Suttudovddastus

Dat guhte rihkkumušaidis čiehká, sus ii leat mihkkege lihkuid, muhto guhte dovddasta daid ja luohpá dain, gávdná árkkálmastojumi (Sátnev. g. 28: 13).

Ipmila árpmu oažžuma eavttut leat ovttageardánat, vuoiggalaččat ja govttolaččat. Hearrá ii gáibit mis vattis daguid vai oččošeimmet suttuid ándagassiiaddojumi. Mis ii leat dárbu dahkat guhkes ja lossa bassivádjolanmátkkiid, eatge mii dárbbaš biinnidit iežaideamet suttugáhtanhárjehusain vai Ipmil anášii min sieluid dohkálažžan dahje vai mii sáhtášeimmet máksit suttuideamet ovddas, muhto gii suttuidis dovddasta ja dain luohpá, son oažžu árpmu.

Apostal cealká: "Dovddastehket din rihkkumušaideattet guhtet guimmiidasadet ja rohkadallet guimmiideattet ovddas, vai dii dálkkastuvvobehtet" (Jak. g. 5:16). Dovddastehket suttuideattet Ipmilii, gii lea áidna, guhte sáhttá daid ándagassii addit, ja dovddastehket feaillaideattet guhtet guimmiidasadet. Jus don leat bávččagahttán ustibat dahje siidaguoimmát, de berret dovddastit boastto daguidat, ja sus lea geatnegasvuohta addit daid ándagassii. Dasto don berret átnut Ipmilis ándagassiiaddojumi, danin go dat viellja, gean don ledjet bávččagahttán, gullá Ipmilii, ja go don su vahágahttet, de suddudit su sivdnideaddji ja lonisteaddji vuostái. Du ášši galgá biddjojuvvot áidna Soabaheaddji ovdii, min stuorra Bajimuš Báhpa ovdii, guhte "juohke dátos lea geahččaluvvon seammá láhkái go miige, dattetge sutu haga", ja guhte "šállosa min headjuvuođaid" ja guhte sáhttá buhtisit min buot suttu duolvvain (Hebr. g.4: 15).

Dat, guđet eai leat vuolidan sieluideaset Ipmila ovddas suttuideaset dovddastettiin, eai leat vel deavdán vuosttamušge dohkálašvuođa eavttu Ipmila ovddas. Jus mii eat leat dahkan dakkár buorádusa, maid eat gáđa, ja jus mii eat leat duohta vuollegis siluin ja cuvkejuvvon váimmuin dovddastan suttuideamet, fasttášan vánhurskkismeahttunvuohtamet, de dalle mii eat leat goassege rievttuid ohcan suttuid ándagassiiaddojumi; ja jus mii eat goassege leat ohcan, de mii eat dalle leat gávdnange Ipmila ráfi. Áidna sivva, manin mii eat leat ožžon suttuid ándagassiiaddojumi ovddeš suttuideamet ovddas, lea dat, go mii eat háliid vuolidit váimmuideamet eatge vuollánit duohtavuođa sániid eavttuide. Dan birra mii leat ožžon dárkilis rávvagiid. Lehkos dal suttudovddastus ollugiid ovddas dahje guovttágaskan dahkkon, de dat berre vuolgit váimmus ja leat eaktodáhtolaččat addojuvvon. Suttolačča ii galgga dasa bágget. Dan ii galgga dahkat gehppesmielalaččat dahje fuollameahttumit, iige dasa galgga bágget dakkáraččaid, geat eai dovdda suttu gáfatlaš luonddu.

Dušše fal dakkáraš dovddastus, mii vuolgá váimmu čekŋaleamos dovddus, gávdná geainnu váibmoláđis Ipmila lusa. Sálbmačálli cealká: "Hearrá lea lahka sin, geain lea doddjojuvvon váibmu, ja son beastá sin, geain lea cuvkejuvvon vuoigŋa" (Sálmmaid g. 34: 19).

Duohta suttudovddasteapmi lea álelassii dihtolágán ja dat dovddasta buot sierralágan suttuid. Dat sáhttet leat dakkárat, mat berrejit biddjojuvvot dušše Ipmila ovdii, dahje dat sáhttet leat verrodagat, maid berre dovddastit daidda olbmuide, geat leat šaddan dain gillát, dahje dat sáhttet leat jolggalaš suttut, mat galget almmolaččat maiddái dovddastuvvot. Muhto juohke dovddasteapmi galgá leat nantis ja áššalaš, nu ahte olmmoš dovddasta aiddo daid suttuid, maidda son lea sivalaš.

Samuela áigge israelalaččat luhpe Ipmilis. Sii šadde gillát suttu čuovvumušain, dasgo sii ledje heaitán oskumis Ipmilii, sii eai šat jáhkkán, ahte son fámuinis ja viisodagainis ráđđe álbmoga badjel, sii ledje massán luohttámuša dasa, ahte son sáhttá bealuštit ja dikšut áššis. Sii jorgaledje sealggi máilmmiviidodaga stuorra Ráđđejeaddjái ja sávve alcceseaset dan lágan ráđđehushámi go birrasa eará álbmogiin lei. Ovdalgo sii ožžo ráfi, de sii dahke dovddasrusa: "Mii leat lasihan bahá min suttuidasamet ánuhettiin alcceseamet gonagasa" (1 Sam. 12: 19). Sii fertejedje dovddastit aiddo dan suttu, masa sii ledje fuomášan iežaset sivalažžan. Sin giitemeahttunvuohta losidahtii sin sieluid ja earuhii sin Ipmilis.

Suttu dovddasteapmi ii leat Ipmilii dohkálaš almmá duohta gáhtamuša ja buorádusa haga. Eallimis fertejit dáhpáhuvvat duohta nuppástusat; buot, mii lea Ipmila vuostái, ferre biddjot eret. Dát čuovvu duođalaš suttumorraša. Midjiide lea čielgasit daddjojuvvon, maid mii bealisteamet galgat dahkat: "Basadehket, buhtistehket iežaideattet, váldet daguideatter baháid eret mu calmmiid ovddas, heitet eret baháid dahkamis, ohppet buriid dahkat; ohcet vuoigatvuođa, oahpistehket veahkaválddalačča rivttes bálgá ala, rábidehket oarbásiidda vuoigatvuođa, čuoččuhehket leaskkaid ašši" (Jes. 1: 16, 17). Jus "ipmilmeahttun addá pántta ruoktut, máksá dan maid lea rievidan, vádjola eallinbáhkkomiid mielde nu ahte ii vearrivuođa daga, de galgá son vissásit eallit, ii son galgga jápmit" (Hes. 33: 15). Jorgalusa birra Paulus cealká: "Dasgo geahča, aiddo dat go dii šattaidet morrašii Ipmila miela mielde, makkár áŋgirvuođa dat duddjo din siste, velá bealuštusa, velá moaráhumi, velá balu, velá háliidusa, velá áŋgIrvuođa, velá bagadusa! Juohke dáfos dii čajeheiddet, ahte dii leiddet buhttasat dan ášši harrai" (2 Kor. 7: 11).

Go suddu lea sevnnjodahttán heivvolasvuođa dovddu, de vearredahkki ii oainne šat luonddus feaillaid iige dovdda daguidis fastivuođa; ja jas son ii dovddas Bassi Vuoiŋŋa šiggumiid, de son báhcá čalmmeheapmin iežas suttuide. Su dovddastusat eai leat vuoiggalaččat eaige duođalaččat. Juohke háve go son dovddasta iežas suddudan, de son laktá dovddaslussasis juogalágan bealuštusa, ja lohká, ahte jus son ii livčče šaddan aiddo dan dilálašvuhtii, de son ii livčče dahkan dan suttu, mas son dál cuiggoduvvo.

Dan maŋŋá go Áttán guovttos Eváin leigga borran gildojuvvon muorjji, de sudno devddii heahpat ja ballu. Vuosttenan sudno áidna jurddan lei, mo soai galggašeigga bealuštit suttuska ja vealtat mearriduvvon jápminduomus. Go Hearrá sudnos jearai sudno suttu birra, de Áttán vástidii bijadettiin siva belohahkii Ipmila, belohahkii beallalaččas ala: "Nisson, gean don addet munnje mu luhtte orrut, son attii munnje dan muoras, ja mun borren." Eamit vuot sivahalai gearbmaša ja dajai: "Gearpmaš fillii mu, ja mun borren" (1 Mos. g. 3: 12, 13). Manne don sivdnidit gearbmasa? Manne diktet dan boahtit Eden gárdái? Son bealuštii suttus dáid gažaldagaiguin ja bijai iežaska suddui jorraleami Ipmila ovddasvástádussii. Iešvánhurskkisvuođa vuoigŋa lea vuolgán giellásiid áhčis, ja dan leat buot Áttáma bártnit ja nieiddat čajetan. Dákkáraš dovddastusat eai leat Bassi Vuoiŋŋa duojit eaige dat leat Ipmilii dohkálaččat. Duohta gáhtamuš bidjá olbmo iežas guoddit sivalašvuođas ja dovddastit dan čiegakeahttá maidege ja almmá iešvánhurskkisvuođa haga. Tuollárriebu láhkái, guhte ii jolggadan oppa čalmmiidisge bajidit son čurve: "Ipmilan, leage munnje suttolažžii arbmugas"; ja dat, geat dovddastit suttuideaset, šaddet vánhurskkisin dahkkojuvvot, dasgo Jesus buktá iežas vara gáhtavaš sielu bealuštussan.

Dat ovdamearkkat duođalas gáhtamušas ja vuoláneamis, mat leat muitaluvvon Ipmila sánis, čájehit rivttes suttudovddastusa vuoiŋŋa, mii ii geahččal bealuštit suttu iige vikka dahkat iežas vánhurskkisin. Paulus ii viggan bealuštit iežas; son sárgu suttuidis gova hui sevdnjes ivnniiguin, geahččalkeahttá láivudit iežas sivalašvuođa. Son dadjá: "Eatnat bassi olbmuid mun suhppejin giddagassii, go mun dasa ledjen ožžon fámu bajimuš báhpain, ja go sii sorbmejuvvojedje, de mun mihten dasa. Ja buot synagogain mun dávjá ráŋggástahtten sin ja bággejin sin sárdnut bilkádusaid, ja velá eambbo mun áráskin sin vuostái mun doarrádallen sin vel olgoeatnan gávpogiid rádjái” (Ap. dagut 26: 10, 11). Iige son eahpit dadjat: “Kristus Jesus bođii máilbmái dahkat suttolaččaid ávdugassan, geaid gaskkas mun lean stuorámus suttolaš” (Paulus 1. g. Tim. 1: 15).

Váibmu, mii lea duođalaš gáhtamušas cuovkanan ja vuollánan, addá árvvu Ipmila ráhkisvuhtii ja Golgata oaffarii; ja aiddo dego mánná dovddasta feaillaidis ráhkislaš áhččasis, nu buktá duohta gáhtavaš olmmoš buot suttuidis Ipmila ovdii. Ja lea čállojuvvon: "Jus mii dovddastit min suttuideamet, de son lea oskkáldas ja vánhurskkis, nu ahte son ándagassii addá midjiide suttuid ja buhtista min buot vanhurskkismeahttunvuođas" (1 Joh. 1: ).