Ajortirnik anngiiarneq.

"Unioqqutitsinerminik isertuisoq pilluaatissaqanngilaq; ajortuliaminilli anngiiaatiginnittoq soraarussisorlu nallittorneqartussaavoq." Uss. 28, 13.

Guutip saammaanneranik pineqarnissamut piginnaassutissat naapertuilluartuullutillu inornanngitsuullutillu artornanngillat. Ajortitsinnik isumakkeerfigineqarsinnaaqqulluta sumik artornartumik iliuuseqarnissarput Naalakkap piumasarinngilaa. Iluartuliorluni angalanissat sivisuut ajornakusoornartorsiortullu, peqqissiminiarluniluunniit anniartinnissat, tarnivut qilaap Guutianut peqqullugit, ajortuliarpulluunniit isumakkiigassanngortinniarlugu, tamakku pisariaqanngillat. Ajortiminik nassuertoq iperarlugulu nallittuinermik pineqassaaq.

Apustili oqarpoq: "Taamaattumik ajortissinnik anngiiarfigeqatigiigitsi, immissinnullu qinnuteqatigiigitsi ajorunnaarsitaaqqullusi!" Jak. 5, 16. Ajortisi Guutimut taakkuninnga isumakkeerisinnaasutuamut nassuersigik, kukkunisilu immissinnut anngiiaqatigiissutigalugit. Ikinngutit sanililluunniit sumik patsiseqarfigigukku kukkunernik oqarfigisariaqarpat, taassumalu pinaannani isumakkeerfigissallutit pissusissaraa. Tulleraa Guuti qinnuigisariaqarakku qatanngut innarlikkat Guutip pigimmagu, taamalu innarlerakku pinngortitsisinnut utertitsisinnullu ajortuligavit. Tamanna taamaalillugu ni ttarneq arpoq saammaannartitsisutuatsinnut palasiunersuatsinnut "tamatigut uagutsitut usserneqarsimasumik, ajorteqanngitsumilli," "palasiuneqanngilagummi qajannassutsitsinni naakkiginnissinnaanngitsumik." Hebr. 4, 15. Iluaassutsip mingui tamaasa piiassallugit piginnaavoq.

Ajortulinerminnik anngiiarnermi tarnimikkut Guutip saani nikanartissimanngitsut Guutimit ilassineqarsinnaasut siullerpaaq suli naammassisimanngilaat. Saanniarneq ugguarfiufingitsoq misigisarilersimanngikkutsigu, maniguulluinnarluta anersaamillu sequmittumik pilluta ajortivut anngiiaatigisimanagit, taamalu iluaassuserput aliasuutigilernagu, taava ajortit isumakkiigaanerat ilumoorluta pissarsiariniarlugu ujarsimanngilarput. Ujarlersimanngisaannaruttalu Guutip eqqissinera naninavianngilarpu t. Ajortuliarisimasatsinnik isumakkeerfigineqarsimannginnitsinnut pissutituaaginnarpoq uummativut maniguutitikkumasimannginnatsigik, Guutillu oqaasiisa piumasarisaat najoqqutariumasimanagit. Ersarilluinnartumik nalunaajagaareerpoq. Ajortinik anngiiaatiginninneq saqqumisumik kisittaluunniit ilisimasatsinnik pissagaluaruni uummammit pisariaqarpoq, isertunngitsumik ilumoortumillu. Kinaluunniit taamaaliornissaminut pinngitsaalineqassanngilaq. Nassuerneq soqqusaappaluttumik soqutigittaappaluttumillu pisussaasariaqanngilaq, ajortillu pissuserpiaanik paasinnilluarsimanngitsuni pilersinniartariaqarani. Nassuerneq uummatip ilorpiaanit pisoq Guutimut ittuinnartumut naakkittartumullu apuuttarpoq. Tussiaasiortoq oqarpoq: "Naalakkap qanippai sequmissimasumik uummatillit, annaattarpai aserortersimasumik anersaallit." Tuss. 34,19.

Anngiiarneq ilumoortoq tamatigut immikkut pissuseqartarpoq, ajortinillu immikkuutaartunik ilisarsinerusaluni. Taakku imaattuusinnaapput: Guutiinnarmut nittartariaqartuusinnaallutik, kukkunerusinnaapput, inunnut innarlikkanut ajoqusikkanulluunniit anngiiaatigisariaqartut; imaluunniit tamanut tunngasuusinnaapput taamalu tamanut anngiiaatigisariaqarsinnaallutik. Kisianni anngiiarneq sunaluunniit pineqartumut unneqqarilluinnassaaq, ajorterpianillu pisuuffigisannik nassuerutiginninnerulluni. Samuelip ulluini Israelikkut Guutimit avissaarput. Ajortip kinguneri ajortut atortariaqarpaat, Guutimummi upperneq pigiunnaarsimagamikku. Inuiaat siulersussallugit pissaaneranik ilisimassusianillu paasinninnertik pigiunnaarsimavaat; imminut illersuissalluni piginnaaneranik ajugaatitsisinnaassusianillu tatiginninneerussimapput. Silarsuarmiittut tamarluinnarmik naalakkersortaat tunussimavaat, inuiaqatigiillu eqqaminniittut naalakkersortaasa assingannik pisaarnissartik kissaatigilerlugu. Eqqissineq nassaaritinnagu anngiiaat ersarissoq una anngiiaatigaat: "ajortuliareriikkavut ilallugit kunngissatsinnik piumasaqarsimagatta." 1 Sam. 12, 19. Ajortuliaq paasillualigartik taannarpiaq oqaatigisariaqarpaat. Qujasuissusiata ajornartorsiortilerpai Guutimillu avissaartillugit.

Anngiiarneq peqqissimilluarnermit saanniarumanermillu pinngitsoq Guutimit ilassineqarnavianngilaq. Inuunermi allanngornerit aalajaatsut pisariaqarput. Guutip nuannarinngisai tamaasa taamaatittariaqarput. Taamaaliorneq ajortimik peqqissimissutiginerup ilumoortup kingunerinngitsoortussaanngilaa. Pilersitassaq uagut tungitsinnit naammassineqartussaq erseqqarilluartumik uatsinnut nittarneqarpoq: "uffarniaritsi, eqqiarniaritsi! Iluaatsuliasi isinnit peersigit, ajortumik iliussaaritsi, iluartumik iliorneq ilinniarniarsiuk! Innarluissut noqqaassutigisiuk, qunutitaasoq ikiorsiuk, iliarsuusoq naapertuilluarnermik pineqartissiuk, uillarneq eqqartuussivimmi illersorsiuk!" Es. 1, 16. 17. Iluanngitsup "sallunaveerutisiani utertillugu arsaarinnissutinilu taarserlugit, iluanngitsuliornanilu inatsisit inuussutaasut ingerlavigigunigit, taava inuuginnassaaq toqussananilu." Ez. 33, 15. Paulusip saanniarneq oqaluuserigamiuk oqarpoq: "Takussagissilu Guutip piumasaanik aliasunnerup tamatumarpiaap ilungersorneq qanoq atsigisoq pilersikkaa akornassinni - allaammi utoqqatserneq, uumitsanneq, ersineq, erinineq, tamaviaarneq pillaanerlu. Tamatigut takutipparsi tamatumani pinngitsuususi." 2 Kor. 7, 11.

Ajortip ileqqorissaarnissamik paasinnilluni soqutigisaqarneq nukillaartissimasaraangagu inuup ajortuliortarnikkut inuunermini amigaatini takusinnaajunnaartarpai, ajorti qanoq angitigisoq naammassigini paasisinnaanagu, anersaallu iluartup pissaaneranut nalujunnaarsitsisumut naalanngiinnaruni ajortimut tappiittuaannassaaq. Nassuernera ilumoorluinnarnerunngilaq ilungersorluniluunniit pinerunani: ajortulinini ilisarilersaraangamiuk nungullugit patsisiginngikkaluaruniuk maanna assuarineqaatiminik iliorsimanavianngikkaluarluni.

Adam Evalu paarnamik nereqqunngisamik nerereeramik kanngusullutillu annilaalerput. Eqqarsaataat siulleq tassa qanoq ilillutik ajortuliornertik patsisissarsiorniassallugu, toqumik pillarneqarnissaq siooranartoq pinngitsoorniarlugu. Guutip ajortuliornertik pillugu apersormatik Adamip Guutilu nuliilu pisuutinniaraluarpai. Oqarpoq: "Arnap uannut tunniussavit orpimmiittumik tunimmanga nerivunga." Arnaq pulateriaarsuk pisuutinniarlugu oqarpoq: "Pulateriaarsuup ussermanga nerivunga." 1 Mos. 3,12.13. Sooruna pulateriaarsuk pinngortikkakku? Sooruna Paradisimiitippiuk? Apeqqutit taamaattut ajortuliornerminut patsisissarsiorneraniipput. Taama orlunerminnut Guuti pisuutinniarpaat. Imminut iluartinniartarneq tamanna sallup ataanit pinngortarpoq, kingornalu Adamip ernerini paniinilu (inunni) tamani saqqummersarpoq. Nassuerneq tamanna immikkut ittoq Guutip anersaata pilersitarinngilaa, Guutimillu atortuutinneqarnaviarani. Inuk peqqissiminerup ilumoortup pisissavaa, pisuussutsi tamaat nammallugu nassuerutigitillugu, toqqortuinani pisuusaarnanilu. Ilanngaaserisukulunnguatut isini qilammut aarlortissallugit sioorasutut nillerumaarpoq: "Guuti, saammaannga ajortiliusunga!" Luk. 18, 13. Ajortulinerminnillu nassuertut iluartuutinneqarumaarput, Jiisusip aammigut tarnit peqqissimisut saammaannartikkumammagit.

Peqqissiminerup ilumoortup maniguutilerfiusup qanoq ittuussusianik paasissutissat Guutip oqaasianiittut takutippaat nassuerneq patsisissarsiornermik kukkunermilluunniit millisaaniarnermik ilaqanngi tsoq. Paulusi patsisissarsiunngilaq. Ajortuliornermi ajussusia minnerulersinniaraluarnagu eqqorlugu oqaluttuaraa. Oqarpoq: "Palasiunernit pisussaatitaallunga illernartut ilaat amerlasuut parnaarussaatittarpakka toqutaassagaangatalu akuerseqataasarlunga. Synagogini tamani pillarlugit pinngitsaaliniartarpakka mitalliisinniarlugit. Ima atsigisumik kamaappakka illoqarfiit nunani allaniittut tikivillugit malersortarlugit." ApS. 26, 10. 11. Nangaanani oqarsinnaavoq: "Kristusi-Jiisusimi silarsuarmut tikiussimavoq ajortillit annaatissallugit, uangalu taakkunannga ajorteqarnersaavunga." 1 Tim. 1, 15.

Uummat maniguuttoq sequmittorlu - ilumoorluni peqqissimilersoq Guutip asannissusianik Jiisusillu sanningasulimmi anniarneranik misigitsiassaaq. Soorlulu erneq ataataminut asannittumut nassuertartoq, taamatut ilumoorluni peqqissimisup ajortini tamaasa Guutimut nassuerutigiumaarpai. Allassimavorlu: "Ajortivut anngiiaatigigutsigit taanna ilumoortuullunilu iluartuuvoq, tassa ajortitsinnik isumakkeerfigissavaatigut iluaassutsitsinnillu tamanit minguiaaffigaluta." 1 Joh. 1, 9.