq qamannga sunniisussaq, inuuneq nutaaq pavannga pissasoq pisariaqarpoq inuk ajortimit iluarnermut allanngortinneqassappat. Pissaaneq tamanna tassaavoq Kristusi. Taassuma saammaannerata kisimi tarnip piginnaassusai toqungasut uumasunngortissinnaavai, Guutimullu iluarnermullu kajungilersissinnaallugit. Annaassisoq oqarpoq: "Guutip naalagaaffia inuup takusinnaanngilaa ernioqqissimanngikkuni (uummat nutaanngorluni, kissaatigisat nutaanngorlutik, pilersaarutit killinnartorisallu inuunikkut nutaakkut ingerlassutaalerlutik). "Joh. 3, 3. Eqqarsaat imaattoq: Inuup inunngornerminit pigisaasa ajunngitsut kisimik alliartortinniartariaqarnerat pisariaqartoq, kukkuneruvoq navianartoq. "Inuup tarnimut atasup (imaappoq: anersaamut atanngitsup) Guutip Anersaavanit pisut ilassisanngilai; tamanna taassumunnga sianiitsuliorneruvoq, paasinerlu saperpaa, Anersaap uuttuutaa kisiat atorlugu misilitassaammat." "Tupigusuutigissanngilat ima oqarfigigakkit: Ernioqqittariaqarpusi." 1 Kor. 2, 14; Joh. 3, 7. Kristusi pillugu allassimavoq: "Taassumaniippoq inuussut, inuussullu inuit qaammaqqutigaat." Joh 1, 4. Jiisusillu aqqa tassaavoq annaffissatuaq "Allakkullumi annaffissaqanngilaq, ilami inuit qilaap ataani atermik allamik tunineqarsimanngillat annaanneqaatissatsinnik." ApS. 4, 12.

Naammanngilaq Guutip asannissusersua paasissallugu, naammanngilarlu isumassuissusia ataatatullu asattuussiuarnera takussallugu. Naammanngilaq ilisimassuseq naapertuilluamerlu inatsisaani paasissallugu, takussallugulu tamanna asanninnerup siunertaanik soraajuitsumik tunngaveqartoq. Apustilip Paulusip tamanna tamaat takuaa oqarami: ".”. inatsisit isumaqatigaakka ajunngitsuunerarmata." "Tassami inatsisit illernarput, inassullu illernarpoq iluarlunilu ajunngitsuullunilu." Rom. 7, 16. 12. Tarnimigulli ernumalluni sioorallunilu nangippoq: "Uangali uinimmit pisuuvunga akigineqarsimallunga ajortimut kiffaalerlunga." Rom. 7, 14. Minguissuseq iluassuserlu imminiinnaq pigilissallugit sapikkani anguniarpaa, oqarporlu: "Uangannguakkuluk! Kia kiffaajunnaarsissavaanga timimit matumannga toqup pianit?" Rom. 7, 24. Taamaappoq suaarut nunanit tamanit qangarsuarli maannamut uummatinit nanertugaasunit qullartinneqartoq. Tamanut akissutissaq ataasiinnaavoq: "Aajuna Guutip savaaraa silarsuup ajortaanik nammattoq." Joh. 1,29.

Guutip anersaata sallusuissut tamanna tarninut ajortilinnik misigalutik aniguisinneqarnissaminnik anersaaruluuteqartunut nalujunaarsinniarlugulu paasinarsarniartarpaa assersuuterpassuit atorlugit. Jaaku ajortulioreerluni Esauilu salloqittareerlugu angajoqqaami najugaannit qimaagami, ajortimi oqimaassusia misigaa. Kiserliorluni ajattugaallunilu inuunermillu nuannarinnissutigisani tamaasa avissaarlugit, ataasiinnaq tarnimigut tamanit annerusumik annikilliuutigaa siooragalugu, tassa ajortimi Guutimut avisaarluinnartissimassaneraani. Aliasungaarluni nunaannarmut nallarpoq qasuerserniarluni. Qattorngit kiserliorpalaartut avatangiisigalugit qilallu allaaqqik ulloriarpalik qulangiisigalugu. Qaamasoq eqqumiitsoq isaanut takutippoq sinitsillugu. Narsamit nalaffigisaanit soorlumi tummeraq qilaap isaaffianut atasoq, Guutillu inngilii tassuuna majuartarlutillu atertartut, qilammillu alianaatsumit Guutip nipaata oqariartuutissaq tuppallersarneqarnermik neriunnermillu nalunaarutigerpallakkaa. Taama Jaakumut nalunaarneqarpoq tarnaata kissaatigingaagaa - annaassisussamik qujasaat. Nuannaangaarluni qujaniangaarlunilu takuaa aqqutissaq nammineq (ajortuliortup) - Guutimik peqatiginneqqilernissamut aqqutissani. Tummeraq nalunartulik Jiisusimut Guutip inuullu akornanni akunnermiliuttutuamut assiuvoq.

Assiliaq taamaattoq Jiisusip Nathanaelimik oqaloqatiginninnermini eqqaavaa oqarami: "Takujumaarparsi qilak ammasoq, Guutillu inngilii Inuup Ernerata qulaani majuartarlutillu atertartut." Joh. 1,51. Inuk orlunermigut imminik Guutimit avissaartippoq. Qilaap nunallu akornanni atassutaarulluinnarpoq, qunnerlu taakkua akornanniittoq inuup kialuunniit ikaarsinnaanngilaa. Kristusikkulli nuna qilammut atassuserneqaqqippoq. Kristusip piniussinermigut nateqanngitsoq ajortip pilersitaa ikaartarfilerpaa inngilit kiffartortut inummut atassuteqarsinnaalersillugit. Kristusip inuk orlusimasoq sanngiinnerani ikiortariaqangaarneranilu piginnaanerup tamarmi puilaffianut atassuserpaa.

Inuit siumukarnissamik takorloorneri aserujasuupput, inuillu inuussutsiminni minguillisarneqarnissaannik ilungersornerit asuliinnassapput puilasutuaq eqqarleriit orlusimasut neriuutituaat ikiorneqarsinnaaffituaallu ujanngikkunikku. "Tunissutit ajunngitsut naammalluinnartuusullu tamarmik" Guutimit pipput. Jaak. 1, 17. Kinaluunniit taassumannga avisaarsimalluni inuuguni ilumoortumik iluartumillu pissuseqarsinnaanngilaq. Guutimut aqqutaasutuaq tasssa Kristusi. Oqarpoq: "Danga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq." Joh. 14,6.

Guutip qitornani nunamiusut asanninnermik toqumit pissaaneqarnerusumik nalligai. Ernerminik tunigamisigut tunissutikkut ataasiusukkut qilak tamaat uatsinnut kuivaa. Annaassisup inuunera, toqua uatsinnillu qinnussinera, inngilit kiffartornerat, anersaap qaaqqusinera, Ataataq sulisoq tamaginni tamaasalu aqqutigalugit, qilammiut uatsinnik soqutiginnittuarnerat, tamakku tamarmik iluaqutaapput inuit annaanneqarnisaannut.

Pilliut tupinnangaartoq uagut pilluta naammassineqartoq eqqarsaatiginiartigu. Tammartut annaallugit ataatap illuanut utertikkumallugit suliaq ilungersornerlu qilammiut takutitaat pingaartikkumallugu misilinniartigu. Killinnartorisinnaasat sakkortunerusut, sakkussalluunniit sakkortunerusut atorneqarsinnaasimanavianngillat. Akissarsiassaq angingaartoq iluartut pisassaat tipaatsuutissaq qilammi, inngilit ilaginissaat, Guutip erneratalu peqatiginissaat asanninnissaallu, piginnaassutsitta tamarmik naassaanngitsussami pitsaanerujartuinnarnissaat - tamakku tamarmik sakkortuumik kajumissaassannginnerpaatigut qiimmassassannginnerlutalu pinngortitsiserput aniguisitsiserpullu uummatitta iluunngaanit kiffartuullugulu asaqqullugu?

Illua'tungaanilu ajorti, akiniaanissaq pinngitsuugassaanngitsoq, inuunittalu asiujartorluni aserugaalluinnarnissaa pillugit Guutip eqqartuinera, tamakku Guutip oqaasiata nalunaajarpaat oqaanniarluta Saatani kiffartuuteqqunagu.

Guutip saammaannera soqutigissannginnerparput? Sumik annerusumik iliorsinnaava? Taanna asanninnermik taama tupinnartigisumik uatsinnik asannissimasoq pissusissavimmik pissuseqarfigilerniartigu. Sakkussat pilerseriigai allanngortinneqarfissavut atorniartigik taanna assigilerlugu inngilillu iluartut peqatigeqqilerlugit ataatarlu ernerlu eqqissiveqatigeqqilerlugit kattuffigeqqillugillu.